Read SEBR SÕNGO, 1998 A Salmo yɩɩla 5 Bible Online

A Salmo yɩɩla 5 - SEBR SÕNGO, 1998 bible

A Salmo yɩɩla 5

¹M tãoã, m pʋg-paala, mam dabda m zẽedã zĩigẽ. Mam gẽemda m miir ne m bõn-noodã. Mam dɩta m sɩ-vakã ne m sɩ-kaamã, la m yũud m reezẽ rãamã ne m bĩismã. M zo-rãmba, rɩ-y la y yũ-y-yã! Nin-nongdse, tɩgs-y y meng ne nonglem!

²Mam dag n gõeeme la m sũurã rag n ka gõe ye. Mam wʋmda m noangã sẽn kabsd n yetẽ: «M tão, m noanga, m walle, m yam neda, pak tɩ m kẽ tɩ meenem madga mam zugu. Mam zoobdã pida ne yʋng meenem.» Mam pidga m fuugu.

³Mam na n maana a wãn n leb n yeelg-a? Mam waasa m nao. Mam na n yɩ a wãn n leb n dẽgem-ba?

⁴M noangã tʋma a nug kʋɩlengã võorẽ, tɩ m sũur yɩ noogo.

⁵Mam yikame n na n pak tɩ m noangã kẽ, la miir madga mam nusã. Miir kaamã sẽn be m nus-biẽ wã sõoga kʋɩlen-kurã.

⁶Mam pakame tɩ m noangã kẽ, la m noangã wẽnemdame n zoe n looge. Yẽnda sẽn dag n gom ne maamã, mam dag n ka leb n so m meng ye. Mam bao-a lame, la m ka yãnd-a ye. Mam bool-a lame, la a ka sak ye.

⁷Gũudb nins sẽn gilgd tẽngã yãnda maam. Bãmb pãba maam n pogle. Gũudb nins sẽn gũud tẽngã lalsã rɩka fuug ning mam sẽn tar n pind m nengã.

⁸Zeruzalɛm kom-pugli, mam kota yãmb tɩ y sã n yãnd m noangã, bɩ y togs-a tɩ nonglem bãag n tar maam.

⁹Fo sẽn yaa neer n yɩɩd pagb a taabã, fo noangã tara bõe n yɩɩd a taabã? Togs tõndo! Fo noangã tara bõe n yɩɩd a taabã tɩ fo gomd ne tõnd woto?

¹⁰M noangã yaa pɛɛlg n pɩnda. Yẽnda sã n be raop tus piig sʋka, b ne-a lame.

¹¹Yẽnda zugã wẽnda sãnem halaale. Yẽnda zoobdã bɩrame n sob wa gãabgo.

¹²Yẽnda ninã yaa wa wal sẽn be ko-soog noor n sood bĩisim, yaa bĩisim sẽn yaa wʋsg pʋga.

¹³Yẽnda yegdsã yaa wa b sẽn sel tɩ-puudu, la tɩ-bãooneg sẽn tar yũ-noog kaalem pʋgẽ. Yẽnda no-bɩmsã yaa wa rulg lɛlem sẽn tosd miir koom.

¹⁴Yẽnda nusã wẽnda sãnem-gils b sẽn ning kirzolit kug b pʋsẽ. Yẽnda yĩngã yaa wa wobg yẽn b sẽn maneg n pẽeg t'a pɩnda, n ning safɩɩr kug a pʋgẽ.

¹⁵Yẽnda karsã wẽnda marbr kug ra-lugds sẽn lugl sãnem halaal nao zutu. Yẽnda nengã yaa wa Libã n yaa neer wa sɛɛdr tɩɩse.

¹⁶Yẽnda goamã bʋgsame. Yẽnda yaa neer zãnga. Zeruzalɛm kom-pugli, ade, m noangã n yaa a woto, ade, m zoa wã n yaa a woto.