Read SEBR SÕNGO, 1998 Yɩɩn‑sõamyã 65 Bible Online

Yɩɩn‑sõamyã 65 - SEBR SÕNGO, 1998 bible

Yɩɩn‑sõamyã 65

¹A Davɩɩd yɩɩlle, yɩɩlã naab yĩnga.

²Wẽnnaam sẽn be Sɩyõ, yãmb zemsa ne pẽgre, tõnd na n pidsa d sẽn pʋlem yãmbã.

³Yãmb sẽn kelgd pʋʋsgã yĩnga, ninsaalbã fãa na n waa yãmb nengẽ!

⁴Kongrã pãng yɩɩda maam, la yãmb na n kõo tõnd sugr d beegrã yĩnga.

⁵Bark bee ned ning yãmb sẽn yãk t'a kolg yãmba, la a pa yãmb doogã samandẽ wã zugu! Yãmb doogã bõn-neebã taa tõnd daabo, yãmb doogã sẽn welg toorã taa tõnd daabo.

⁶Wẽnnaam sẽn yaa tõnd fãagda, yãmb maana tʋʋm-yɛɛsds ne tɩrlem n leok tõndo. Dũniyã kɩremsã fãa nebã, ne ko-kãsemsã teega yãmba.

⁷Yãmb vigla tãmsã ne y pãngã, yãmb sɩd tara pãng tɩ seke.

⁸Yãmb n kɩtd tɩ ko-kãsemsã bas guglungu, n kɩtdẽ tɩ b ko-wĩisã bas bʋrgo, la y kɩtdẽ tɩ nebã bas nokoɛɛma.

⁹Yãmb bõn-bãnã kẽesa dũniyã gill fãa nebã rabeem. Yãmb kɩtame tɩ yaang ne nin-taoor nebã kaas ne sũ-noogo.

¹⁰Yãmb geta tẽn-gãongã yelle, n kõt-a koom wʋsgo, yãmb kõt-a-la arzegs tɩ seke. Wẽnnaam ko-soayã pida ne koom. Yãmb segenda bõn-kãng bõn-koaadl yĩnga.

¹¹Yãmb zãgsda a gudã koom, n kɩtdẽ t'a kunkubã saremdẽ, n kɩtdẽ tɩ saag niid n bʋkd tẽngã, n ningd a bõn-koaadlã barka.

¹²Yãmb kɩtdame tɩ yʋʋmdã baas neere, yãmb sẽn pɩʋʋgẽ fãa, yaa naar bala.

¹³Yamd pukda we-raoogã pʋga, tɩ sũ-noog kaasg gũbg tãmsã.

¹⁴Rũm-bãoonegã pida yamd zĩisẽ, la tẽn-nabdrã pida ne koodo, tɩ lebg sũ-noog kaasg ne yɩɩla.