Read SEBR SÕNGO, 1998 A Ezayi 16 Bible Online

A Ezayi 16 - SEBR SÕNGO, 1998 bible

A Ezayi 16

¹Tʋm-y neb tɩ b tall pe-ribl n tɩ kõ tẽngã soaalã. Tʋm-y bãmb tɩ b yi Sela n pɩʋʋg we-raoogã, n kẽng Sɩyõ tẽn-neerã tãngẽ wã.

²Moaab kom-pugli wã na n tigma taab Arno kʋɩlgã zĩ-rʋʋgdgẽ wã, wa liuul sẽn yɩk n baood a menga, la wa liuun-bi sẽn sãeeg n bas b tʋko.

³Moaab kom-pugli wã yetame: «Maan-y tigingu, yãk-y yam, yɛdg-y y maasmã wĩnto-sʋka, n lud b sẽn digd b rãmbã wa yʋngo, la y ra luk zoɛtbã bãong ye.

⁴Bas-y Moaab nebã sẽn zoetã tɩ b wa zĩnd yãmb sʋka, sak-y n yɩ-y zĩ-soalgdg bãmb yĩnga, tɩ sẽn sãamd-a fãa wã ra wa paam-b ye! Bala, sẽn maand-a neb a taab pãngã sɛɛb wakat taame, sãoongã sɛɛme, sẽn wõrd-a neb a taabã menema tẽngã pʋgẽ.

⁵Maan-sɩdã na n kɩtame tɩ naam geerã paam pãnga. La sẽn na n zaoond-a beenẽ wã na n yɩ a Davɩɩd yageng sẽn yaa sɩd soaba. Yẽnda na n yɩɩ bʋ-kaood sẽn baood zemsgo, la sẽn kaood bʋʋd ne tɩrlem.»

⁶Tõnd wʋma Moaab nebã wuk-m-mengã kibare. Bãmb wuk-m-mengã yaa n looga nugu. Tõnd wʋma bãmb sek-m-mengã ne b wuk-m-mengã, la b tɩtaamã ne b pẽg-m-mengã sẽn ka yõodã.

⁷Rẽ n kɩt tɩ Moaab nebã wiisd b mensã yĩnga, bãmb ned kam fãa wiisdame. Yãmb sidgda Kɩɩr-Haresɛt sẽn lebg raboodã yĩnga, n maand sũ-sãan-kãsenga.

⁸Bala, Hɛsbon tẽngã bõn-koaadl kiidame. Buud toay-toayã taoor dãmb kɛɛ Sibma tẽng reezẽ tɩ-sõamyã. Reezẽ tɩɩgã rag n tẽeme n tãag Yazɛɛre, n tud n kẽ we-raoogã. A wilã tẽeme n gãndg yamsem kʋɩl-kãsengã.

⁹Woto kɩtame tɩ mam na n yãb Sibma reezẽ tɩɩgã, wa Yazɛɛr sẽn yãbd-a wã. Hɛsbon ne Eleyale, mam na n madga yãmb ne m nintãm, bala, yãmb bõn-koaadlã rɩkr ne reezẽ tɩɩsã wobr wakat kelemsã sɛɛme.

¹⁰Sũ-noogã ne kɩdengã sɛɛ pʋtẽ wã. Sũ-noog kaasg ne kilsg ka leb n be reezẽ tɩɩs pʋtẽ wã ye! Reezẽ-woabdb ka leb n wẽkd reezẽ rãam sĩmsẽ ye. Mam kɩtame tɩ sũ-noog kaasg sɛ.

¹¹Rẽ kɩtame tɩ mam sũurã sidgd Moaab yĩng wa pɛndg n zãeede. Mam sidgda Kɩɩr-Harɛɛs yĩnga.

¹²Moaab leb n kẽnga maoong kʋʋb zĩisẽ wã. A kẽnga a zĩ-sõngẽ wã la a ka tõe n paam bũmb ye.

¹³Ad koɛɛg ning Sẽn-Ka-Saab sẽn togs hal kʋdem-wẽndẽ Moaab wɛɛngẽ wã.

¹⁴La moasã Sẽn-Ka-Saab yetame: «Yʋʋm a tãab sẽn wate, wa sẽn zems yʋʋm sõor ning tʋmtʋmd sẽn tʋmd yaood yĩngã, Moaab ziirã na n lebga paoogre. Baa yẽnda neb kʋʋngã sẽn yaa to-to wã, neb nins sẽn kellã na n yɩɩ bilf bala, la b ka na n zeng bũmb ye.»