Read SEBR SÕNGO, 1998 Yel‑bũna 20 Bible Online

Yel‑bũna 20 - SEBR SÕNGO, 1998 bible

Yel‑bũna 20

¹Reezẽ rãam yũub wata ne paoogr goamã, rã-toos yũub wata ne rãmbgo, la sẽn basd-a tɩ rãam soog-a ka na n tol n paam yam ye.

²Gɩgem-poll kɛleng sẽn kẽesd rabeem to-to wã, rĩm sũ-puugr me yaa a woto. Sẽn yikd-a rĩm sũur baooda kũum.

³Ninsaal waoogr yaa a sẽn na n zãag a meng ne zaba. La sẽn yaa-a yalem fãa baooda zaba.

⁴Waood yĩng kɩtdame tɩ kʋɩɩm zãgs koobo, la tigsg wakat sã n ta, yẽnda ka na n kẽeb bũmb ye.

⁵Ninsaal sũur pʋgẽ saagr wẽnda wa koom sẽn be zĩ-zulumsẽ. Sẽn tar-a bãngr n mi a sẽn na n toog-a to-to.

⁶Neb wʋsg yetame tɩ b yaa nin-sõamyã, la f sã n bao pʋ-peelem soab b sʋkã, f kõn yã ye.

⁷Nin-tɩrg sã n kẽnd ne burkĩndlim, a kamb tara sũ-noog a loogr poore.

⁸Rĩm sã n zĩ n kaood bʋʋdo, a feesdame n bãng sõama ne wẽng n bake.

⁹Ãnda n tõe n yeele: «Mam pʋg yaa pɛɛlga, la m yɩlga m meng ne m yel-wẽnã zãnga?»

¹⁰Sẽn-Ka-Saab sẽn kis n yɩɩd fãa, yaa zãmb zɩslem makdga, la zãmb poɛɛm magdga.

¹¹Yaa biig tʋʋmdẽ la b tõe n bãng a yel-manesmã sã n na n yɩɩ sõama la tɩrga.

¹²Tʋbr kelgdame tɩ nif getẽ, la bãmb b yiibã fãa yaa Sẽn-Ka-Saab n naane.

¹³Da nong gõeem n wa lebg naong soab ye. Puk f nini, tɩ f na n paam n dɩ n tɩgame.

¹⁴Raad yetame: «Yaa toogo! Yaa toogo!» La yẽnda sã n wa zãage, a maanda sũ-noog ne bũmb ning a sẽn da wã.

¹⁵Baa sãnem ne kĩndi sã n yaa wʋsgo, bũmb sẽn tar yõod n yɩɩd fãa yaa goam sẽn wat ne bãngre.

¹⁶Ned sã n dɩk sard ne foom ned a to yĩnga, bɩ f reeg a fuugu. La sã n yaa sãan yĩnga, bɩ f kɩt t'a gãneg bũmbu.

¹⁷Zãmb dɩɩb noomame, la a sã n wa kẽ noorẽ, a lebgda wa kuga.

¹⁸Saglg n sõngd ned t'a saagr pidi. Reng n bao yam-sõng n yaool n kẽng zabrẽ.

¹⁹Tẽn-kãn-ned pugsda yɛla, la ned sẽn gomd wʋsg toga ne zãagre.

²⁰Ned sã n kãab a ba ne a ma wẽnga, yẽnda fɩtlã na n kii lik pʋgẽ.

²¹Arzɛk sẽn paam n ka nams ka tõe n zĩnd bark ye.

²²Da yeel tɩ f na n maana wẽng n lebs wẽng ye. Teeg Sẽn-Ka-Saab tɩ b na n fãaga foom.

²³Sẽn-Ka-Saab kisa makdg sẽn magd ne wẽgbo. Zãmb makdg ka sõama ye.

²⁴Sẽn-Ka-Saab n wilgd ninsaal a sore. Ninsaal na n yɩ a wãn n bãng a sore?

²⁵Ned sã n pʋlem Sẽn-Ka-Saab bũmb n ka reng n tagse, yaa bẽdg la a bẽd a menga.

²⁶Rĩm sẽn tar yam feesdame n bãng nin-wẽnsã, n kɩt tɩ b sɩbg-ba.

²⁷Ninsaal vʋʋsmã yaa Sẽn-Ka-Saab fɩtla, a feesda ninsaal sũ-zulungã pʋgẽ.

²⁸Yaa pʋ-peelem ne sɩd n gũud rĩma, la yaa sõmblem n tebended a rĩungã.

²⁹Kom-bɩɩsã pãng n yaa b nag-teoogo, la nin-kẽembã zoob-peend n yaa b waoogre.

³⁰Poglg sẽn zabd tõe n kɩtame tɩ ned bas wẽng maanego. La pãbr tõe n demsa tags-wẽnsã zãngã.