Read SEBR SÕNGO, 1998 Yɩɩn‑sõamyã 94 Bible Online

Yɩɩn‑sõamyã 94 - SEBR SÕNGO, 1998 bible

Yɩɩn‑sõamyã 94

¹Mam Wẽnnaam sẽn dokd sũuri, Sẽn-Ka-Saab sẽn yaa Wẽnnaam sẽn dokd sũuri, puk-y y menga.

²Dũni bʋ-kaooda, yik-y-yã! Keo-y wuk-m-mens rãmbã wa sẽn zems b tʋʋmã!

³Sẽn-Ka-Saabo, na n taa dabʋre! Nin-wẽnsã na n maana sũ-noog n ta dabʋre?

⁴Bãmb gomda wuk-m-men-goamã. Tʋʋm-wẽns maandbã fãa yẽsda ne taaba.

⁵Sẽn-Ka-Saabo, b sãamda yãmb nebã, b namsda neb nins sẽn yaa yãmb dẽndã.

⁶Bãmb kʋʋda pʋg-kõor ne sãana, bãmb yãgsda kɩɩbs yõya.

⁷Bãmb yetame: Sẽn-Ka-Saab ka ne bũmb ye. A Zakoob Wẽnnaamã ka mi ye!

⁸Yalemb sẽn yɩɩd fãa, gũus-y yã! Ka-yam dãmbã, yãmb na n paama yam dabʋre?

⁹Soab ning sẽn maan-a tʋbã ka wʋmd la? Sẽn maan-a ninã ka ne la?

¹⁰Sẽn demsd-a bu-zẽmsã ka tõe n keoog sɩda? Ka bãmb n zãmsd ninsaalb bãngr la?

¹¹Sẽn-Ka-Saab mii ninsaalb tagsgo! Ninsaalbã tagsg yaa zaalem!

¹²Sẽn-Ka-Saabo, yãmb sẽn demsd a soab paamda barka, yãmb zãmsd-a-la y tõodã,

¹³tɩ yel-pakr daare, bɩ a tõe n zĩnd ne bãane, hal tɩ b wa tuk nin-wẽng yaoogo!

¹⁴Bala, Sẽn-Ka-Saab ka basd b nebã ye, bãmb ka na n tol n bas neb nins sẽn yaa bãmb dẽndã ye.

¹⁵Bãmb na n lebs n kaoo bʋʋdã tɩrga, la nin-tɩrsã na n sak n deegame.

¹⁶Ãnd n na n yik n sõng maam n zab ne tʋʋm-wẽns maandbã? Ãnd n na n yik n yals n sõng-m n zab ne nin-wẽnsã?

¹⁷Sẽn-Ka-Saab sã n dag n ka sõngẽ maam, woto tɩ mam sigẽ-la zĩig sẽn yaa sɩddd... pʋgẽ.

¹⁸Mam sã n yeel tɩ mam nao salsdame, Sẽn-Ka-Saabo, yãmb nonglmã tebendeda maam.

¹⁹Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.

²⁰Rẽ yĩnga, yãmb na n naaga bʋ-kaood-wẽnsã, n yiis noor sẽn paasd neb toogo?

²¹Bãmb tigimda taab n dat n sãam nin-tɩrg vɩɩm, la b raag neb sẽn ka tar yell zɩɩm.

²²La Sẽn-Ka-Saab yaa mam pãng zĩiga, bãmb yaa pĩig kugr sẽn yaa m zĩ-soalgdga.

²³Sẽn-Ka-Saab na n kɩtame tɩ b tʋʋm-wẽnsã leb-ba, b na n kɩtame tɩ b pʋ-toogã wẽneg n dɩ-ba. Sẽn-Ka-Saab sẽn yaa tõnd Wẽnnaamã na n kɩtame tɩ b noyã mume.