Read SEBR SÕNGO, 1998 Yɩɩn‑sõamyã 83 Bible Online

Yɩɩn‑sõamyã 83 - SEBR SÕNGO, 1998 bible

Yɩɩn‑sõamyã 83

¹A Azaf yɩɩlle.

²Mam Wẽnnaam, ra sĩnd-y y noor ye! Da-y yẽd-y y tʋb ye, mam Wẽnnaam, ra-y zĩnd-y sɩddd... n ka maan bũmb ye!

³Bala, yãmb bɛɛbã guglumdame, neb nins sẽn kis-b yãmbã zẽkda b zutu.

⁴Bãmb soos n saagda sɩlem saagr y nebã yĩnga. Bãmb seta ne taab n dat n maan y sẽn kogend-b rãmbã wẽnga.

⁵Bãmb gomda ne taab n yetẽ: «Wa-y tɩ d kɩt tɩ b menem bu-zẽmsã sʋka, tɩ b ra leb n tẽeg Israyɛll yʋʋrã yell ye!»

⁶Bãmb seta ne taaba, n lebg yam a yembre. Bãmb maanda kaool n dat n zab ne yãmba.

⁷Yaa Edom nebã ne Ismayɛll buudã, la Moaab nebã la Hagaar yagensã.

⁸Geball nebã, Amo-rãmbã, ne Amalɛk nebã, la Filistẽ-dãmbã ne Tɩɩr tẽng nebã.

⁹Asiiri nebã me tɩ naaga bãmba, n na n sõng a Lot yagensã.

¹⁰Maan-y-b wa yãmb sẽn dag n maan Madiyã buudã ne a Sizera la a Yabẽ Kisõ ko-soogẽ wã.

¹¹B sãama bãmb Eyin-Door tẽngã, bãmb lebga birg tẽn-gãongã yĩnga.

¹²Maan-y-b nin-kãsemsã wa y sẽn maan a Orɛɛb ne a Zeebã, la y maan b na-biisã wa y sẽn maan a Zeba ne a Salmuna wã.

¹³Bãmb dag n gomdame n yetẽ: «D kẽng n tɩ reeg zĩis nins sẽn yaa Wẽnnaam dẽndã n sooge!»

¹⁴Mam Wẽnnaam, kɩt-y tɩ b lebg wa yõng-tabdo, la wa ka-fɩɩb sobg sẽn dɩkde.

¹⁵Kɩt-y tɩ b lebg wa bugum sẽn dɩt kãgre, wa bugum sẽn dɩt tãmse.

¹⁶Dẽ wã, kell-y n pʋgl-y-b ne yãmb sob-raoogo, kɩt-y tɩ yãmb sob-kẽengã kẽes-b rabeem!

¹⁷Kɩt-y tɩ yãnd yõk-b tɩ b wẽnemd n bao yãmb a Sẽn-Ka-Saabo!

¹⁸Bɩ yãnd ne rabeem yõk-b wakat fãa, bɩ yãnd yõk-b tɩ b sãame!

¹⁹Dẽ, b na n bãngame tɩ yãmb y yembr bal yʋʋr la Sẽn-Ka-Saabo, n yaa Sẽn-Ka-To sẽn so dũniyã gilli.