Read SEBR SÕNGO, 1998 Yel‑bũna 27 Bible Online

Yel‑bũna 27 - SEBR SÕNGO, 1998 bible

Yel‑bũna 27

¹Ra pẽg f meng ne beoog yell ye, bala, fo ka mi rũndã daarã sẽn na n yɩ-a soab ye.

²Bas tɩ ned a to pẽg-fo, la ra yɩ fo meng noor n pẽgd-f ye. Bas tɩ nin-zẽng pẽg-fo, la f ra pẽg f meng ye.

³Kugr zɩsame, bĩisr zɩsame, la yalem sũ-puugr zɩslem yɩɩda bãmb fãa.

⁴Sũ-puugr yaa wẽnga, la sũ-yikr ka sõama ye. La ãnda soab n tõe n yals sũ-ki-ned taoore?

⁵Keoogr sẽn yaa vẽenega, n são nonglem sẽn solge.

⁶F zoa sã n togs-f sɩd tɩ zab-fo, a wilgda foom a nonglem. La f bɛ sã n mok-fo, yaa zãmb n be be.

⁷Ned sã n dɩ n tɩge, a zãgsda sɩɩdo, la kom sẽn tar-a soab getame tɩ bõn-tɩɩsg buudã fãa yaa noogo.

⁸Ned sẽn bas a yir yaa wa luiil sẽn bas a tʋko.

⁹Kaam ne parfẽ kõta sũ-noogo, la f zoa sẽn sagend-f ne bʋgsem, n são f sẽn na n sagl f menga.

¹⁰Da bas f zoa bɩ f ba zoa ye. La f ra kẽng f ma-biig nengẽ f yel-pakr wakat ye. Bala, f yak sẽn pẽ ne-f n são f ba biig sẽn zãr ne-fo.

¹¹M biiga, paam yam n noog m sũuri. Dẽ, ned sã n tʋʋs-ma, m na tõog n leok a soaba.

¹²Gũus-m-meng soab yãta yell n zoe n soonde, la zɩtbã zãgsda soondgo, n bao yell n kõ b mense.

¹³Ned sã n dɩk sard ne foom ned a to yĩnga, bɩ f reeg a fuugu. La sã n yaa sãan yĩng bɩ f kɩt t'a gãneg bũmbu.

¹⁴Ned sã n sãd tõd-beoog n zẽk a koɛɛg n pʋʋs a yaka, b geelgda a pʋʋsgã wa kãab-beedo.

¹⁵Pʋg-zab-zabd wẽnda wa saag sẽn minisd n ka sɛtẽ ye.

¹⁶Ned sã n baood n gɩdg-a, wẽnda ned sẽn baood n gɩdg sebgo, wall ned sẽn baood n zã kaam a nug pʋgẽ.

¹⁷A wa kut sẽn saasd kutã, ninsaal yam me n zulgd a to rẽnda.

¹⁸Sẽn get-a kankang yell n dɩt a biisi, la sẽn get-a a soaal yell neer n paamd waoogre.

¹⁹Wa ned sẽn get koomẽ n ne a nengã, woto me, f sã n get f to, f bãngda f menga.

²⁰Wa kɩɩm-kulg ne a zĩ-zulumsã sẽn ka tõe n pidã, woto me, ninsaal zɩ n yeel t'a raab pidame ye.

²¹B yɩlgda wanzuri la sãnem boaagẽ. Woto me, ninsaal yʋ-noog n wilgd a sẽn yaa ned ninga.

²²Ba b sã n naag yalem ne bɩle n to teoogẽ, b ka na n tõog t'a yalemdã yi n bas-a ye.

²³Bãng f piisã sõma, n ges f peosg fãa yell neere.

²⁴Bala, arzɛk ka paad ne a soab wakat fãa ye, la maanf me ka bũmb sẽn paad zamaan woo zamaan n ka teemdẽ ye.

²⁵B wʋrda yamd tɩ mood leb n yita. B wʋrda yam-maas tãmsã zut n bĩngdẽ.

²⁶Woto, f na n paama f piisã kõbdo, n wʋg fuug n yeelge, la f na n koosa f boeesã, n da pʋ-paalle.

²⁷Fo bʋʋsã na n kõ-f-la bĩisim wʋsgo, tɩ f paam n dɩlg f menga, la f rɩlg f zak rãmba, ne f tʋmtʋmd-pogsã.