Read SEBR SÕNGO, 1998 A Ezayi 33 Bible Online

A Ezayi 33 - SEBR SÕNGO, 1998 bible

A Ezayi 33

¹Fo sẽn sãamd neb a taaba, tɩ b yaool n ka sãam foomã, la f zãmbd neb a taab tɩ b ka zãmb foomã, fo na n paama toogo! Fo sã n wa sãam neb a taabã n sɛ, b na n sãama foom. Fo sã n wa zãmb neb a taabã n sɛ, b na n zãmba foom.

²Sẽn-Ka-Saabo, zoe-y tõnd nimbãanega! Tõnd dɩka d teegrã n teeg yãmba. Bɩ y yɩ tõnd pãng yibeoog fãa, la y yɩ tõnd fãagr d yel-pakr wakate!

³Bʋrgã rãamd kɩtame tɩ nebã zoetẽ. Yãmb sã n yiki, buud toay-toayã sãeegdame.

⁴B zɛɛda yãmb paoongã wa sʋy sẽn dɩt koodo. B rengda taab wa sʋy sẽn dengd taab to-to wã.

⁵Sẽn-Ka-Saab zẽkame n yɩɩd fãa, bala, bãmb bee hal yĩngri. Bãmb pidsa Sɩyõ ne zemsgo la tɩrlem.

⁶Yãmb a Sẽn-Ka-Saab nebã, yãmb na n vɩɩmda ne bãane. Yam ne Wẽnnaam bãngr na n yɩɩ arzɛk sẽn fãagd yãmba. La Sẽn-Ka-Saab zoees yaa laogo.

⁷Ade, gãndaadã bee yɩng n wiisdẽ. Vɩ-bãan koe-toagsdbã yãbdame n wiisdẽ.

⁸Soayã kell n paa vɩɩdo. So-loaadb ka leb n beẽ ye. Na-toaagã sãama kaoolã, yẽnda paooga tẽmsã, la a ka nand ned ba a yembr ye.

⁹Tẽngã bee sũ-sãang pʋga, la a sãamdame. Yãnd tara Libã tãngã t'a kʋɩtẽ. Saaron tẽn-nabdrã lebga wa rasempʋɩɩga. Basã ne Karmell tɩɩsã vãad sʋʋgame.

¹⁰Sẽn-Ka-Saab yetame: «Moasã, mam na n yikame, moasã, mam na n yalsa yĩngri, moasã, mam na n paama zẽkre.

¹¹Yãmb dɩka mo-pui pʋga, yãmb na n doga moogo. Yãmb vʋʋsmã yaa wa bugum, la a na n dɩɩ yãmba.

¹²Nebã na n yɩɩ wa kõab sẽn dɩ bugum wʋng pʋga, b na n yɩɩ wa b sẽn kɛ gõos n ning bugmẽ.

¹³Yãmb dãmb sẽn be zĩ-zãrgẽ, kelg-y mam sẽn maan bũmb ningã! La yãmb dãmb sẽn pẽ wã, ges-y mam pãngã sẽn tõe n maan bũmb ninga!

¹⁴Rabeem kẽe yel-wẽn-maandbã sẽn be Sɩyõ wã, wẽn-kɩɩsdbã rigdame. Ãnda n be tõnd sʋkã n tõe n yals bugum ning sẽn dɩt-a wã taoore? Ãnda n be tõnd sʋkã n tõe n yals bug-saal ning sẽn ka tol n kiidẽ wã taoore?

¹⁵Yaa ned ning sẽn kẽnd-a ne tɩrlem, la a gomd sɩda, n ka baood n maan zãmb n paam paoongo, la a pĩmsd a nus n ka rat n deeg zãmb kũuni, n yẽt a tʋb n ka rat n wʋm tɩ b gomd zɩɩm daagr yelle, la a mumd a nin n ka rat n ges sẽn yaa wẽng ye.

¹⁶Nin-kãngã soab na n zĩnda zĩ-zãonglsẽ. Pĩis sẽn tar pãng na n yɩɩ yẽnda pãng zĩiga. B na n kõo yẽnda rɩɩbo, la koom kõn paoog-a ye.»

¹⁷Fo nin na n yãnda rĩma b ziirã pʋga, bãmb na n yãnda tẽngã ne a yalmã fãa.

¹⁸Fo na n tagsa bũmb ning sẽn kẽes foom dabeemã yelle. Seb-gʋndã bee yɛɛnẽ? Yaood dɛɛgdã bee yɛɛnẽ? Sẽn dag n gilgd-a n get gãsdã bee yɛɛnẽ?

¹⁹Fo kõn leb n yãnd buud ning sẽn yaa tɩta-nedã ye, buud ning sẽn gomd tɩ ned ka wʋmdẽ wã, buud sẽn gomd gom-zẽng tɩ ned ka wʋmdẽ wã.

²⁰Ges Sɩyõ, tẽng ning pʋg tõnd sẽn maand d tigã! Fo nin na n yãnda Zeruzalɛm sẽn yaa yam-gãneg tẽngã. Yaa fu-roog sẽn kõn tol n viigi, b kõn tol n leb n vigs biili wã ye. La b kõn tol n leb n logs a wĩyã ye.

²¹Sɩdã, yaa tẽn-kãng pʋg la Sẽn-Ka-Saab na n wilg b sõmblem tõnd yĩnga. Bãmb na n kɩtame tɩ d zĩigã lebg kʋɩlse, n tar ko-so-yalemse, n yaa zĩig zabr koom kogend sẽn kõn tũ ye, la koom kogl-bɛd ka na n pɩʋʋg-a ye.

²²Bala, Sẽn-Ka-Saab n yaa tõnd bʋ-kaooda, Sẽn-Ka-Saab n yaa tõnd naaba, yaa bãmb n yaa tõnd dĩma. Bãmb n yaa tõnd fãagda.

²³Fo wĩyã yolsame. B ka leb n sẽb kãenkãe ne tãb-kaoor daoogã ye, b ka leb n tar bãmb n loet kogendã pɛɛlã n tẽegdẽ ye. Dẽ, b na n pʋɩɩ taab te-zɛɛdem wʋsgo. Koms-rãmbã meng na n naag n zɛɛ teedã.

²⁴La tẽngã ned kõn yeel t'a ka keem ye! Neb nins sẽn be tẽn-kãng pʋgã na n paama b kongrã sugri.