Read SEBR SÕNGO, 1998 Yel‑bũna 23 Bible Online

Yel‑bũna 23 - SEBR SÕNGO, 1998 bible

Yel‑bũna 23

¹F sã n zĩ n dɩt ne nin-naaba, bɩ f maan gũusg ne bũmb ning sẽn be f taoorã.

²Fo sã n yaa yão-be-ned bɩ f yõk f menga.

³Da tʋlg a rɩ-noodã ye, tɩ yaa belgr dɩɩbo.

⁴Da nams f meng n pʋg arzegs ye, la ra sak tɩ bõn-kãng lebg f zu-loɛɛg ye.

⁵Fo yonga f nin n get arzegse? Bãng tɩ b na n wa loogame, bala, b mii pɩgs pusbu, la b na n yɩka wa sɩlga, n loog saasẽ.

⁶Ra rɩ nin-wẽng rɩɩb ye, la f ra tʋlg a rɩ-noodã ye.

⁷Bala, a yel-manesmã yaa wa a tagsgã sẽn yaa to-to wã. Yẽnda na n yeela foom tɩ f rɩ la f yũ, t'a sũurã yaool n ka be ne foom ye.

⁸Woto, fo na n wʋba bũmb ning fo sẽn dɩ wã, la f na n sãama gom-nood nins fo sẽn dag n gomã.

⁹Da gom ne yalem ye, bala, yẽnda na n kisga fo yam goamã.

¹⁰Da yẽrg kʋdem-wẽndẽ toadg kugr ye, la f ra reeg kɩɩbs pʋʋg n soog ye.

¹¹Bala, bãmb gũudã tara pãnga, la b na n zab n sõnga bãmba.

¹²Segl f sũur n deeg remsgo, la f wɩng ne bãngrã goam kelgre.

¹³Da bas biig n ka rems-a ye, bala, wẽed ka kʋʋd biig ye.

¹⁴Fo sã n wẽ-a, f na n fãag-a-la ne kɩɩm-kulgu.

¹⁵M biiga, fo sã n paam yam, mam me sũur na n yɩɩ noogo.

¹⁶Fo noorã sã n togsd sɩd goamã, mam na n kɩdma ne sũ-no-kãsenga.

¹⁷Da maan sũ-kiir ne yel-wẽn-maandbã ye, la bɩ f zoe Sẽn-Ka-Saab daar fãa.

¹⁸Bala, daar n be, tɩ bũmb ning fo sẽn tẽedã ka na n vaal ye.

¹⁹M biiga, kelg n paam yam, la f tũ sor sẽn yaa tɩrga.

²⁰Ra tũ sẽn yũud-b rãam n tɩgdã, la f ra tũ sẽn wãbd-b nemd n tɩgdã ye.

²¹Bala, rã-yũud ne yão-be-ned kẽesda a meng naongo. La sẽn nong-a gõeem na n yelga fu-kʋdse.

²²Kelg f ba tɩ yaa yẽnda n dog foom, la f ra paoog f ma, a sẽn lebg pʋg-yãang yĩng ye.

²³Bao sɩdã, la f ra bas-a ye, la f bao yam, ne zãmsg la bãngre.

²⁴Nin-tɩrg ba kɩdemdame, la sẽn dog-a yam soab maanda sũ-noogo.

²⁵Bɩ f ba ne f ma maan sũ-noogo, la bɩ pag ning sẽn dog-a foomã kɩdem ne sũ-noogo!

²⁶M biiga, kɩs sɩd ne maam, la f rɩk m mamsg ne sũ-noogo.

²⁷La f bãng tɩ pʋg-yoodr yaa wa bog-zulunga, la pʋg-sãang yaa wa bul-sẽka.

²⁸Yẽnda solgd n bẽta neb wa fãada, la yẽnda kɩtdame tɩ neb wʋsg lebg zãmb dãmb n tudgdẽ.

²⁹Ãnda rãmb la toog paamda? Ãnda rãmb n maand m bãngẽ? Ãnda rãmb la zabã? Ãnda rãmb n yẽgemd n ka sɛtẽ wã? Ãnda rãmb n paamd poglg zaalem yĩnga? Ãnda rãmb la nin-moaama?

³⁰Yaa sẽn kaoosd-b reezẽ rãam yũub zĩigẽ wã, la sẽn yũud-b reezẽ rãam toay-toay sẽn kalemd taabã.

³¹Ra ges reezẽ rãamã sẽn moogã ye, ra ges a sẽn yaa neer wamdã pʋgã ye, la f ra yeel t'a sakda yũub ye.

³²A wat n baas n dũma wa waafo, n kɛ wa põeere.

³³Fo na n yãnda bõn-sãamse, la f na n yɩɩ mo-be-neda.

³⁴Fo na n wa lebga wa ned sẽn gãe ko-kãsengã sʋka, wa ned sẽn zao tɩɩg wil-gɛlengɛɛg zugu, tɩ sobg lengdẽ.

³⁵Yẽnda bee beenẽ n yetẽ: «B wẽe maam, la ka zab-m ye. B pãba maam, la m ka bãng ye. Mam na n neka wakat-bʋgo? M sã n neke, m na n leb n yũume!»