Read SEBR SÕNGO, 1998 A Ezayi 41 Bible Online

A Ezayi 41 - SEBR SÕNGO, 1998 bible

A Ezayi 41

¹Tẽms nins koom sẽn gũbgi, bas-y bʋʋr n kelg maam! Bɩ nebã keng b pelse, bɩ b kolg n gome! Bɩ d kolg n bʋ ne taaba.

²Yaa ãnda n yik yaang raoã[4] sẽn yaa soab ning sẽn paamd tõogr zĩig ning fãa yẽnda naoor sẽn tabgẽ wã? Ãnda n dɩk soolem-dãmb n ning yẽnda nugẽ, la b sik rĩm-dãmbã? Yẽnda zabr sʋʋgã neema bãmb wa wubsgu, yẽnda tãpã kɩtame tɩ bãmb lebg wa mood sobg sẽn dɩkda.

³Raoã rigd-b lame n pɩʋʋg b sʋk n loog ne tõogre, n tũ sor ning yẽnda naoor sẽn zɩ n tabgẽ wã.

⁴Ãnda n tʋme, ãnda n maan bõn-kãnga? Yaa soab ning sẽn kɩt-a tɩ zamaan fãa be hal sɩngr wẽndẽ wã. Maam a Sẽn-Ka-Saab yaa dẽenem soaba, la mam bee ne yaoolem-dãmbã me.

⁵Tẽms nins koom sẽn gũbgã yãnd-b lame tɩ rabeem yõk-ba. Dũniyã ween-vɩɩsã fãa rigdame. Bãmb fãa kolgdame, b watame.

⁶Bãmb sõngda taaba, tɩ ned kam fãa yet a to yaa: «Keng f pɛlga!»

⁷Tʋʋm-mit paasda sẽn yẽnegd-a kutã raoodo. Sẽn zãad-a zãar n kutẽ wã paasda a to pãnga. Yẽnda yeta sẽn sũgunda wã yaa: «Yaa sõama» La bãmb kaada wẽn-naandgã ne põent-rãmba, sẽn na n yɩl t'a ra miim ye.

⁸La foom a Israyɛll sẽn yaa mam tʋmtʋmdã, foom a Zakoob mam sẽn yãkã, fo yaa mam zoa a Abrahaam yagenga!

⁹Maam n yãk foom dũniyã ween-vɩɩsã fãa pʋgẽ, la m bool foom tɩ f yi zĩ-zãrsẽ n wa, n yeel foom yaa: «Fo yaa mam tʋmtʋmda, maam n yãk foom, mam kõn bas foom ye!

¹⁰Da zoe rabeem ye, bala, mam bee ne foom. Da maan yɩɩr ye, bala, mam yaa fo Wẽnnaam. Mam kõta foom pãnga, la m na n wa sõnga foom, mam na n tebenda foom ne m nug-rɩtg sẽn tõogdã.

¹¹Neb nins fãa sũy sẽn puud ne foomã na n paama yãnd ne paoogre. Sẽn zabd-b ne foomã na n lebga zaalem n meneme.

¹²Fo na n gẽesa f zabd-n-taasã n ka yãnd ye, B na n sãama bãmb tɩ b lebg zaalem la vɩʋʋgo.

¹³Bala, mam yaa Sẽn-Ka-Saab sẽn yaa fo Wẽnnaam, soab ning sẽn gãta fo nug-rɩtg n yet-f yaa: Da zoe rabeem ye. Mam wat n na n sõnga foom.

¹⁴Zakoobe, fo sẽn yaa wa zũnzuur balã, da zoe rabeem ye, Israyɛlle, fo yaa zũnzuur bala. Mam wa n na n sõnga foom. Yaa maam a Sẽn-Ka-Saab sẽn yaa fo fãagda, n yaa Israyɛll Pʋ-Peelem-Soabã n yeele.

¹⁵Gese, mam na n kɩtame tɩ fo yɩ wa soang b sẽn toose, n yaa paalle, n tar noy a yiib sẽn dɩte. Fo na n wãame, la f neem tãmse, fo na n kɩtame tɩ kunkub lebg wa wudgu.

¹⁶Fo na n yelga bãmb tɩ sobg rɩk n looge, sob-kãseng na n sãeega bãmba. La sã n yaa ne foom, fo na n maana sũ-noog Sẽn-Ka-Saab yĩnga. Fo na n kɩdma Israyɛll Pʋ-Peelem-Soabã yĩnga.

¹⁷Nimbãan-nebã ne naong rãmbã baooda koom n ka paamdẽ ye. Ko-yũud kʋɩɩsa bãmb zɛlma. Maam a Sẽn-Ka-Saab na n leoka bãmba. Maam a Israyɛll Wẽnnaamã ka na n bas-b ye.

¹⁸Mam na n kɩtame tɩ kʋɩls ko-zoetem pus n yi soay kɩremse, la m kɩt tɩ ko-budum yi tãms lond pʋse. Mam na n teka we-raoogã t'a lebg kʋɩlga, la m tek tẽn-koɛɛngã t'a lebg ko-budum zĩiga.

¹⁹Mam na n sela sɛɛdr tɩɩse, ne akasɩya tɩɩse, la miir la oliiv tɩɩs we-raoogã pʋga. Mam na n lagma sɩprɛs tɩɩse, orme tɩɩs ne tɩɩs buud toay-toay n sel Araba tẽn-nabd-koɛɛngẽ zugu.

²⁰Tɩ bãmb fãa tõe n yãnd la b bãnge, la b naag taab n tags n bãng tɩ yaa Sẽn-Ka-Saab nug n maan bõn-kãng fãa, la b tõe n bãng tɩ yaa Israyɛll Pʋ-Peelem-Soabã n naan yẽnda.»

²¹Sẽn-Ka-Saab yeelame: «gom-y n fãag-y y menga. A zakoob rĩmã yetame yaa: ‹wa-y ne kaseto.

²²Bɩ b kolg n gome. La bɩ b togs tõnd bũmb ning sẽn na n wa zĩndi. Togs-y sẽn loog pĩnda, Togs-y tõnd bũmb ning sẽn zĩnd pĩnda, dẽ, tõnd na n tags n bãnga sẽn wate. Wall y wilg tõnd yɛl nins sẽn wate.

²³Togs-y bũmb nins sẽn nan be taoor n watẽ wã, dẽ, tõnd na n bãngame tɩ yãmb yaa wẽnnaam-dãmba. Bɩ y maan bũmb sẽn yaa sõama bɩ wẽnga, tɩ tõnd fãa tõe n puk d nin n yãnde.

²⁴Gese, yãmb yaa zaalem bala, la yãmb tʋʋmã me yaa zaalem tɩ ned ka mi-b ye. Sẽn yãk-a yãmb tɩ y yaa a wẽnnaamã maana yel-beedo.

²⁵Mam kɩtame tɩ ned yi hal nug-rɩtg sẽnẽ n wa. Sẽn yit-a hal yaangã pʋʋsda ne mam yʋʋre, yẽnda na n taba nanambsã wa tãndo, a na n tab-b-la wa yagb sẽn tabd yagd to-to wã.

²⁶Ãnda n togs-a hal sɩngr wẽndẽ tɩ tõnd bãng tɩ ket n zãra? Ãnda n togs bõn-kãng tɩ tõnd bãng n yeel tɩ yaa tɩrga? Ned ba a yembr ka togs-a ye, ned ka maan tɩ d wʋm ye, la ned ka wʋmd yãmb goam ye.»

²⁷Soab ning sẽn yɩ-a pipi n wa Sɩyõ wã yetame: «Bãmb bee ka!» Mam tʋma ned Zeruzalɛm t'a tɩ togs koe-noogo.

²⁸Mam gesame la ned ka be ye. Ned ka be bãmb sʋkã n tõe n kõ saglg ye. Mam dag na n sokẽ-la bãmb tɩ b leok-ma!

²⁹Bãmb fãa yaa zaalem, bãmb tʋʋmã yaa zaalem. Bãmb wẽn-naandsã yaa wa sobg la vɩʋʋgo.