Read SEBR SÕNGO, 1998 A Ezayi 40 Bible Online

A Ezayi 40 - SEBR SÕNGO, 1998 bible

A Ezayi 40

¹Yãmb Wẽnnaamã yetame: «Bels-y mam nebã, bels-y-ba.

²Gom-y n paas-y Zeruzalɛm daoodo, moon-y n yeel-y t'a yembdã sɛɛme, t'a paama a kongrã sugri, t'a zoe n deega a yel-wẽnã sɩbgr naoor a yiib Sẽn-Ka-Saab nengẽ.»

³ Ned n kelemd n yetẽ: «Tuk-y Sẽn-Ka-Saab sor we-raoogã pʋga! Kõog-y so-kõodr tẽn-nabd-koɛɛngẽ wã tõnd Wẽnnaamã yĩnga!

⁴Bɩ y sĩd londã, la y sarem tãmsã ne kunkubã fãa! Kɩt-y tɩ tãn-bɛda lebg zĩ-pɛɛla, la y kɩt tɩ tãmsã sẽgsã lebg zĩ-yalemse!

⁵Dẽ, Sẽn-Ka-Saab ziirã na n pukame, tɩ nebã fãa naag taab n yãnd-a.» Yaa Sẽn-Ka-Saab meng noor n yeele.

⁶Koɛɛg n yet yaa: «Moone!» Tɩ b soke: «M moon n yeel tɩ bõe?» T'a yeele: «Moon n yeel tɩ ninsaal buud fãa yaa wa moodo, la a neermã fãa wẽnda weoog mo-pui.

⁷Sẽn-Ka-Saab sebgã sã n wẽ moodã, a kʋɩtame, la a mo-pui wã zelgdame. Sɩd-sɩdã, nebã wẽnda moodo.

⁸Mood kʋɩtame, la mo-pui zelgdame. La tõnd Wẽnnaamã gomd paada wakat fãa!»

⁹Sɩyõ-rãmba, yãmb sẽn yaa b rãmb sẽn wat ne koe-noogã, rʋ-y tãn-lug-lug zugu. Zeruzalɛm, zẽk f koɛɛg ne pãnga, fo sẽn wat ne koe-noogã. Zẽk f koɛɛg la f ra zoe rabeem ye. Yeel Zʋʋda tẽmsã yaa: «Yãmb Wẽnnaamã beeme!»

¹⁰Zu-soab a Sẽn-Ka-Saab wata ne pãnga, bãmb yãoog pãng tõeeme tɩ b rɩ naam. Ade, bãmb zãada b yaood n watẽ, bãmb keoor dengda bãmb taoore.

¹¹Bãmb dɩlgda b nebã wa pe-kɩɩm sẽn wãbenegd a rũmsi, bãmb na n tẽega b nug n tigim b piisã, n kãag-b n mobg b menga. Bãmb lekda pe-yãansã sẽn yẽsemd kambã.

¹²Ãnda soab n mak ko-kãsengã ne a nug pʋga? Ãnda n mak yĩngr ne nug-yakemde? Ãnda n mak tẽn-gãongã tom fãa ne makdga? Ãnda n dɩk tãmsã ne kunkubã n ning zɩslem makdg pʋg n make?

¹³Ãnda n mak Sẽn-Ka-Saab Sɩɩgã, la ãnda n yaa bãmb sagenda?

¹⁴Wẽnnaam zĩnd n yẽsa ne ãnda n na n paam n wʋm bũmb võore? Ãnda n zãms bãmb zemsgo? Ãnda n zãms bãmb bãngre? Ãnda n kɩt tɩ bãmb bãng yam sore?

¹⁵Bu-zẽmsã wẽnda wa koom sẽn be yʋʋr pʋg n tosdẽ, bãmb sõorã zemsa wa wubsg sẽn be zɩslem makdg zugu. Tẽms nins koom sẽn gũbgã yaa faasg wa wubsg sẽn dukda.

¹⁶Libã tɩɩsã raad ka sekd bugum yõgneg ye. La a rũmsã ka sekd maoong sẽn yõogd bugum maaneg ye.

¹⁷Bu-zẽmsã fãa yaa zaalem bãmb taoore. Bãmb geta bu-zẽmsã wa zaalem la vɩʋʋgo.

¹⁸Ãnda la yãmb na n dɩk n mak ne Wẽnnaam? Yãmb na n dɩka bõe n wẽneg Wẽnnaam?

¹⁹Tʋʋm-mit n maand bõn-naandga, tɩ yõak bolg-a ne sãnem n bao wanzuri yãmd n ning-a.

²⁰Ned sã n yaa naong soab tɩ looge, n ka tõe n maan kũun-kãnga, a baooda raoog sẽn ka põogda, n kɩs tʋʋm-mit t'a maan bõn-naandg sẽn ka yẽrgda.

²¹Yãmb ka mi la? Yãmb ka wʋm la? B ka reng n togs yãmb bõn-kãens hal sɩngr wẽndẽ la? Yãmb ka wʋm dũniyã yẽbgr võor la?

²²Bãmb bee dũni gilgã zugẽ, n get dũni-kãngã nebã tɩ b yaa wa sʋyã. Bãmb yɛdga sa-gãongã wa peen-faasga, bãmb yɛdg-a lame tɩ lebg wa fu-roog n na n zĩnd a pʋgẽ.

²³Sẽn-Ka-Saab n kɩt tɩ nanambs lebg zaalem, n kɩt tɩ dũni bʋ-kaoodb lebg ka võore.

²⁴B sẽn nan ka sel bãmba, la b sẽn nan ka bʋd bãmba, la bãmb sẽn nan ka kɩ yẽga, Sẽn-Ka-Saab fʋʋs bãmb zug tɩ b kʋɩ. Sob-kãseng n wa n dɩk bãmb wa moodo.

²⁵Pʋ-Peelem-Soabã sokdame yaa: «Ãnda la y na n dɩk n mak maam, n tags tɩ mam wẽnda a soaba?

²⁶Zẽk-y y nens n ges yĩngri! Ãnda soab n naan bõn-kãensã fãa n kɩt tɩ b fãa pukd wa tãb-biisi? Bãmb boonda ned kam fãa ne a yʋʋre, la yaa ne bãmb pãn-tõ-kãsengã ne b pãn-kãsengã.»

²⁷A Zakoob yagense, Israyɛll buudu, bõe yĩng tɩ yãmb yetẽ tɩ: «Mam beoog vɩɩmã solga ne Sẽn-Ka-Saabo, mam sẽn segd n paam bũmb ningã loogdame tɩ mam Wẽnnaamã ka miẽ ye?»

²⁸Fo ka mi bõn-kãng la? Fo ka wʋm bõn-kãng la? Sẽn-Ka-Saab sẽn yaa Wẽnnaamã sẽn paad wakat fãa wã n naan dũniyã ween-vɩɩsã fãa. Bãmb pãng ka sɛta, la b ka yɛɛd me ye. Ned ka tõe n bãng bãmb yamã tɛk ye.

²⁹Bãmb kõta ned ning sẽn yɛ wã pãnga, la ned ning pãng sẽn booge, bãmb paasda a soab pãnga.

³⁰Kom-pogd pãng boogdame tɩ b yɛ, kom-bɩɩs wat n baas n lʋɩɩme.

³¹Sẽn tẽed-b Sẽn-Ka-Saabã pãng palemdame. Bãmb yɩgda wa pa-nand-tugri, bãmb zoetame n ka yɛɛdẽ ye, bãmb kẽndame la b pãng ka sɛt ye!