Read SEBR SÕNGO, 1998 Yel‑bũna 14 Bible Online

Yel‑bũna 14 - SEBR SÕNGO, 1998 bible

Yel‑bũna 14

¹Pʋg-yam n met a yiri, la pʋg-yalem meng nus n wãad a zaka.

²Sẽn kẽnd-a tɩrlem pʋg zoeta Sẽn-Ka-Saabo, la yel-kɛg-maand paoogda bãmba.

³Wuk-m-meng bee yalem no-goam pʋgẽ, la yam dãmbã no-goam n gũud-ba.

⁴Ned sã n ka tar nag-koodse, a rũms rɩɩb koglg yaa vɩʋʋgo. La nag-koods sã n tar pãnga, bɩle yaa wʋsgo.

⁵Kaset sɩd soab ka yagd zĩrẽ ye, la kaset zĩrẽ soab togsda zĩrẽ-beedo.

⁶Nin-paoogd baooda yam n ka paamdẽ ye, la yam soab paamda bãngr tao-tao.

⁷Zãag f meng ne yalma, bala, f miime t'a goamã ka tar yõod ye.

⁸Yam soab sẽn maand gũusg ne a yel-manesmã n wilgd t'a tara yam, la yalembã yalemdã n tudgd-ba.

⁹Yalembã toog ka be ne sugr kosg ye, la bark bee nin-tɩrsã sʋka.

¹⁰Sũ-toog sã n tar neda, yẽnda a yembr bal n mi. A sũur sã n noomẽ me, a ka tõe n yãk n kõ ned a to ye.

¹¹Nin-wẽng yir na n sãamame, la nin-sõng roog na n yalgame.

¹² Ned tõe n tagsdame t'a rɩka so-sõngo, n mik yaool n yaa sor sẽn dabd ne-a kũum zĩigẽ.

¹³Ned tõe n laadame, n yaool n be toog pʋga, la a sũ-noogã tõe n wa lebga sũ-pa-noaanga.

¹⁴Tʋʋm-wẽns soab tʋʋm n lebd-a, la nin-sõng na n dɩ a tʋʋmd yõodo.

¹⁵Zɩt tẽeda bũmb ning fãa a sẽn wʋme, la yam soab maanda gũusg ne a yel-manesmã fãa.

¹⁶Yam soab zoeta wẽng n ginda, la yalem wukda a meng n tẽed tɩ bũmb kõn maan-a ye.

¹⁷Sũ-tʋʋn-ned maanda yalem-tʋʋma, la ned sã n tar tags-wẽnse, a maandame tɩ b kisg-a.

¹⁸Zɩtbã pʋɩɩr yaa yalemdo, la bãngr yaa yam soab maanfo.

¹⁹Nin-wẽnsã na n wõgemda nin-sõamyã wã taoore, la wẽnem dãmbã na n wõgemda tẽngã rignoyẽ.

²⁰Baa naong soab zo-rãmb kis-a lame, la arzɛk soab zo-rãmb yaa wʋsgo.

²¹Ned sẽn paoogd a to maanda yel-wẽna, la bark bee sẽn zoet-a naong rãmb nimbãaneg zugu.

²²Neb nins sẽn baood n maan wẽngã na n menemame, la sẽn maand-b neerã paamda nonglem la sɩda.

²³Tʋʋmd buud fãa sẽn tʋm ne wɩsg-m-meng tara yõodo, la gom-toog wata ne naong bala.

²⁴Yam soab arzɛk n yaa a maanfo, la yalem na n kell n pa a yalemdã pʋgẽ.

²⁵Kaset sɩd soab fãagda neb vɩɩm, la zĩrẽ-be-ned tudgda a taaba.

²⁶Ned ning sẽn zoet-a Sẽn-Ka-Saab pɛlg yaa kãenkãe, la a kambã na n paama zĩ-soalgdga.

²⁷Sẽn-Ka-Saab zoees kõta vɩɩm, la a kɩtdame tɩ ned gil kũum bẽdgo.

²⁸Tẽng neb sã n waoogẽ, rĩm tara waoogre, la neb sã n kaẽ, rĩm naam sɛtame.

²⁹Sũ-maasem soab tara yam wʋsgo, la sũ-tʋʋn-ned wilgda a yalemdo.

³⁰Yam-gãneg kõta yĩns vɩɩm, la sũ-kiir yaa wa bãag sẽn dɩt kõaba.

³¹Sẽn namsd-a naong soab tʋʋsda a naandã, la sẽn maand-a nimbãan-ned neer waoogda a naandã.

³²Nin-wẽng tʋʋm n lubd-a, la baa nin-tɩrg kũum wakate, a ket n tara tẽebo.

³³Yam bee bãngd sũurẽ, la b ka tõe n yãnd-a yalembã sʋk ye.

³⁴Tɩrlem n zẽkd tẽnga, la yel-wẽnã yaa nebã yãnde.

³⁵Rĩm nonga tʋmtʋmd sẽn tar gũus-m-menga, la a sũur puuda ne sẽn wat-a ne yãnde.