Read SEBR SÕNGO, 1998 A Ezayi 17 Bible Online

A Ezayi 17 - SEBR SÕNGO, 1998 bible

A Ezayi 17

¹Sɩbgr koɛɛg Damaas yĩnga. Damaas ka na n leb n yɩ tẽng ye, a na n lebga tom-dʋre.

²B na n basa Arowɛɛr tẽmsã wakat fãa yĩnga, Tẽn-bãmb na n lebga rũms zĩiga, tɩ b gãe beenẽ tɩ ned ka maan bãmb bũmb ye.

³B na n sãama Efrayiim pãng zĩigã, ne Damaas soolmã, la Siiri neb nins sẽn ketã baoosg na n yɩɩ wa Israyɛll nebã ziir sẽn loogã. Maam a Saasẽ-Pãng-Soabã n yeele.

⁴Badaare, a Zakoob yagensã ziir na n woogame, la b sẽn nobã, b na n faagame.

⁵Yẽnda na n yɩɩ wa b sẽn tigsd bõn-koaadl zĩ-yɛnga, la wa bõn-koaadl tigsd nug sẽn tigsd ka-zutu. Na n yɩɩ wa b sẽn yiisd bɩle Refayit longẽ wã.

⁶Biis bilf nins sẽn ket a pʋgẽ wã na n zemsa wa b sẽn pãb oliiv tɩɩg will ne raado, tɩ biis a yiib bɩ a tãab kell a wil-gelengeesẽ wã, la wa a biis a naas wall a nu sẽn be tɩɩg zugu. Maam a Sẽn-Ka-Saab sẽn yaa Israyɛll Wẽnnaamã n yeele.

⁷Badaare, ninsaalbã na n nak n gesa b naandã, bãmb na n wẽnemda b nens n ges Israyɛll Pʋ-Peelem Soabã.

⁸Bãmb kõn leb n ges tẽn-kugã sẽn yaa bãmb nus tʋʋmã, wall b ges Aseera ra-lugdsã ne wisd yõogr zĩisã bãmb mens nus sẽn maanã ye.

⁹Badaare, b na n basa Israyɛll tẽms nins sẽn gũbg ne lalsã wa Israyɛll nebã sẽn dag n dig buud nins sẽn dag n vɩ tɩɩsã tẽngrã, la tãmsã zutã tɩ b zoe n bas b tẽmsã wakat sẽn loogã. La tẽn-bãmb fãa na n lebga zĩ-vɩʋʋdo.

¹⁰Bala, fo yĩma Wẽnnaam ning sẽn fãag-a foomã yelle, la fo ka tẽeg pĩig ning sẽn yaa fo pãngã yell ye. Woto n kɩte, tɩ fo send tɩɩs sẽn yaa neeba, fo sela bu-zẽms tɩɩse.

¹¹La daar ning meng fo sẽn sel-bã, fo yãndame tɩ b tobame. Vẽkembeoog yibeoogo, fo sẽn bʋd bũmb ningã ninga puudu. Ka-keemã daare, tigsg ka leb n beẽ n ye. La ka-keemã ka tar tɩɩm ye.

¹²Toogo! Neb kʋʋng bʋrg n sãt wa ko-kãsengã sẽn guglumdã. Neb kʋʋng kelems n sãt wa ko-kãsems sẽn tar pãng bʋrgo.

¹³Yaa neb kʋʋng bʋrg sẽn wẽnd ko-kãseng bʋrgo. La Sẽn-Ka-Saab lengd-b lame tɩ b zoet n zãagd yɩɩga. B rigda bãmb wa tãng zug seb-kãseng sẽn dɩkd ka-fɩɩba, la wa sɩlmand sẽn dɩkd wudgu.

¹⁴Zaabr sã n ta b kẽesda rabeem, la sẽn deng beoogã vẽegre, b ka leb n beẽ ye! Neb nins sẽn fãad tõndã pʋɩɩr la woto. Neb nins sẽn zɛɛd tõnd teedã pʋɩɩr n yaa a woto.