Read SEBR SÕNGO, 1998 Yel‑bũna 17 Bible Online

Yel‑bũna 17 - SEBR SÕNGO, 1998 bible

Yel‑bũna 17

¹F sẽn na n wãb bur-gɩrg n yaool n zĩ ne bãan n são zak sẽn pid ne nemdo, tɩ yaool n yaa zaba.

²Tʋmtʋmd sẽn tar yam, na n sooga biig sẽn ningd a ba yãnde, la yẽnda na n lagma kambã n paam dogem pʋɩɩre.

³B zugda wanzuri ne sãnem n yɩlg-b boaagẽ, la yaa Sẽn-Ka-Saab n makd ninsaalbã sũyã.

⁴Ned sã n maand wẽnga, a nonga gom-wẽns kelgre, la zĩrẽ-be-ned kelgda zĩrẽ goamã.

⁵Sẽn yaand-a nimbãan-ned paoogda a naandã, la ned sã n laad toog sẽn paam ned yĩnga, a na n paama sɩbgre.

⁶Nin-kẽemb yagens n yaa b zu-zẽkre, la ba-rãmbã n yaa b kambã waoogre.

⁷Gom-minim ka tog ne yalma, la zĩrẽ-beed me ka tog ne naab ye.

⁸Kũun tara yõod sẽn kõt-bã nifẽ. B sẽn kẽng zĩig ning fãa b paamda tõogre.

⁹Sẽn lut-a beegr baooda nonglem, la zab-tẽes welgda zo-rãmb ne taaba.

¹⁰Keoog-vuk kẽeda yam soaba, n yɩɩd f sẽn na n wẽ yalem naoor koabga.

¹¹Nin-wẽng ka baood bũmb tɩ ka kɩɩsg ye. Rẽ kɩtame tɩ b na n tʋm nin-toaag a nengẽ.

¹²Fo sẽn segd rigd-n-yĩidg b sẽn dɩk a kamba, n são f sẽn na n seg nabd a yalemdã pʋga.

¹³B sã n maan ned neer t'a lebs wẽnga, wẽng kõn zãag ne nin-kãng soab yir ye.

¹⁴Fo sã n sɩng zabre, yaa wa f sẽn kãsg ko-koaka. Reng n loog tɩ zabrã ra wa sɩng ye.

¹⁵Ned sẽn kõt nin-wẽng bʋʋm, ne ned sẽn mongd nin-tɩrg bʋʋm yaa yel-beed Sẽn-Ka-Saab nifẽ.

¹⁶Ligd sẽn be yalem nugẽ yõod yaa bõe? Yaa sẽn na n da yam bɩ? La yẽnda zugã sẽn ka wã!

¹⁷F zoa nong-f-la wakat fãa, la yel-pakr wakate, yaa f ba-biig n sõngd-fo.

¹⁸Yam-kaalg soab n wẽend a to yĩnga, la a rɩkd sard ned a to yĩnga.

¹⁹Sẽn nong-a zab nonga yel-wẽna, la sẽn wukd-a a meng baooda sãoongo.

²⁰Zãmb soab ka tõe n paam sũ-noog ye, la sẽn gomd-a gom-yood na n paama toogo.

²¹Sẽn dog-a yalem, tara sũ-sãang bala, la bi-nabd ba ka tõe n maan sũ-noog ye.

²²Sũ-noog wata ne yĩns laafɩ, la sũ-sãang kʋɩɩsda kõaba.

²³Nin-wẽng solgdame n deegd kũuni, sẽn na n yɩlẽ tɩ b ra bʋ bʋʋd tɩrg ye.

²⁴Yam pẽe ne nin-yẽesenga, la yalem bas n geta hal yɩɩga.

²⁵Bi-yalem sãamda a ba sũuri, la a kõt a ma sũ-toogo.

²⁶A ka sõama tɩ b yaoolg nin-tɩrg ye, la a ka zems tɩ b pãb ned sẽn zems waoogr ye.

²⁷Ned sẽn tõe a noor tara yam. Ned sẽn tõe a meng tara bãngre.

²⁸Baa yalem sã n sĩnd n ka gomda, b rɩkd-a-la wa yam soaba. La ned sẽn ka yaagd a noor tara bãngre.