Read SEBR SÕNGO, 1998 Yɩɩn‑sõamyã 90 Bible Online

Yɩɩn‑sõamyã 90 - SEBR SÕNGO, 1998 bible

Yɩɩn‑sõamyã 90

¹Wẽnnaam dao a Moyiis pʋʋsgo. Zu-soaba, yãmb n yɩ tõnd zĩ-soalgdg zamaan woo zamaane.

²Sẽn deng tãmsã sẽn na n zĩndi, la sẽn deng yãmb sẽn na n naan tẽn-gãongã ne dũniyã, yãmb dag n sɩng n yaa Wẽnnaam zamaan woo zamaane.

³Yãmb n tõe n kɩt tɩ ninsaal leb tẽng tomẽ, la yãmb yetame: «Ãdem yagense, lebg-y n leb-y-yã!»

⁴Bala, yãmb nifẽ, yʋʋm tusr yaa waa zaamẽ daarã sẽn loogã, la yaa wa yʋng sẽn kẽed tɩ beoog vẽege.

⁵Yãmb dɩkd-b lame n loogdẽ, bãmb wẽnda ned sẽn gũs wakat bilf n neke, la yibeoogo, a loogda wa moog sẽn kʋɩtã.

⁶Yibeoogo, a tobdame n ningd puudu, la zaabre, a zelgdame n kʋɩ.

⁷Yãmb sũ-yikrã rɩta tõndo, yãmb sũ-puugrã kõta tõnd pelen-yɩka.

⁸Yãmb yɛdgda tõnd yel-wẽnã y taoore. Tõnd yel-solgdɩ wã yaa vẽenes yãmb taoore.

⁹Tõnd dasmã loogda yãmb sũ-puugrã yĩnga. Tõnd yʋʋmã loogda wa sir wẽebo.

¹⁰Tõnd yʋʋmã sõor ka yɩɩd pis-yopoe ye. La yĩns keelem sã n beẽ, a tata pis-nii. La ne rẽ fãa, ket n yaa namsg la nimbãaneg bala. Bala, vɩɩmã loogda tao-tao. La tõnd na n loogame.

¹¹Ãnda n tõe n bãng yãmb sũ-yikrã pãng sẽn ta zĩig ninga, la y sũ-kãbrã sẽn kɩt tɩ b zoet yãmbã?

¹²Dẽ wã, zãms-y tõnd tɩ d sõd d rasmã neere, tɩ tõnd tõe n paam yam.

¹³Sẽn-Ka-Saabo, lebg-y n wa-y-yã! Yãmb na n leb n taa dabʋre? Bɩ y zoe y tʋmtʋmdbã nimbãanega!

¹⁴Kɩt-y tɩ tõnd tɩg ne yãmb nonglmã yibeoog fãa. Woto, tõnd na n kaasa ne sũ-noog d vɩɩmã tɛka.

¹⁵Bɩ y kõ tõnd sũ-noog sẽn zemsd rasem nins yãmb sẽn dag n sɩbg tõndã, la wa sẽn zemsd yʋʋm nins tõnd sẽn yã toogã.

¹⁶Kɩt-y tɩ tõnd sẽn yaa yãmb tʋmtʋmdbã yã yãmb tʋʋmã, la y kɩt tɩ y ziirã puk d yagensã zutu!

¹⁷Bɩ tõnd Zu-soab a Wẽnnaam sõmblmã zĩnd tõnd zutu! Kɩt-y tɩ tõnd nus tʋʋmã paam pãnga. N-yẽe! Kɩt-y tɩ d nus tʋʋmã paam pãnga.