Read SEBR SÕNGO, 1998 Koɛɛg Soaba 10 Bible Online

Koɛɛg Soaba 10 - SEBR SÕNGO, 1998 bible

Koɛɛg Soaba 10

¹Zõos sẽn kiid parfẽ-maand kaam pʋgẽ, t'a yũug ka leb n yaa sõama wã, a kɩtdame tɩ kaamã põoge. Yalemd bilf me woogda yam la ziiri.

²Yam soab sũur takd-a lame n lebd rɩtgo, la yalem sũur takd-a lame n lebd goabga.

³Baa yalem sã n kẽnd sor zugu, yam ket n paoogd-a lame, yẽnda togsda nebã fãa t'a yaa yalma.

⁴Naab sũur sã n yik ne foom, bɩ f ra zoe n bas f zĩig ye. Bala, sũ-maasem gɩdgda yel-wẽn-bɛda.

⁵Mam yãnda wẽng a yembr dũniyã pʋga, a wẽnda taoor soab tudgr sẽn puki.

⁶Yalemb zĩi zĩ-bɛdẽ, la arzegs rãmb zĩi paoogr zĩisẽ.

⁷Mam yãnda yembs sẽn zao wiidi, tɩ nanambs kẽnd ne nao wa yembse.

⁸Ned ning sẽn tuud-a boko, a na n wẽneg n lʋɩɩ bog-kãng pʋga. La ned ning sẽn lubd lalga, waaf na n zĩnda beenẽ n dũm-a.

⁹La ned ning sẽn lagsd kuga, kugã na n pogl-a lame. Ned sã n wesd raado, a tõe n paama toog raadã wesb pʋgẽ.

¹⁰Lar noor sã n mudi, tɩ b ka saas-a, a soab tog n wɩka a meng n kɛ. La yam yõodã, yaa a sẽn sõngd tɩ b tõogdẽ wã.

¹¹Ned sã n mi waaf saolgr n bas tɩ waafã kɛ-a, sẽn mi-a waaf saolgrã goam ka leb n tar yõod ne-a ye.

¹²Yam soab noor goam bee barka, la yalem noor kɩtdame t'a meneme.

¹³Yẽnda goamã sɩngr yaa yalemdo, la yẽnda koɛɛgã baoosg yaa gãeemdo.

¹⁴Yalem gomda wʋsgo. Ninsaal ka mi bũmb ning sẽn na n wa zĩndã ye. Ãnda n na n wilg yẽnda bũmb ning sẽn na n wa zĩnd yẽnda loogr poorẽ wã?

¹⁵Yalem tʋʋmd yɛɛda yẽnda. Bala, yẽnda ka mi a sẽn na n tũ zĩig ning n kẽng tẽng pʋgẽ ye.

¹⁶Foom a tẽng sẽn tar dĩm sẽn yaa bi-bɩɩga, tɩ f nanambsã rɩt yibeoog pĩndã, toog bee fo zugu!

¹⁷Foom a tẽng sẽn tar dĩm sẽn yaa na-biigã, bark bee fo zugu! Bala, fo nanambsã rɩta wakat sẽn zemse. Bãmb dɩt n baooda pãnga, b ka baood n kɩt tɩ b neng yilim ye.

¹⁸Ned nus sã n ka maand bũmbu, a roog sugr bõrgdame. La ned sã n bas t'a nus ka tʋmdẽ, a roog sugr yũundame.

¹⁹B maanda rɩɩb n dɩtẽ, n maand sũ-noogo. Reezẽ rãam kõta vɩɩm sũ-noogo, la f sã n tar ligdi, f maanda f sẽn dat fãa.

²⁰Ra tʋʋs rĩmã, baa f sũur pʋgẽ ye. Ra tʋʋs arzɛk soab f ro-gãagẽ ye. Bala, yĩngr liuuli na n dɩka a rãamdã n looge, la bõn-yɩgdɩ na n dɩka yellã n tɩ togse.