Read SEBR SÕNGO, 1998 Koɛɛg Soaba 12 Bible Online

Koɛɛg Soaba 12 - SEBR SÕNGO, 1998 bible

Koɛɛg Soaba 12

¹Tẽeg f naandã yell f bi-bɩɩlem wakate, tɩ f toogã wakat nan ka ta, tɩ yʋʋm nins fo sẽn na n wa yeel tɩ f ka tar sũ-noogã wakat nan ka kolge,

²la sẽn deng wĩndgã ne vẽenemã, la kiuugã ne ãdsã sẽn na n sobge, la sawat sẽn na n pʋgl saag n wa wã.

³La daar ning roog gũudbã sẽn na n digi, la gãndaadã sẽn na n ku, la pagb sẽn dag n be neerẽ n werdã sẽn na n bas werbo, b sẽn ka leb n waoogã yĩnga, la zĩig sẽn na n sobg tɩ neb sẽn dag n be roog võorẽ n getẽ wã ka leb n tõe n yãndã,

⁴la ki werb rãamd sẽn nan ka booge, tɩ kʋɩlems sẽn tees sor kɩrengã page, la ned sẽn nan ka wʋm liuul kɛleng t'a pɛleng yɩke,

⁵la pʋg-sadb nins fãa sẽn yɩɩndã koees pãng sẽn na n booge, la ned sẽn yɛɛsd zĩ-zãonglgo, tɩ sorã fãa pid ne rabeem, la amand tɩɩg sẽn ningd a puudu, tɩ sʋʋr lebg zɩsg a yĩnga, tɩ kapr tɩɩg biis ka leb n tar noosem ye. Bala, ninsaal dabda a roog sẽn ka sɛt zĩigẽ, la yãbdbã zoet n pɩʋʋmda soayã,

⁶tɩ wanzuri wĩirã nan ka tõsge, la tɩ sãnem tʋkã nan ka wãage, la tɩ yʋʋrã nan ka wã ko-bundmã zĩigẽ, la gʋlgã sẽn nan ka lʋɩ n kaoog bulgã pʋgã,

⁷la tomã sẽn nan ka lebg n leb tẽng tomẽ wã, wa a sẽn dag n yaa bũmb ning pĩndã, tɩ sɩɩgã leb n leb Wẽnnaam ning sẽn dag n kõ yẽnda wã nengẽ.

⁸Koɛɛg Soabã yetame: «Zaalem fasɩ! Bũmb fãa yaa zaalem bala.»

⁹Koɛɛg soabã rag n tara yam. La sẽn paase, yẽnda zãmsa nebã tɩ b paam bãngre. Yẽnda tagsa yel-bũn wʋsg yɛla, n fees n bãng b võyã, la yẽnda manega bãmba.

¹⁰Koɛɛg soabã maoome n paam gom-noodo. B gʋlsa gom-kãens wa sẽn zemse, la b yaa goam sẽn yaa sɩda.

¹¹Yam dãmbã goam wẽnda wa fu-pĩim, la seb-gʋlsdbã yaa wa kaads b sẽn ka. B yaa pe-kɩɩm dasaare.

¹²M biiga, bũmb ning sẽn keta, gũus f meng n paam zãmsg bõn-kãens pʋga. B sã n baood n gʋls sɛb wʋsgo, b kõn tol n gʋls n sɛ ye. La zãmsg wʋsg yaamsda yĩnga.

¹³Kelg koɛɛgã fãa baoosgo. Zoe Wẽnnaam la f sak bãmb tõodã, bala, yaa woto la ninsaal fãa tog n maane.

¹⁴Bala, Wẽnnaam na n bʋʋ tʋʋmã fãa bʋʋdo, la yɛl nins fãa sẽn dag n solgã, yel-sõama wã ne yel-wẽnsã bʋʋdo.