Read SEBR SÕNGO, 1998 A Salmo yɩɩla 7 Bible Online

A Salmo yɩɩla 7 - SEBR SÕNGO, 1998 bible

A Salmo yɩɩla 7

¹Sulamit-poaka, lebg n wa, lebg n wa, lebg n wa ka, lebg n wa tɩ d ges-fo. Yaa bõe tɩ y rat n ges Sulamit-poakã wa sul a yiib neb sẽn tigim taab n saoodẽ?

²Nin-kãseng bi-pugla, fo naoã sẽn be fo neooda wã pʋsã yaa neere! Fo gɛy wã yaa gils wa tʋʋm-mitb sẽn maan lo-yɛrg sogdse.

³Fo taoorã yaa wa la-gilg b sẽn ning reezẽ rãam sẽn kalem ne bũmb sẽn tar yũ-noog a pʋga. Fo pʋgã wẽnda ka-rʋr sẽn be rulg lɛlem sʋka.

⁴Fo bĩis a yiibã yaa wa yãg-bi a yiib sẽn yaa yãk a yembr kamba.

⁵Fo yublã wẽnda gãosg sẽn me ne wob-yẽna. Fo ninã wẽnda Ɛsbon bãgsã koom sẽn be Bat-Rabim tẽngã rignoore. Fo yõorã wẽnda Libã gãosg sẽn teesd Damaas sẽnẽ.

⁶Fo zugã wẽnda Karmell tãngã, fo zoobdã yaa wa gĩs sẽn yaa kẽeg haoo. Fo zoobdã bɩrame n vind rĩmã.

⁷M noanga, m yam neda, fo yaa neere, foom n kõt maam yamleoogo.

⁸Fo yasrã wẽnda koang tɩɩga, fo bĩisã wẽnda reezẽ-gĩna.

⁹Mam tagsame tɩ m na n dʋʋ koang tɩɩgã n gãd a wilã. Bɩ f bĩisã yɩ wa reezẽ-gĩna, tɩ fo vʋʋsmã yũug yɩ wa pom tɩɩg biis yũugu,

¹⁰tɩ fo noorã goam yɩ wa rã-noogo, t'a pʋdgr yaa naana m noangã yĩnga, n sedgd gõen-gõetba no-bɩmsẽ.

¹¹Mam yaa m noangã rẽnda, la yẽnda yam loee ne maam.

¹²M noanga, wa tɩ d kẽng weoogẽ n tɩ zĩnd tẽn-bãooneg pʋs ne yʋngo.

¹³Bɩ d yik pĩnd n kẽng reezẽ tɩɩs pʋtẽ wã, n tɩ ges reezẽ tɩɩsã sã n tobdame n ningd puudu, la gernaad tɩɩsã sã n ningda puudu. Yaa beenẽ la mam na n saag-fo.

¹⁴Mandragoor yũug yitame, la tɩ-bi-nood nins fãa sẽn yaa paals la kʋdã bee tõnd dignoyẽ wã. M noanga, mam bĩnga bãmb fo yĩnga.