Read SEBR SÕNGO, 1998 A Ezayi 28 Bible Online

A Ezayi 28 - SEBR SÕNGO, 1998 bible

A Ezayi 28

¹Kayto! Efrayiim rã-yũudbã naam puglã na n paama toogo, tɩ-puud nins sẽn yaa yẽnda ziir n be kunkubr ning sẽn tar long sẽn bʋgs zugã zelgame. Yaa neb nins reezẽ rãam sẽn lubdã, bãmb na n paama toogo!

²Zu-soabã gãndaoog sẽn tar raood n wate, a wata wa sob-kãseng sẽn tũnug sapɩlma, yaa sob-fugdg sẽn sãamda, wa sa-kẽeng sẽn niid ko-bɛd sẽn tar pãnga. Yẽnda na n luba tẽngã ne pãnga.

³B na n taba Efrayiim rã-yũudbã naam puglã ne nao,

⁴la tɩ-puud nins sẽn yaa neeb n be kunkubr ning sẽn tar long sẽn bʋgs zug n zelgã na n yɩɩ wa kankan-dẽeng sẽn bɩ, tɩ bõn-bɩʋʋng nan ka ta ye. Ned sẽn fãsg-a yee, la a sẽn leems-a.

⁵Badaare, Saasẽ-Pãng-Soabã na n yɩɩ b nebã sẽn kellã naam pugla la, b waoogr maanfo.

⁶Bãmb na n yɩɩ zemsg sɩɩga, n soog ned ning sẽn zaoond-a n na n kao bʋʋdã, la b yɩ pãng n soog neb nins sẽn zabd ne bɛyã, tɩ b rig-a n tɩ tãag tẽngã noore.

⁷Bãmb me yũu reezẽ rãam n zʋbsdẽ, rã-toosã kɩtame tɩ bãmb nens yilimdẽ. Maan-kʋʋdbã ne sẽn yãt-b vẽnegrã yũu reezẽ rãam n zʋbsdẽ, rãamã sooga bãmb zãnga, rã-toosã kɩtame tɩ bãmb nens yilimdẽ. Bãmb yãabã kɩtame tɩ b zʋbsdẽ, b yamã yuusda b yam-yãkrã pʋga.

⁸Bãmb taabl-dãmbã fãa pida ne b wʋbdã, la b rẽgdã, tɩ vɩʋʋg ka leb n beẽ ye.

⁹Bãmb yetame: «Ãnda la a Ezayi rat n zãms bãngre? Ãnda la yẽnda rat n kɩt t'a wʋm koɛɛgã võore? Sã n ka kamb sẽn nan bas bĩisim, yaa kamb sẽn nan sig n bas b ma.

¹⁰Yaa noor ne noore, yaa tõog ne tõogo, toadg ne toadga, yaa bilf ka, la bilf ka sẽnẽ.

¹¹Beneere, yaa bɩ-bɩt-bɩte, goam sẽn ka tar võore, yaa goam buud a to la bãmb na n gom ne nin-bãmbã.»

¹²Bãmb dag n yeel-b lame yaa: «Ad vʋʋsgo! Bas-y sẽn yɛɛ-a wã t'a vʋʋse. Ad yaa vʋʋsgo!» La bãmb ka sak n kelg ye.

¹³Ne nin-bãmbã, Sẽn-Ka-Saab goamã na n yɩɩ wa: Yaa noor ne noore, yaa tõog ne toogo, toadg ne toadga, yaa bilf ka, la bilf ka sẽnẽ. Sẽn na n yɩlẽ tɩ b sã n kẽnd bɩ b lagsd n lʋɩt zãmbɛɛl n kaoodẽ, bɩ bẽodgã paam-b n yõke.

¹⁴Nin-tʋʋdba, kelg-y Sẽn-Ka-Saab koɛɛga, yãmb-dãmb sẽn so Zeruzalɛm nebã!

¹⁵Yãmb yetame: «Tõnd maana kaool ne kũum, tõnd maana yẽsg ne kɩɩm-kulgu. Sẽn na n yɩl tɩ sãoongã sã n wa, wa ko-pɛm sẽn fõt n wat ne pãnga, bɩ a ra paam tõnd ye. Tõnd dɩka zĩrẽ tɩ yaa tõnd zĩ-lilldga, la d rɩk belgr tɩ yaa d solgr zĩiga.»

¹⁶Bõn-kãng yĩng kɩtame tɩ Zu-soab a Wẽnnaam yetẽ: «Ade, mam vigla kugr sẽn tar pãng Sɩyõ. Yaa kugr sẽn yaa sõama n be soakã zĩigẽ, yaa kugr sẽn tar yõodo, la a vigla kãenkãe. Sẽn teeg-a kug-kãng ka baood n zoe ye.

¹⁷Mam vigla zemsg tɩ yaa magdga, la tɩrlem tɩ yaa zemsg makdga. Sapɩlem na n looga ne zĩrẽ-beed zĩ-lilldgã, ko-zoetmã na n kãaga zĩ-solgdsã fãa n looge.»

¹⁸Yãmb sẽn maan kaool ning ne kũumã na n vaalame. Yãmb sẽn maan yẽsg ning ne kɩɩm-kulgã ka na n tõog ye. Sãoongã sẽn fõt n wat ne pãng wa ko-pɛmã sã n wa, a na n sãama yãmba.

¹⁹A sẽn na n pɩʋʋg wakat ning fãa, a na n kãaga yãmba. Bala, a na n pɩʋʋga yibeoog fãa, la ne wĩndg la yʋngo, la a bʋrgã bal na n kẽesa rabeem.

²⁰Gãagã na n yɩɩ koɛɛg wʋsg tɩ ned ka tõe n tẽeg a meng a zug ye. La fu-goabgã na n yɩɩ bilf tɩ ka sekd pilb ye.

²¹Bala, Sẽn-Ka-Saab na n yika zabr ne bãmb wa Paratsim tãngã sɛɛgã. Bãmb na n yik n maana b tʋʋmd wa b sẽn dag n maan Gabawõ tẽn-nabdrẽ wã, yaa tʋʋm-kãseng ning bãmb sẽn maanã, b na n yik n maana tʋʋm-bãnde, b na n pidsa tʋʋmd sẽn yaa bõn-lingdga.

²²Moasã, da yɩ-y nin-tʋʋdba, tɩ b ra wa tak yãmb sẽbdsã tɩ lebg kãenkãe ye. Bala, b yãka yam n na n sãam tẽnga zãnga. Yaa Sẽn-Ka-Saab sẽn yaa Saasẽ-Pãng-Soabã n togs maam.

²³Yok-y y tʋb n kelg maam! Gũus-y y meng n kelg mam koɛɛgã!

²⁴Ka-koaad sã n dat n war a pʋʋg n bʋde, a tara warb bal n ka basdẽ la? Yẽnda koodame la a bẽesdẽ n ka basdẽ la?

²⁵Yẽnda sã n maneg a zĩigã n sɛ, a fẽrgda siili la a fẽrg kĩu, a bʋta ki runug-runuga, n yãk zĩig n bʋd orze, la a bʋd bõn-koaadl a taab kɩremsã.

²⁶Yẽnda Wẽnnaam zãmsa yẽnda a sẽn tog n maane, Wẽnnaamã zãms-a-la bõn-kãnga.

²⁷B ka tog n pãb siil ne rasab ye, la b ka tog n tab kĩu ne sarɛt ye. B fʋkda kĩu teoogẽ, la b pãbda ki ne dasaare.

²⁸B tog n wera bɩle n maan buri, la b ka tog n pãbd-a n ka basdẽ ye. B sã n bilimd sarɛtã ne te-sogdɩ wã, bɩle wã zugu, a ka wãad ye.

²⁹Bõn-kãng fãa yita Saasẽ-Pãng-Soabã nengẽ. Bãmb saagrã yaa sõama, la b sẽn tar yam ningã yaa kãsenga.