Read SEBR SÕNGO, 1998 Yɩɩn‑sõamyã 49 Bible Online

Yɩɩn‑sõamyã 49 - SEBR SÕNGO, 1998 bible

Yɩɩn‑sõamyã 49

¹A Koore yagensã yɩɩlle. Yaa yɩɩlã naab yĩnga.

²Nebã fãa, kelg-y-yã, Dũniyã nebã fãa, bɩ y yok y tʋb n kelge.

³Nin-tals ne nin-kãsemse, arzegs rãmb ne naong-rãmba, naag-y taab n kelge.

⁴Mam noor na n goma yam goamã, la mam sũur na n tagsa bãngr tagsgo.

⁵Mam na n kelga yel-bũna, mam na n bilga m yel-solgdsã võor ne pɛndga.

⁶Bõe yĩng tɩ mam na n zoe rabeem toog daare? Mam bɛɛbã tʋʋm-beedã gũbga maam.

⁷Bãmb teega b paoongo, la b pẽgd b mense, b arzegsã sẽn waoogã yĩnga.

⁸Bãmb ned ba a yembr ka tõe n fãag a to ye. La b ka tõe n yao Wẽnnaam b fãagrã yĩng ye.

⁹Bãmb sɩɩgã fãagr yaood yaa toogo, la b kõn paam fãagr ye.

¹⁰Ned tõe n vɩɩmdame n ka wa ki? Ned na vɩ bal n ka wa kẽ yaoogẽ?

¹¹Bala, d yãtame tɩ yam dãmb kiidame, la yalemb ne nin-yood me kiidame. B fãa loogdame n bas b paoongã tɩ neb a taab yõd n sooge.

¹²Bãmb tagsdame tɩ b rotã na n paa wakat fãa, tɩ la b rotã na n kaoosa zamaan woo zamaane. Bãmb dag n dɩka b yʋy n pʋd zĩisi.

¹³La ninsaal ne a waoogrã ka tol n kaoosdẽ ye. Yẽnda yaa wa rũmsã sẽn kiidã bala.

¹⁴Neb nins sẽn teeg b mens yalemdã baoosg la a woto. La neb nins sẽn pʋgd bãmbã nonga b goamã.

¹⁵B tara bãmb wa piis n dabd kɩɩm-kulgu. Kũum na n sooga bãmba. Wakat sẽn wate, nin-tɩrsã na n taba bãmba. Bãmb neermã na n loogame, tɩ kɩɩm-kulg lebg bãmb yiri.

¹⁶Hakɩɩka, Wẽnnaam na n fãaga maam n yiis kɩɩm-kulgu. Bala, bãmb na n deega maam.

¹⁷Ned sã n lebgd rakãagre, t'a zakã ziir paasdẽ, bɩ f ra yɛɛs ye.

¹⁸Bala, yẽnda kũum daare, a ka na n zã baa fɩ n loog ye. La yẽnda ziirã ka na n tũ-a n sig yaoogẽ ye.

¹⁹Yẽnda tõe n maana sũ-noogo, a vɩɩmã wakate. B na n pẽga foom, f sẽn paam naarã yĩnga.

²⁰La baoosgo, fo me na n bʋʋga f saam-dãmbã sẽn ka na n leb n yãnd wĩndg vẽenemã.

²¹Ned sã n tar waoogr n yaool n ka tar yam, a wẽnda wa rũmsã sẽn kiidã.