Read SEBR SÕNGO, 1998 Yel‑bũna 13 Bible Online

Yel‑bũna 13 - SEBR SÕNGO, 1998 bible

Yel‑bũna 13

¹Biig sẽn tar yam deegda a ba remsgo, la nin-paoogd ka reegd keoogr ye.

²Ned noor goam n kõt-a bõn-sõama, la nin-wẽng sẽn dat fãa yaa wẽng maaneg bala.

³Sẽn gũusd-a meng ne a no-goam kogenda a vɩɩm, la sẽn gomd-a wʋsg wãada a menga.

⁴Kʋɩɩm tara ratem sẽn ka tõe n pidsi, la sẽn tʋmd-a paamda a sẽn date.

⁵Nin-tɩrg kisa zĩrẽ-beedo, la nin-wẽng wata ne yãnd la paoogre.

⁶Tɩrlem gũuda sẽn kẽnd-a ne burkĩndlim, la yel-wẽnã maaneg sãamda nin-wẽnga.

⁷Nina maanda a meng wa arzɛk soaba, n yaool n ka tar baa fɩ ye, tɩ nina maand a meng wa naong soaba, n yaool n tar arzegs wʋsgo.

⁸Ninsaal sẽn tõe n tall bũmb ning n yao n fãag a yõor yaa a arzɛka, la b ka na n bao tɩ yãk naong soab yõor ye.

⁹Nin-tɩrsã vẽenem yãgdame, la nin-wẽnsã fɩtl na n kiime.

¹⁰Tɩtaam ka wat ne bũmb tɩ ka zab ye, la sẽn kelgd-a sagls tara yam.

¹¹Arzɛk sẽn paam wakat-yɛng menemda tao-tao, la sẽn paamd-a arzɛk bilf-bilf fɩɩgda a paoongo.

¹²Tẽeb sã n viig daare, a wata ne sũ-sãanga, la ratem sẽn paam pidsg yaa wa vɩɩm tɩɩga.

¹³Sẽn ka reegd-a saglg na n paama a yaoodo, la sẽn sakd-a noor na n paama keoore.

¹⁴Yam soab zãmsg yaa vɩɩm bulga, n tõe n sõng ned t'a gil kũum bẽdgo.

¹⁵Ned sã n mi sẽn toge, nebã fãa nong-a lame, la zãmb soab ka tõe n maan bũmb tɩ ta ned yam ye.

¹⁶Gũus-m-meng soab tʋmda ne bãngre, la yalem wilgda a yalemd bala.

¹⁷Koe-toagsd sẽn yaa nin-wẽng wata ne toogo, la nin-tɩrg koɛɛg togsg wata ne laafɩ.

¹⁸Ned sã n ka sakd remsgo, naong la paoogr n na n sek-a, la sẽn deegd-a keoogr paamda waoogre.

¹⁹Ned sã n paam a sẽn date, a sũur yaa noogo, la wẽng basg yaa yel-beed ne yalma.

²⁰Ned sã n tũud yam soaba, a paamda yam. La ned sã n tũud yalma, yɛl n paamd-a.

²¹Toog pʋgda yel-wẽn-maandbã, la naar yaa nin-tɩrsã keoore.

²²Nin-sõng basda arzegs a yagens yĩnga, la yel-wẽn-maandbã arzegs bĩnga nin-tɩrg yĩnga.

²³Naong soab kooda a pʋʋg n paamd rɩɩb tɩ sekd-a, la neb kẽer kiida tɩrlem kaalem yĩnga.

²⁴Ned sã n ka rat n wẽ a biiga, a kis-a lame, la sẽn nong-a a biig remsd-a lame.

²⁵Nin-tɩrg rɩtame n tɩgda, la nin-wẽnsã pʋs yãbda kom bala.