Read SEBR SÕNGO, 1998 Yel‑bũna 24 Bible Online

Yel‑bũna 24 - SEBR SÕNGO, 1998 bible

Yel‑bũna 24

¹Ra maan sũ-kiir ne nin-wẽns ye, la f ra bao tɩ naag-b ye.

²Bala, bãmb tagsda sãoong yell bala, la b noyã sẽn yiisdã fãa yaa wẽnga.

³Yam n met yiri, la yaa ne bãngr la yirã yalsd kãenkãe.

⁴Yaa ne bãngre, la a ro-pʋsã fãa pit ne te-sõama buud toor-toor sẽn tar yõodo.

⁵Ned yam n kõt-a pãnga. Ned sã n tar bãngre, a paamda pãng n paase.

⁶Bala, yaa ne magb la f tõe n kẽng zabrẽ. Sagendb sã n yaa wʋsgo, f paamda tõogre.

⁷Yam zãra ne yalma, Yaa rẽ t'a ka tõe n yaag a noor tẽngã rignoorẽ ye.

⁸Ned sã n tagsd n dat n maan wẽnga, b boond-a lame tɩ zãmb naaba.

⁹Yalem tagsg yaa yel-wẽn bala, la sẽn yaa yel-beed nebã nifẽ yaa nin-paoogda.

¹⁰Fo sã n bas tɩ f raood boog yel-pakr wakate, f pãngã fãa lebga zaalem bala.

¹¹Fãag neb nins b sẽn yõg n dabd kʋʋbã. Gɩdg tɩ b ra kʋ b sẽn lengd-b rãmb n dabd kʋʋbã ye.

¹²Fo sã n wa yeele: «Tõnd dag n ka bãng ye!» Bɩ f bãng tɩ sẽn feesd-a sũyã miime, ned ning sẽn gũud-a fo vɩɩmã neeme, la bãmb na n yaoo ned kam fãa wa sẽn zems a tʋʋmde.

¹³M biiga, rɩ sɩɩdo, bala sɩɩd yaa noogo, la sɩ-vak nooma noorẽ.

¹⁴Woto me, bãng yam f meng yĩnga. F sã n paam-a, daar n be, tɩ f tẽebã ka na n vaal ye.

¹⁵Da soos n dɩgl bẽdg nin-tɩrg yiri, n na n maan a wẽng ye, la f ra sãam a vʋʋsgã zĩig ye.

¹⁶Bala, nin-tɩrg tõe n lʋɩɩ naoor a yopoe, la a na n leb n yikame. La toog na n luba nin-wẽnga.

¹⁷Fo bɛ sã n lʋɩ, bɩ f ra maan sũ-noog ye. A sã n lak n na n lʋɩ bɩ f ra kɩdme,

¹⁸tɩ Sẽn-Ka-Saab wa yã rẽ, tɩ b sũur sãam tɩ b bas n ka sɩbg-a ye.

¹⁹Ra yik f sũur ne nin-wẽns ye, la f ra maan sũ-kiir ne-b ye.

²⁰Bala, nin-wẽnsã ka na n paam beoog neer ye. Bãmb vɩɩmã yaa wa fɩtl sẽn na n wa ki.

²¹M biiga, zoe Sẽn-Ka-Saabo, la f zoe rĩma, la f ra naag neb nins sẽn baood tɩ yɛlã fãa tegsã ye.

²²Bala, toogã na n ling-b-la vugr bala, la ãnda n mi sɩbgr ning Wẽnnaam, bɩ rĩmã sẽn na n sɩbg bãmbã?

²³Woto me yaa yam dãmb goam a taaba: Bʋʋd zĩigẽ, b ka tog n ges ned sẽn yaa-a soab n yaool n bʋ a bʋʋd ye.

²⁴Ned sã n yeel nin-wẽng t'a yaa tɩrga, b kãabd-a-la kãab-beedo, la nebã sũy yikda ne yẽnda.

²⁵La sẽn keoogd-b nin-wẽngã maanda neere. B na n paama bark la sũ-noogo.

²⁶Leokr sẽn leokd ne sɩd yaa zood hakɩɩk bãnde.

²⁷Tʋm f tʋʋmã yɩng fãa n sɛ, la f segl f pʋʋg neere, n yaool n me f zaka.

²⁸Da rõd f to zaalem yĩng ye. Fo rat n yaga zĩrẽ la?

²⁹Da saag n yeele: «A zagl sẽn maan maam to-to wã, m na n maan-a-la woto me n lebs ye. Bala, mam na n dola ned kam fãa wa sẽn zems-a tʋʋmde.»

³⁰Mam tũu kʋɩɩm a ye pʋʋg sɛɛgẽ n looge, mam pɩʋʋga yam-kaalg soab reezẽ tɩɩs pʋʋg noore.

³¹La ade, gõos n dag n yit zĩig fãa, tɩ mo-yoodã gãneg zĩig zãnga, la a lalgã sẽn me ne kugã rag n lʋɩɩme.

³²Mam maaga m yĩng n tags bũmb ning mam sẽn yã wã yelle, la m paama zãmsgo.

³³Gõeem bilf bala, suusg bilf bala, la gãand n tẽeg f nao n kalemd f nus bilf bala,

³⁴tɩ naong wa n soos n yõk-f wa wagdre, tɩ kom me soos n sig-f wa fãada.