Read SEBR SÕNGO, 1998 Yel‑bũna 11 Bible Online

Yel‑bũna 11 - SEBR SÕNGO, 1998 bible

Yel‑bũna 11

¹Zãmb zɩslem makdg yaa yel-beed Sẽn-Ka-Saab nifẽ. La b sũur nooma ne pʋ-peelem zɩslem makdga.

²Wuk-m-meng sã n wa, yaa paoogr n pʋgda, la sik-m-meng soab tara yam.

³Nin-tɩrg burkĩndlim n tɛt-a, la sɩlem soab sɩlmã n wãad-a.

⁴Arzɛk ka tõe n sõng ned sũ-puugrã daar ye, la tɩrlem fãagda ned ne kũum.

⁵Burkĩn tɩrlem n manegd a soayã, la nin-wẽng wẽnem n lubd-a.

⁶Nin-tɩrs tɩrlem n fãagd-ba, la zãmb dãmbã yão-beedã n yõkd-b wa bẽdgo.

⁷Nin-wẽng sã n ki, bũmb ning a sẽn dag n tẽedã me sɛtame, la tẽeb ning a sẽn dag n tar ne a arzegsã me sãamdame.

⁸Nin-tɩrg paamda yolsg ne yel-pakre, la nin-wẽng n let yẽnda zĩigẽ n deeg toogo.

⁹Sẽn ka mi-a Wẽnd wãada a to ne a noor goamã, la nin-tɩrg bãngr n fãagd-a.

¹⁰Nin-tɩrs sã n tar sũ-noogo, tẽngã neb fãa naagd n kɩdemdame. Nin-wẽns sã n sãamdẽ, tẽngã neb fãa kaasda ne sũ-noogo.

¹¹Nin-tɩrs bark yĩng kɩtdame tɩ tẽng lebgd kãsenga, la nin-wẽns no-goam wãada tẽnga.

¹²Sẽn paoogd-a a to yaa yam-kaalg soaba, la sẽn tar-a yam sĩndidame.

¹³Tẽn-kãn-ned pugsda yɛla, la sɩd soab luta yɛla.

¹⁴Tẽng sã n ka zã ne yam, a nebã sãamdame, la sagendb sã n yaa wʋsgo, tõogr beeme.

¹⁵Ned sã n dɩk sard ne sãana, a kõ a meng yelle. La sẽn zãgs-a sard dɩkr na n vɩɩmda ne bãane.

¹⁶Pʋg-sõng paamda ziiri, la pãens rãmbã paamda arzegse.

¹⁷Nin-sõng maanda a meng neere, la nin-toaag maanda a meng wẽnga.

¹⁸Nin-wẽng ka mi t'a ka na n dɩ a tʋʋmã yõod ye. La sẽn tʋmd-a tɩrlem tʋʋm na n paama keoore.

¹⁹N-yẽe! Tɩrlem maaneg rabda vɩɩm zĩigẽ, la wẽng maaneg rabda kũum zĩigẽ.

²⁰Sẽn-Ka-Saab kisa tʋʋm-kɛg rãmbã, la b nonga sẽn kẽnd-a ne burkĩndi.

²¹Nin-wẽng ka tõe n ka paam sɩbgr ye, la nin-tɩrsã yagens na n paama fãagre.

²²Pʋg-neer sẽn ka yam, wẽnda wa sãnem nugbĩng sẽn be kurkur yõorẽ.

²³Nin-tɩrs sẽn dat yaa neer bala, la nin-wẽns sẽn gũud yaa sũ-puugr bala.

²⁴Nina kõta wʋsg t'a paoong paasdẽ, tɩ nina bĩngd n ka kõtẽ t'a paoong sɛtẽ.

²⁵Kõat na n paamame halɩ tɩ seke, la sẽn kõt-a koom me na n paama koom n yũ n tɩge.

²⁶Ned sã n bĩngd bɩle n ka rat n yiisi, nebã kãabd-a-la wẽnga, la sẽn yiisd-a bɩle n koosdẽ paamda nebã barka.

²⁷Sẽn baood-a n maan neer baooda barka, la ned sã n baood n maan wẽnga, wẽng n na n paam-a.

²⁸Sẽn teeg-a arzɛk na n lʋɩɩme, la nin-tɩrg tɩlgda wa tɩɩg sẽn tobde.

²⁹Ned sã n kẽesd zũnglg a meng zakẽ, a na n wa zĩnda zaalem, la yalem na n lebga yam soab yamba.

³⁰Nin-tɩrg biis yaa wa vɩɩm tɩɩga, la yam soab paamda nebã.

³¹Nin-tɩrg sã n paamd a yaood tẽng zug ka, nin-wẽng ne yel-wẽn-maand me kõ paam yaood n yɩɩd sɩda.