Read SEBR SÕNGO, 1998 Yel‑bũna 5 Bible Online

Yel‑bũna 5 - SEBR SÕNGO, 1998 bible

Yel‑bũna 5

¹M biiga, kelg m yam-goamã neere, la f yok f tʋb n kelg m sẽn sagend-f ne bãngrã,

²n tõog n paam gũus-m-menga, la tɩ f noorã tõe n gom pĩnd-n-bãngr goamã.

³Bala, pʋg-yoodr noor goam yaa wa sɩɩdo, la a bʋgsame n yɩɩd kaam.

⁴La baoosgo, a wat n lebga toog liga, n wãagd wa zabr sʋʋg sẽn tar noy a yiibu.

⁵Yẽnda kẽnd n dabda kũum zĩigẽ, la yẽnda sorã rɩka kɩɩm-kulg sor tɩrga.

⁶Yẽnda ka manegd vɩɩmã sor ye, yẽnda bee tudgr pʋgẽ n ka miẽ ye.

⁷Dẽ wã yĩnga m kamba, kelg-y maam. Ra zãag-y mens ne m goamã ye.

⁸Zãag-y y mens ne pagb a woto buudu, La y ra tol n pẽneg b roogã noor ye.

⁹Sã n ka rẽ, bõn-kãng na n kɩtame tɩ neb a taab paoog-fo, la b kɩt tɩ nin-toaag sãam f vɩɩmã,

¹⁰la a kɩt tɩ sãamb wa soog f paoongã, tɩ neb fo sẽn ka mi wa rɩ f tʋʋmã yõodo,

¹¹la a kɩt tɩ f wa gãe n wõosdẽ, fo yĩnsã sẽn sãamdã yĩnga.

¹²Wakat-kãnga, fo na n yeelame yaa: «Kato! Bõe yĩng tɩ mam kisg remsgã? Bõe yĩng tɩ mam ka sak n deeg keoogrã?

¹³Mam maana a wãn n ka kelg m karen-saam-dãmbã noore, la m ka yok m tʋb me n kelg b zãmsgã?»

¹⁴La kellẽ-la bilf tɩ yel-beed paam maam, nebã tiging la buudã sʋka.»

¹⁵Yũ fo bulgã koom, yũ koom ning sẽn yit f bãkã pʋgã,

¹⁶Fo na n basame tɩ f kʋɩlgã koom raagd raasẽ? Bɩ f na n basame t'a zoet soayã zutu?

¹⁷Bɩ f pagã yɩ foom f yembr dẽnd bala! Da sak tɩ nin-sãams naag foom n lagm-a ye.

¹⁸Bɩ f kɩt t'a paam naare, la f maan sũ-noog ne f bi-bɩɩlem wakatẽ paga.

¹⁹Bala, yẽnda tara nonglem wʋsgo, la a pida ne bʋgsem. Bɩ yẽnda bĩisã kõ foom sũ-noog wakat fãa, la bɩ yẽnda nonglmã soog foom.

²⁰M biiga, yaa bõe tɩ f na n nong pag a to? Bõe yĩng tɩ f na n mogs pʋg-sãang bĩisa?

²¹Bala, Sẽn-Ka-Saab nee ninsaal yel-manesem, la bãmb geta a sẽn dabd zĩig ning fãa.

²²Nin-wẽng lʋɩta a meng kongr pʋga. Yẽnda meng yel-wẽnã n wẽnegd n yõk-a.

²³Yẽnda kiida a sẽn ka paam remsg yĩnga, la yẽnda menemda a yalemdã sẽn yaa wʋsgã yĩnga.