Read SEBR SÕNGO, 1998 Yel‑bũna 19 Bible Online

Yel‑bũna 19 - SEBR SÕNGO, 1998 bible

Yel‑bũna 19

¹Naong soab sẽn vɩ ne burkĩndlim n são zĩrẽ-be-neda. Zĩrẽ-be-ned yaa yalma.

²Zɩɩlem ka sõma ned ba a yembr yĩng ye, la ned sã n yãgdẽ, a tudgdame.

³Yaa ninsaal yalemdã n wat ne a tudgri, la yaa ne Sẽn-Ka-Saab la yẽnda yikd a sũuri.

⁴Arzɛk kɩtdame tɩ ned zo-rãmb lebg wʋsgo, la naong soab zo-rãmb loogdame n bas-a.

⁵B ka na n bas kaset zĩrẽ soab taal ye. Sẽn yagd-a zĩrẽ ka na n põs sɩbgr ye.

⁶Neb wʋsg baooda nin-kãseng sõm, la kõat yaa neb fãa zoa.

⁷Naong soab saam-biis fãa kis-a lame, t'a zo-rãmb me zãagd n basd-a. A baood-b lame n na n gom ne, la a ka yãt-b ye.

⁸Sẽn baood-a bãngr nonga a menga, la sẽn talld-a bãngr neer paamda sũ-noogo.

⁹B ka na n bas kaset zĩrẽ soab taal ye, la sẽn yagd-a zĩrẽ na n menemame.

¹⁰Yalem ka tog ne naar ye, la sẽn yɩɩda, yamb me ka tog n soog na-biis ye.

¹¹Sẽn tar-a yam ka yikd a sũur tao-tao ye, a zu-zẽkrã yaa a sẽn basd b sẽn beeg yẽnda wã taalã.

¹²Rĩm sũ-yikr yaa wa gɩgemd kɛlenga, la a nonglem yaa wa meenem sẽn dʋʋgd mood zugu.

¹³Bi-yalem yaa a ba yel-pakre, la pag zabr yaa wa koom sẽn tosd n ka sɛtẽ ye.

¹⁴Ned tõe n kõ a biig zaka, la paoongo, la pag sẽn tar yam, yaa Sẽn-Ka-Saab kũuni.

¹⁵Kʋɩʋʋng kẽesda ned gõeem, la kom na n yõka sẽn ka nong-a tʋʋmde.

¹⁶Sẽn deegd-a noor gũud-a a vɩɩm, la sẽn ka gũusd-a ne a yel-manesem na n kiime.

¹⁷Sẽn sõngd-a nimbãan-ned pengda Sẽn-Ka-Saabo, la bãmb na n dola yẽnda.

¹⁸Rems f biig f sẽn ket n tõe n dems-a wakate, la f ra tʋlg a kũum ye.

¹⁹Sẽn yikd-a sũur segda ne sɩbgre. F sã n bas-a n ka sɩbge, a na n leb n paasa beoogo.

²⁰Kelg saglgo, la f sak remsgo, n tõog n paam yam.

²¹Ninsaal saagda bũmb wʋsgo, la yaa Sẽn-Ka-Saab raabã n na n pidsi.

²²B sẽn baood bũmb ning ninsaal nengẽ, yaa t'a maan pʋ-peelem. F sẽn na n yaa naong soaba, n são f sẽn na n yaa zĩrẽ-be-neda.

²³Sẽn-Ka-Saab zoees kõta yõ-woko, la a kɩtdame tɩ ned rɩ n tɩge, n kẽ n gãand tɩ yel-wẽng ka paam-a ye.

²⁴Kʋɩɩm tʋmda a nug laagẽ, la a ka leemsd bũmb ye.

²⁵F sã n wẽ nin-paoogda, yam-kaalg soab maanda gũusgu. Keoog bãngda, la yẽnda na n paama bãngr n paase.

²⁶Biig sẽn namsd a ba, la a rigd a ma, yaa biig sẽn wat ne yãnd la paoogre.

²⁷M biiga, fo sã n ka sak remsgo, f na n zãaga f meng ne bãngre.

²⁸Kaset soab sẽn yaa nin-yaalg toor ka be ne bʋ-kao-tɩrg ye. Nin-wẽnsã noy pida ne wẽng bala.

²⁹Nin-paoogd toga ne sɩbgre, la yalem poor toga ne pãbre.