Read SEBR SÕNGO, 1998 A Ezayi 23 Bible Online

A Ezayi 23 - SEBR SÕNGO, 1998 bible

A Ezayi 23

¹Sɩbgr koɛɛg Tɩɩr tẽngã yĩnga. Tarsɩɩs koom kogendo, yãb-y n wiis-y-yã, bala, b sãama y tẽngã! Rot ka leb n beẽ ye! Kõom zĩig ka leb n beẽ ye! Bãmb sẽn wa n yi Sɩpr n watẽ wã la b wilg bãmb bõn-kãense.

²Yãmb dãmb sẽn be tẽms koom sẽn gũbgã pʋga, tɩ Sɩdõ toandbã rag n kẽnd ko-kãsengã zug n wat n pit beenẽ wã, bɩ rabeem kẽ-yã, tɩ y lebg mugsi!

³Sihoor bõn-koaadlã, Nill kʋɩlgã koodã sẽn dag n pɩʋʋgd ko-kãsengã yaa yẽnda paoongo! La yẽnda rag n lebga bu-zẽmsã raaga.

⁴Sɩdõ, fo sẽn yaa ko-kãseng pãng zĩigã, zoe yãnde! Bala, ko-kãsengã gomdame n yetẽ yaa: «Mam ka paam dogem toog ye, mam ka rog ye, la m ka wub kom-dibli wall kom-pugli ye.

⁵Koɛɛgã sã n ta Ezɩpt tẽngã, b na n diga ne rabeem, wa b sẽn dag n wʋm Tɩɩr yellã.»

⁶Pɩʋʋg-y n kẽng-y Tarsɩɩse. Koomã sʋk tẽms nebã, yãb-y n wiis-y-yã.

⁷Tẽng ning sẽn dag n kõt yãmb sũ-no-kãsengã la woto bɩ? Tẽn-kãngã sɩng n bee hal kʋdem-wẽndẽ, yẽnda naoã rag n kẽnda ne yẽnda zĩ-zãrgẽ.

⁸Ãnda n yãk yam n na n sɩbg Tɩɩr a woto? Tɩɩr yaa tẽng sẽn dag n tar naam n pʋɩta, tɩ yẽnda toandbã yaa nanambse, la dũniyã nebã fãa rag n waoogda a lɛɛbdbã.

⁹Yaa Saasẽ-pãng-soabã n yãk yam-kãngã, n na n kɩt tɩ bũmb ning fãa sẽn tar dasãndã wuk-m-meng sɛ, la b kɩt tɩ bũmb ning fãa sẽn tar waoogr dũniyã zugã lebg zaalem.

¹⁰Tarsɩɩs tẽn-neere, pɩʋʋg f tẽngã wa b sẽn pɩʋʋgd Nill kʋɩlgã, zɩɩb ka leb n be tẽngã ye.

¹¹Sẽn-Ka-Saab tẽega b nugã ko-kãsengã zugu. Bãmb kɩtame tɩ soolem-dãmb rigimdi. Bãmb kõo noor tɩ b sãam Kana pãng zĩisã.

¹²Sẽn-Ka-Saab yeelame: «Sɩdõ tẽn-neere, da leb n maan sũ-noog yɛs ye, b maana foom pãng wa b sẽn yõg pa-kuili. Yik n pɩʋʋg n kẽng Sɩpr sẽnẽ! Baa beenẽ, yãmb ka na n paam vʋʋsg ye.»

¹³Ad Kalde rãmbã tẽnga, ned ka leb n ket beenẽ ye. Asiiri nebã kɩtame tɩ tẽngã lebg we-rũms zĩiga. Bãmb mee gũudb gãsd zabr yĩnga, bãmb sarma Tɩɩr tẽngã na-yiyã, n kɩt t'a lebg tom-dʋya.

¹⁴Tarsɩɩs koom kogendo, yãb-y n wiis-y-yã! Bala, b sãama yãmb pãng zĩigã zãnga!

¹⁵Wakat-kãnga, b na n yĩma Tɩɩr tẽngã yell hal tɩ ta yʋʋm pis-yopoe, wa sẽn zems rĩm yʋʋm sẽn kaoosd to-to wã. La yʋʋm pis-yopoe wã loogr poore, Tɩɩr tẽngã na n lebga wa yɩɩll b sẽn yɩɩnd pʋg-yoodr wɛɛngẽ n yetẽ:

¹⁶Pʋg-yoodr b sẽn yĩm f yelle, rɩk pɛndg n gilg tẽngã! Wẽedẽ la f yɩɩnd f yɩɩlã, tɩ nebã tõe n leb n tẽeg f yelle!

¹⁷Yʋʋm pis-yopoe wã poore, Sẽn-Ka-Saab na n leb n gesa Tɩɩr tẽngã yelle, la Tɩɩr tẽngã na n leb n sɩng n deegda yaood a tʋʋm-dẽgdã yĩnga. Yẽnda na n maana yoob ne dũniyã soolem-dãmbã fãa sẽn be tẽng zugã gilli.

¹⁸B na n dɩka yẽnda sẽn paam bũmb ningã ne a yaoodã n kõ Sẽn-Ka-Saabo. La b ka na n tigs bõn-kãnga, b ka na n bĩng-a me ye. Yõod ning yẽnda sẽn paamã na n yɩɩ neb nins sẽn be-b Sẽn-Ka-Saab taoorã n na n sooge, n dɩt n tɩgda, la b yeelgd fu-neeba.