Read SEBR SÕNGO, 1998 A Ezayi 10 Bible Online

A Ezayi 10 - SEBR SÕNGO, 1998 bible

A Ezayi 10

¹Toog na n paama neb nins sẽn vigind wẽng maaneg tõodã, la sẽn gʋlsd pãn-maaneg noyã,

²la sẽn mongd ka-pãens-rãmbã bʋʋm, sẽn wẽgd naong rãmbã sẽn be mam nebã sʋkã, la sẽn dɩkd pʋg-kõapã tɩ lebg b paoongo, la b fãad kɩɩbsã!

³Yãmb na n maana a wãn n põs sɩbgrã daare, daar ning sɩbgrã sẽn na n yi zĩ-zãrg n wa wã? Yãmb na n zoe n kẽnga ãnda nengẽ n tɩ paam sõngre? Yãmb na n tɩ bĩnga y arzegsã yɛɛnẽ?

⁴Yãmb sẽn tõe n maan bũmb ning bala, yaa tɩ y naag yembsã n kuudẽ, wall y ki n naag b sẽn kʋ-b rãmbã. La ne rẽ fãa, Sẽn-Ka-Saab sũ-yikrã ket n ka sig ye. Bãmb nugã ket n zẽkame.

⁵Sẽn-Ka-Saab yeelame: «Toog na n paama Asiiri nebã, bãmb yaa mam sũ-yikrã dasaare! Asiiri nug n zãad guugã mam sẽn tar n wilgd m sũ-yikrã.

⁶Mam bas-a lame n zabd ne nin-wẽnsã. Mam tʋmd-a lame t'a tɩ zab ne neb nins sẽn yikd mam sũurã, t'a kẽng n tɩ zɛ teed wʋsgo, la a tab bãmb wa sor zug begdo.

⁷La Asiiri ka tagsd tɩ yaa maam n tʋm-a ye. Asiiri ka tol n tagsd a woto ye. Yẽnda tagsg yaa tɩ sãame, yẽnda tagsd n na n menesa buud wʋsgo.»

⁸Bala, yẽnda yetame: «Dẽ yĩnga, mam tãb-biis nanambsã ka zem dĩm-dãmb la?

⁹Bũmb ning sẽn paam Kalno tẽngã ka paam Karkemiis tẽngã la? Bɩ sẽn paam Hamat tẽngã ka paam Arpaad tẽngã? Bɩ sẽn paam Samaari tẽngã ka paam Damaas tẽngã?

¹⁰Mam nugã sẽn tõog n ta soolem nins sẽn dag n pʋʋsd wẽn-naandsã, tɩ bãmb bõn-naandsã sõor yaool n dag n yɩɩd Zeruzalɛm ne Samaari bõn-naandsã,

¹¹woto me, mam sẽn maan Samaari ne a wẽn-naandsã to-to wã, mam kõn maan Zeruzalɛm ne a bõn-naandsã me a woto sɩda?»

¹²La Sẽn-Ka-Saab sã n wa n pids b tʋʋmdã fãa Sɩyõ tãngã zug Zeruzalɛm n sɛ, bãmb na n sɩbga Asiiri rĩma a wuk-m-mengã ne a tɩtaamã tagsg yĩnga.

¹³Bala, yẽnda yeelame: «Yaa ne mam kangã pãnga, ne m yamã la m bãngrã, la m tõog n sãam neb wʋsg tẽms todse, n wʋk b arzegsã, la mam yɩɩ gãndaoog n sik rĩm-dãmb b naamẽ.

¹⁴Mam nug paama neb wʋsg arzegse, wa gɛl sẽn be tʋkẽ, la mam wʋka dũniyã zãnga, wa b sẽn wʋkd gɛl bũmb sẽn zãndg n base. La ned ba a yembr ka pigimdid a pɩgsa, wall a yaag a noor n yeel tɩ bũmb ye.

¹⁵Rẽ yĩnga, lar tõe n wuka a meng ne sẽn tar-a yẽnda n kɛɛdẽ wã la? Ra-wãad-sʋʋg tõe n zẽka a meng ne sẽn tar-a yẽnda n wãadẽ wã la? Yaa wa dasaar sẽn yuumd a zãada! Yaa wa guug sẽn zẽkd a zãada!

¹⁶Rẽ kɩtame tɩ Zu-soabã sẽn yaa Saasẽ-Pãng-Soabã na n kɩt tɩ Asiiri soolmã neb nins sẽn nobã faage. La yẽnda nin-kãsemsã sʋka, toog n na n widgi, n dɩt wa bugum sẽn dɩt to-to wã.

¹⁷Israyɛll vẽenemã na n lebga bugum, tɩ yẽnda Pʋ-Peelem Soabã lebg bug-witim, n dɩ Asiiri gõosã ne a gõpayãndsã n sãam-b zãng daar a yembr pʋgẽ.

¹⁸Bãmb na n sãama Israyɛll kãgrã ne a tɩɩs zĩigã sẽn yaa ziirã zãnga. Yẽnda na n lebga wa bãad pãng sẽn sɛ.

¹⁹Yẽnda kãgrã tɩɩs nins sẽn na n kellã sõor na n yɩɩ bilfu, tɩ baa bi-bilf tõe n sõd-ba.»

²⁰Badaare, Israyɛll bu-kellã ne a Zakoob buudã neb nins sẽn põsã ka na n leb n teeg soab ning sẽn dag n pãbd-a bãmbã ye. Bãmb na n teega Sẽn-Ka-Saab sẽn yaa Israyɛll Pʋ-Peelem-Soabã ne sɩda.

²¹Bu-kell n na n lebg n wa Pãng-Soab a Wẽnnaam nengẽ: yaa a Zakoob buudã neb nins sẽn kellã.

²²Baa Israyɛll sẽn yaa fo nebã sã n yaa wʋsg wa ko-kãsengã noor bĩisrã, yaa neb bilf bal n na n kelle, n lebg n wa. B zoe n yãka yam tɩ sãoongã na n zĩndame. Yaa tɩrlem bal n na n pid n puugi.

²³Bala, sãoongã sẽn na n zĩndã yaa Zu-soab a Sẽn-Ka-Saab sẽn yaa Saasẽ-Pãng-Soabã n yãk yam n na n kɩt t'a zĩnd tẽngã zãng fãa pʋga.

²⁴Bõn-kãng yĩnga, Zu-soab a Sẽn-Ka-Saab sẽn yaa Saasẽ-Pãng-Soabã yetame yaa: «Mam nebã, yãmb dãmb sẽn be Sɩyõ, da-y zoe-y Asiiri nebã ye! Bãmb pãbda yãmb ne guugu, bãmb zẽkda b rasaar n pãbd yãmb wa Ezɩpt nebã sẽn dag n maan yãmbã.

²⁵La keta bilf bala, tɩ mam sũ-yikrã sɛ. Mam sũ-yikrã na n sãama bãmba.

²⁶Saasẽ-Pãng-Soabã na n zẽka b kalwaas n pãb bãmb wa b sẽn dag n pãb Madiyã nebã Orɛɛb pĩigã kugr zĩigẽ wã. Sẽn-Ka-Saab zẽka b dasaarã ko-kãsengã zug wa b sẽn dag n zẽk-a Ezɩpt tẽngã.

²⁷Badaare, bãmb na n sika b zɩɩbã n bas f bãgdã, la b yiis b yubl balgrã n bas f yublã. Fo na n nobame hal tɩ f yubl balgrã kaooge.»

²⁸Asiiri nebã taa Ayat n pɩʋʋg Migron n tɩ bas b teedã Mikmaase.

²⁹Bãmb wẽdga kunkubã sʋk n yeel yaa: «Tõnd na n gãanda Geba!» Rama tẽng nebã rigda ne rabeem, tẽng ning b sẽn boond t'a Sayull Gibeya wã ninga tĩiga.

³⁰Bat-Galim tẽnga, kelme! Layiisa tẽnga, maan gũusgu! Anatot tẽnga, m yãbd-fo!

³¹Madmena nebã zoet n kẽeda moogo, Gebim tẽng nebã baooda soondg zĩiga.

³²Badaar bala, Asiiri nebã tɩ yalsa Noob tẽnga, n zẽk b nug n na n zab ne Sɩyõ tẽn-neerã, n na n zab ne kunkubr ning Zeruzalɛm sẽn be a zugã.

³³Zu-soabã sẽn yaa Saasẽ-Pãng-Soabã na n kaoo wilã ne pãng n lubi. B na n kɛɛ tɩɩs nins sẽn yaa lug-lugã, b na n luba sẽn lug-b n yɩɩdã tẽnga.

³⁴B na n kɛɛ kãgrã tɩɩs ne lar n lubi, la Libã tɩɩsã ne b ziirã na n lʋɩɩme.