Read SEBR SÕNGO, 1998 Yel‑bũna 16 Bible Online

Yel‑bũna 16 - SEBR SÕNGO, 1998 bible

Yel‑bũna 16

¹Ninsaal saagdame, la pidsgã bee ne Sẽn-Ka-Saabo.

²Ninsaal tõe n tagsdame t'a yel-manesmã yaa sõama, la yaa Sẽn-Ka-Saab bal n feesd ninsaalbã sũyã.

³Rɩk f yɛlã n bas ne Sẽn-Ka-Saabo, la f sẽn saagdã fãa na paam pidsgu.

⁴Sẽn-Ka-Saab ka maan bũmb ba a yembr zaalem yĩng ye, la b naana nin-wẽng me toog daar yĩnga.

⁵Sẽn-Ka-Saab kisa tɩta-neda, la b kõn bas-a n ka sɩbg-a ye.

⁶Nonglem ne sɩd yẽesda yel-wẽna, la Sẽn-Ka-Saab zoees zãagda ned ne wẽnga.

⁷Ned yel-manesem sã n tat Sẽn-Ka-Saab yam, b kɩtdame tɩ zems-n-taar zĩnd yẽ ne a bɛɛbã sʋka.

⁸F sẽn na n maan tɩrlem n paam paoong bilfu, n são f sẽn na n maan zãmb n paam paoong wʋsgo.

⁹Ninsaal tagsda a sẽn na tũ sor ninga, la yaa Sẽn-Ka-Saab n na n kɩt t'a tõoge.

¹⁰Rĩm gomda wa a sẽn deeg noor Wẽnnaam nengẽ, la bʋʋd zĩigẽ, yẽnda bʋʋda sɩda.

¹¹Zɩslem makdg ning sẽn zemsã yaa Sẽn-Ka-Saab n so. Zɩslem makds nins fãa sẽn be yolgã pʋgẽ wã yaa bãmb nus tʋʋma.

¹²Tʋʋm-wẽns maaneg yaa yel-beed rĩm-dãmbã nifẽ. Bala, yaa tɩrlem n paasd bãmb naamã pãnga.

¹³Rĩm nonga ned sẽn gomd ne pʋ-peelem, la b nonga ned sẽn gomd tɩrlem goamã.

¹⁴Rĩm sũ-puugr tõe n waa ne kũum, la yam soab n tõe n sigs a sũ-puugrã.

¹⁵Rĩm noor yõgeng kõta vɩɩm, la b nonglem yaa wa sigr saaga.

¹⁶F sẽn na n paam yam n são f sẽn na n paam sãnem halaale, la f sẽn na n paam bãngr n são f sẽn na n paam wanzuri.

¹⁷Nin-tɩrs sor ginda wẽnga, la sẽn gũusd-a ne a yel-manesem kogenda a vɩɩm.

¹⁸Tɩtaam n dengd taoore, tɩ sãoong pʋgle, la wuk-m-meng n lʋɩt taoore, tɩ lʋɩɩs pʋgle.

¹⁹Fo sẽn na n sik f meng n naag naong-rãmb n são, fo sẽn na n naag wuk-m-mens-rãmba, n pʋɩ b paoongo.

²⁰Sẽn tagsd-a bũmb yell neer paamda sũ-noogo, la sẽn teeg-a Sẽn-Ka-Saab tara barka.

²¹Ned sã n yaa yam soaba, b boond-a lame tɩ bãngda, la gomd sẽn gomd ne maag-m-meng sakda kelgre.

²²Yam-sõng yaa vɩɩm bulg yam dãmbã yĩnga, la yalembã yalemdã n yaa b sɩbgre.

²³Yam soab sẽn tagsd n yaool n gomã yĩnga, n kɩtd tɩ b tẽed a goamã.

²⁴Gom-nood yaa wa sɩɩdo, a nooma noorẽ, a kõta yĩns laafɩ.

²⁵ Sor tõeeme n yaa tɩrg ned nifẽ, t'a baoosg yaool n yaa kũum.

²⁶Sẽn tʋmd-a tʋmda a pʋg yĩnga, bala, a pʋgã rata rɩɩbo.

²⁷Nin-yaalg segendame n na n maan wẽnga, la yẽnda noorã goam yaa wa bug-vɩlenga.

²⁸Nin-yoog wata ne zaba, la tẽn-kãn-ned welgda zo-rãmb ne taaba.

²⁹Nin-wẽng belgda a to, n kɩt t'a maan sẽn ka neere.

³⁰Sẽn mumd-a a nin n saagd wẽng la a vamd a noor zoe n maana wẽnga.

³¹Zoob-peend yaa ziir maanfo, la yaa tɩrlem sor zug la b paamd-a.

³²Sũ-maasem soab n são gãndaoogo, la sẽn tõe a meng n são sẽn zab-a n deeg tẽnga.

³³Neb tõe n zĩndame n maan poeere, la yaa Sẽn-Ka-Saab n so b yam-yakrã fãa.