Read SEBR SÕNGO, 1998 Yɩɩn‑sõamyã 55 Bible Online

Yɩɩn‑sõamyã 55 - SEBR SÕNGO, 1998 bible

Yɩɩn‑sõamyã 55

¹A Davɩɩd yɩɩlle. Yɩɩnda ne yʋʋm-teed sẽn tar susi. Yaa yɩɩlã naab yĩnga.

²Wẽnnaam, kɩll-y y tʋbr n kelg m pʋʋsgã, Mam sã n wa n kot yãmba, bɩ y ra solg y meng ne-m ye.

³Bɩ y kelg-ma, la y leok-ma! Mam yam yuusdame, tɩ m sidgd n maand yɩɩre,

⁴mam sẽn wʋmd bɛyã koɛɛg rãamdã yĩnga, ne nin-wẽngã sẽn namsd maamã yĩnga. Bala, b kɩtdame tɩ toog paamd maam. Bãmb dõta maam ne sũ-puugri.

⁵Mam sũurã kiuusda m pʋgẽ, la kũum dabeem tara maam.

⁶Rabeem ne yɛɛsg yõkda maam, la pelen-yɩk tara maam.

⁷Mam yeelame yaa: «Mam sã n dag n tarẽ pɩgs wa walle, mam dag n na n yɩkẽ lame n bao zĩiga.»

⁸Sɩdã, mam dag n na n zoeẽ lame n zãag zĩiga, mam dag n na n kẽngẽ lame n tɩ zĩnd we-raoogẽ wã.

⁹Mam dag n na n zoeẽ-la tao-tao n tɩ paam soondg zĩiga, n põs saag sob-kẽeng ne sob-fugdga.

¹⁰Sẽn-Ka-Saabo, sãam-y b saagrã, la y kɩt tɩ b ra yɩ noor a yembr ye! Bala, mam neeme tɩ tẽngã pida ne wẽng la zaba.

¹¹Bãmb kẽnda tẽngã lalg zug n gilgd-a wĩndg ne yʋngo, Wẽngã ne tʋʋm-beedã bee tẽngã pʋga.

¹²Tẽngã pʋg pida ne sãoongo, zĩ-sõsdsã fãa pida ne nen-keglem la zãmbo.

¹³Bala, sã n dag n yaẽ mam bɛ n paoogd maam, mam dag n ka na n yeelẽ tɩ bũmb ye. Sã n dag n yaẽ ned ning sẽn kis-a maamã n zabd ne maam, m dag n na solgẽ t'a ka yãnd-m ye.

¹⁴La yaa fo sẽn yaa mam meng neda, ne m sɩd soaba, la m mitingã!

¹⁵Tõnd dag n nooma ne taaba, la d dag n tũud neb kʋʋngã n kẽnd Wẽnnaam doogẽ wã!

¹⁶Bɩ kũum ling-ba, tɩ b sig kɩɩm-kulg vɩɩse! Bala, bãmb sũyã pida ne wẽnem, wẽnemã bee bãmb sʋka.

¹⁷Mam kelemd n boonda Wẽnnaam, Sẽn-Ka-Saab na n fãaga maam.

¹⁸Zaabr la yibeoogo, ne wĩndga, mam wẽeda siri la m sidgdẽ, la bãmb wʋma mam koɛɛgã.

¹⁹Sẽn-Ka-Saab fãaga maam n kõ-m vɩ-bãane. Bãmb fãaga maam ne bɛɛbã sẽn yi wʋsg n na n zab ne maamã.

²⁰Wẽnnaam ning sẽn zao b geerã hal kʋdem-wẽndẽ wã na n wʋmame n ning-b yãnde. Bala, bãmb yaa neb sẽn ka tekde, la b ka zoet Wẽnnaam ye.

²¹Bɛyã zabda ne neb nins sẽn dag n tar zems-n-taar ne yẽnda wã. Yẽnda sãamda kaool ning a sẽn dag n maanã.

²²Yẽnda no-goamã yaa wa bĩis-kaam, t'a sũurã yaool n pid ne zabr datem. Yẽnda goamã bʋgsame n yɩɩd kaam, la b yaool n yaa wa zabr sʋʋg sẽn wõoge.

²³Bas f yell ne Sẽn-Ka-Saabo, la bãmb na n kõo foom bũmb ning f date. Bãmb kõn tol n bas nin-tɩrg t'a miim ye.

²⁴La yãmb a Wẽnnaam na n kɩtame tɩ sẽn daagd-b zɩɩmã ne zãmb dãmbã sig yaoogẽ, n ka ta b rasmã sõor pʋɩ-sʋk ye. La maam, mam teega yãmba.