Read SEBR SÕNGO, 1998 Yɩɩn‑sõamyã 44 Bible Online

Yɩɩn‑sõamyã 44 - SEBR SÕNGO, 1998 bible

Yɩɩn‑sõamyã 44

¹A Koore yagensã yɩɩlle, yɩɩlã naab yĩnga.

²Wẽnnaam, tõnd mens tʋb wʋmame, tõnd yaab-rãmbã togsa tõndo, b togs-d-la tʋʋm nins yãmb sẽn tʋm bãmb wakatẽ wã, sẽn yaa kʋdem-wẽndẽ wã.

³Yãmb diga bu-zẽms ne y nug n dees b tẽms n kẽes tõnd yaab-rãmbã. Yãmb sãama neb n kɩt tɩ d yaab-rãmbã fɩɩge.

⁴Bala, tõnd yaab-rãmbã ka reeg tẽngã ne zabr sʋʋg pãng ye. La ka ne bãmb kang pãng la b paam tõogr ye. Yaa yãmb nug-rɩtg pãngã, yaa yãmb kangã ne y nengã vẽenemã yĩnga, bala, yãmb nong-b lame.

⁵Wẽnnaam, yãmb n yaa mam dĩma. Bɩ y kɩt t'a Zakoob yagensã paam tõogre!

⁶Ne yãmb pãnga, tõnd lubda d bɛɛbã, ne yãmb yʋʋre, tõnd tabda d zabd-n-taasã.

⁷Bala, mam ka teegd m tãpo, la mam zabr sʋʋg ka tõe n fãag-m ye.

⁸Yãmb n fãagd tõnd d bɛɛbã nugẽ, yãmb n ningd sẽn kis-b tõndã yãnde.

⁹Tõnd maanda sũ-noog daar fãa d Wẽnnaamã yĩnga. Tõnd na n pẽga yãmb yʋʋrã wakat sẽn ka sɛta.

¹⁰La baoosgo, yãmb basa tõndo, yãmb ninga tõnd yãnde, yãmb ka leb n yãagd tõnd tãb-biisã zabrẽ ye.

¹¹Yãmb kɩtame tɩ tõnd tard d bɛɛbã taoore, neb nins sẽn kis tõndã zɛɛda b sẽn dat fãa.

¹²Yãmb basa tõnd wa piis tɩ b na n kʋ n dɩ, yãmb sãeega tõnd n kẽes soolem a taab pʋse.

¹³Yãmb dɩka y nebã n koos naana, yãmb ka koos tõnd n dok yõod ye.

¹⁴Yãmb basame tɩ d yagsã paoogd tõndo, tɩ neb nins sẽn gũbg tõndã laad tõnd la b yaand tõndo.

¹⁵Yãmb kɩtame tɩ tõnd lebg yel-bũnd bu-zẽmsã yĩnga. Bu-zẽmsã girda b zut n paoogd tõndo.

¹⁶Mam paamda paoogr daar fãa, yãnd luda mam nenga.

¹⁷Mam sẽn wʋmd paoogrã ne tʋyã, la bɛyã sẽn baood n dok a sũur ne tõndã yĩnga.

¹⁸Yel-kãensã fãa paamda tõndo, la tõnd yaool n ka yĩm yãmb yelle, d ka kɩɩs yãmb kaoolã me ye.

¹⁹Tõnd ka wẽnemd n bas yãmb ye. Tõnd ka bʋdg n bas yãmb sorã ye.

²⁰La ne rẽ fãa, yãmb bedsa tõnd we-baasã bogdẽ, n lud tõnd kũum maasmẽ.

²¹Tõnd sã n dag n yĩmẽ d wẽnnaamã yʋʋre, tõnd sã n dag n pʋʋsẽ wẽn-sãanga,

²²Wẽnnaam dag n ka na n bãngẽ sɩda? Bala, bãmb mii sũurẽ yel-solgdse.

²³Yaa yãmb yĩng la b kʋʋd tõnd daar fãa, n get tõnd wa piis b sẽn tar n dabd koodgo.

²⁴Zu-soaba, yik-y-yã! Yaa bõe tɩ y gãe n gõe? Bɩ y neke! Ra bas-y tõnd wakat fãa yĩng ye!

²⁵Bõe yĩng tɩ y solgd y nenga? Bõe yĩng tɩ y yĩmd tõnd farã ne d namsgã yelle?

²⁶Bala, tõnd yɛɛme n lʋɩ tompʋlempʋkẽ, tõnd lʋɩ n vãba tẽnga.

²⁷Bɩ y yik n sõng-do! Fãag-y tõnd y nonglmã yĩnga!