Read SEBR SÕNGO, 1998 A Ezayi 34 Bible Online

A Ezayi 34 - SEBR SÕNGO, 1998 bible

A Ezayi 34

¹Buud toay-toayã, kolg-y n kelg-y-yã! Neba, yok-y y tʋb n kelge! Bɩ tẽngã ne bũmb ning fãa sẽn be a pʋgẽ wã kelge, la bɩ dũniyã ne bũmb ning fãa sẽn yit yẽnda pʋgẽ wã kelge!

²Bala, Sẽn-Ka-Saab sũ-puugrã na n siga buudã fãa zugu, la bãmb sũ-kãbrã na n siga b tãb-biisã fãa zugu. Bãmb na n sãam-b-la zãnga, b na n kʋʋ bãmba.

³B na n wʋka bãmb kũumã n lobe, bãmb kũumã yũug rukdame, la bãmb zɩɩmã na n zoee tãmsã zutu.

⁴Ãdsã sẽn be yĩngrã fãa na n far n dʋʋgame. B na n pila sa-gãongã wa seb-vãoogo, la yẽnda tãb-biisã na n sʋʋga wa reezẽ tɩɩg bɩ kankang vãad sẽn sʋʋgdã.

⁵Bala, mam zabr sʋʋgã tɩga zɩɩm saasẽ, la a sigda Edom zugu, a sigda neb nins mam sẽn na n sãam zãngã zugu, n kao b bʋʋdo.

⁶Sẽn-Ka-Saab zabr sʋʋgã pida ne zɩɩm, kaam mad-a lame, yaa pe-ribli wã ne boeesã zɩɩm, kaamã yaa pe-raadã yiim kaam. Bala, b na n maana maoong Bosra Sẽn-Ka-Saab yĩnga, la koodg wʋsg n na n zĩnd Edom tẽngã.

⁷We-niigã na n naaga bãmb n ki, la nag-yãansã ne lolsã na n kiime. Bãmb tẽn-gãongã yũu zɩɩm, la kaam madga a tomã.

⁸Bala, yaa Sẽn-Ka-Saab sũ-dokr daare, yaa yʋʋmd b sẽn na n sɩbg sẽn nams-b Sɩyõ wã n lebse.

⁹Edom ko-soodã na n gãnega sũudu, t'a tẽngã tom rɩ bugum wa kidbri. A tẽn-gãongã na n koka bugum wa sũudu sẽn dɩt bugum.

¹⁰La a na n wita wĩndg ne yʋng n ka kiidẽ ye. Tẽngã bug-zõosã na n dukda wakat fãa. Tẽn-kãng na n kell n yɩɩ raboog zamaan woo zamaane, la ned kõn leb n pɩʋʋg a pʋgẽ ye.

¹¹Tẽngã na n lebga bakard ne yʋgempɛl zĩiga. Be na n lebga viut ne gãabd gãag zĩiga. Sẽn-Ka-Saab na n tẽega sãoong wiirã n mak-a, la b kɩt t'a lebg vɩ-raoogo.

¹²Nanambsã kõn leb n zĩnd beenẽ n kos rĩm ye. B nanambsã fãa ba a yembr kõn leb n zĩnd ye.

¹³Gõos na n yi a na-yiyã pʋse, sɩlg-nao-yẽes ne gõpayãnds na n yii b tãn-soben-dotã pʋse. Beenẽ na n lebga we-baas zĩiga, la naneend gãag zĩiga.

¹⁴We-yũus ne kata na n segda taab beenẽ, la boees na n yãbda beenẽ n boond taaba. Zĩ-kãng na n lebga yʋng zĩn-dãmb sõasg zĩiga, b na n kẽnd n vʋʋsda beenẽ.

¹⁵Waaf na n maana a põk beenẽ n lob a gɛla, a na n põgend-b lame n wek a kamba. Yɩbrendã na n tigma taab beenẽ.

¹⁶Bao-y Sẽn-Ka-Saab sebrã n karme! Gom-bãmb ba a yembr ka na n paoog ye. Bala, yaa bãmb meng noor n yeele, la yaa Sẽn-Ka-Saab sɩɩgã n na n tigim-ba.

¹⁷Yaa Sẽn-Ka-Saab n maan poeer bãmb yĩnga, la yaa bãmb meng nug n dɩk wĩir n mak tẽn-kãngã. Bãmb na n soog-a-la wakat fãa yĩnga, la b na n paa beenẽ zamaan woo zamaane.