Read SEBR SÕNGO, 1998 Yɩɩn‑sõamyã 92 Bible Online

Yɩɩn‑sõamyã 92 - SEBR SÕNGO, 1998 bible

Yɩɩn‑sõamyã 92

¹Yɩɩlle. Yaa vʋʋsg daar yɩɩlle.

²Yaa sõama tɩ d pʋʋs Sẽn-Ka-Saab barka. Sẽn-Ka-To, zemsame tɩ d yɩɩl n pẽg yãmb yʋʋrã,

³tɩ d moon yãmb nonglmã yibeoog fãa, la tɩ d moon yãmb sɩdã yʋng fãa.

⁴D pẽg-b ne ruudg sẽn tar sus piiga la ne baeela, la pɛndg wẽebo.

⁵Sẽn-Ka-Saabo, yãmb sẽn maandã kõta maam sũ-noogo! Mam kaasda ne sũ-noog yãmb nus tʋʋmã yĩnga.

⁶Sẽn-Ka-Saabo, yãmb tʋʋmã yaa kãsemse, yãmb tagsdã yaa zulums wʋsgo.

⁷Yam-pa-sek soab ka mi baa fɩ ye, la yalem ka tar bãngr ye.

⁸Nin-wẽnsã sã n wa n tobd wa moodo, tɩ tʋʋm-wẽns maandbã yidgdẽ, yaa tɩ b na n sãama wakat fãa yĩnga.

⁹La yãmba, yãmb bee yĩngri, n yaa Sẽn-Ka-Saab wakat sẽn kõn sa yĩnga.

¹⁰Sẽn-Ka-Saabo, la sã n yaa ne yãmb bɛɛbã, bãmb na n sãama zãnga. La tʋʋm-wẽns maandbã fãa na n sãeegame.

¹¹Yãmb paas-m-la pãng wa we-naaf pãnga, b rɩka ka-paalg n sudg mam zugu.

¹²Mam nin nee m namsdbã, la m tʋb wʋmda sẽn zabd-b ne maam n dat n maan maam wẽngã rãamde.

¹³Nin-tɩrs tãooda wa koanga, bãmb bɩta wa Libã sɛɛdr tɩɩse.

¹⁴B sela bãmb wa tɩɩg Sẽn-Ka-Saab roogẽ wã. Bãmb ningda b puud tõnd Wẽnnaamã roog samandẽ.

¹⁵Bãmb kʋʋlame n ket n womd biisi, bãmb tara sũm la b tobda vã-paala.

¹⁶Bõn-kãens wilgdame tɩ Sẽn-Ka-Saab yaa tɩrga. Bãmb yaa mam pĩiga, la bũmb sẽn ka zems ka be bãmb pʋgẽ ye.