Read SEBR SÕNGO, 1998 A Ezayi 43 Bible Online

A Ezayi 43 - SEBR SÕNGO, 1998 bible

A Ezayi 43

¹Moasã, Sẽn-Ka-Saab sẽn yaa soab ning sẽn naan-a foom a Zakoobã, sẽn naan-a foom a Israyɛllã yetame: «Da zoe rabeem ye. Bala, mam fãagda foom. Mam boonda foom ne f yʋʋre, fo yaa maam dẽnda!

²Fo sã n pɩʋʋgd koom, mam na n zĩnda ne foom. Fo sã n dʋʋgd kʋɩlse, koomã ka na n loog ne foom ye. Fo na n kẽna bugum pʋga, la bugmã kõn dɩ foom ye, bug-witmã kõn sãam foom ye.

³Bala, mam yaa Sẽn-Ka-Saab sẽn yaa fo Wẽnnaam, Israyɛll Pʋ-Peelem-Soabã yaa fo fãagda. Mam dɩka Ezɩpt n yao n deeg foom, la m dɩk Kuus ne Seba n kɩs fo zĩigẽ.

⁴Fo sẽn tar yõod mam nifẽ wã yĩnga, b sẽn waoog foomã, la mam sẽn nong-fã yĩnga, mam dɩka neb n kɩs fo zĩigẽ, n dɩk buud n yao fo vɩɩmã yĩnga.

⁵Da yɛɛs ye. Bala, mam bee ne foom. Mam na n talla fo yagensã sẽn be yaangã n wa, la m kɩt tɩ fo nebã yi nin-taoor n wa tigim taaba.

⁶Mam na n yeela rɩtg rãmbã tɩ b kɩs-yã! La m yeel goabg rãmbã tɩ b ra gɩdg-y ye! B kɩt tɩ mam kom-dibli wã yi tẽn-zãrsẽ n wa, la f kɩt tɩ m kom-pugli wã yi dũniyã kɩremsã n wa.

⁷Yaa neb nins fãa sẽn boond mam yʋʋrã, mam sẽn naan-b rãmb mam waoogr yĩngã, neb nins sẽn yaa mam nus tʋʋmdã.»

⁸Bɩ b kɩt tɩ nin-bãmb sẽn yaa zoensã wa! Baa ne b sẽn tar ninã, b ka ne ye. Baa ne b sẽn tar tʋbã, b ka wʋmd ye.

⁹Bɩ soolem-dãmbã fãa wa tigim taaba. La bɩ buudã naag taaba! Bãmb sʋkã ned a bõe n togs bãmb bõn-kãnga? La nin-bʋg bãmb sʋkã n wilg tõnd sẽn yɩ to-to pĩndã? Bɩ b wa ne b kaset rãmb tɩ b wilg tɩ yaa sɩda! Bɩ nebã kelg-b n yeel tɩ yaa sɩda!

¹⁰Sẽn-Ka-Saab yetame: Yãmb yaa mam kaset dãmba, la yãmb yaa mam tʋmtʋmdb mam sẽn yãke, sẽn na n yɩl tɩ yãmb bãng tɩ y tẽeda maam, n miẽ tɩ yaa maam, la sẽn deng maam, Wẽnnaam a to ka be b sẽn naanẽ, la a to me ka be sẽn na n leb n zĩnd ye.

¹¹Yaa maam bala, maam m yembr bal n yaa Sẽn-Ka-Saabo. Sã n ka maam, fãagd a to ka be ye.

¹²Maam n wilgi, maam n fãage, ka wẽnnaam-sãang n be yãmb sʋkã ye. Dẽ wã, yãmb yaa mam kaset dãmba, tɩ yaa maam la Wẽnnaam. Maam a Sẽn-Ka-Saab n yeele!

¹³Hal sẽn sɩng badaare, yaa maam, la ned ka tõe n deeg bũmb mam nugẽ ye. Mam sã n maan tʋʋmde, ãnda n tõe n kɩɩse?

¹⁴Sẽn-Ka-Saab sẽn yaa yãmb fãagda, n yaa Israyɛll Pʋ-Peelem-Soabã yetame: «Yaa yãmb yĩng la mam sẽn tʋm ned t'a zab ne Babilondã. Mam n na n kɩt t'a zoɛtbã lisi. Kalde-rãmbã na n lisa ne b koom kogendã sẽn kõt bãmb tõogrã.

¹⁵Mam yaa Sẽn-Ka-Saab sẽn yaa yãmb Pʋ-Peelem-Soabã, yaa Israyɛll naandã n yaa yãmb dĩma.»

¹⁶Ade, Sẽn-Ka-Saab yetame: «Bãmb n tukd sor ko-kãsengã pʋgã, bãmb n tukd so-buk koom sẽn tar pãngã zugu,

¹⁷bãmb n dag n kɩt tɩ saar-dãmb ne wiid la tãb-bi-sull naag taab n zabe. Bãmb lʋɩɩme n ka na n tol n leb n yik ye. B kiime, bãmb dɩɩ bugum wa fɩtl gĩsga.

¹⁸Da-y leb-y n tags-y sẽn loogã yelle, la y ra leb n geelg bõn-kʋdã ye.

¹⁹Ade, mam na n maana bõn-paalse, bõn-kãng sɩngame n pukdẽ, yãmb ka ne bõn-kãng la? Mam na n pãrga sor we-raoogã pʋga, la m kɩt tɩ kʋɩls zĩnd zĩ-peen-daagẽ.

²⁰We-rũmsã na n waooga maam, yaa we-baasã ne naneendã. Bala, mam kɩtdame tɩ koom zĩnd we-raoogẽ, la m kɩtdẽ tɩ kʋɩls zĩnd zĩ-peen-daasẽ, tɩ mam nebã mam sẽn yãkã tõe n yũ.

²¹Mam neb nins mam sẽn naanã na n pẽga maam.»

²²Sẽn-Ka-Saab yetame: A Zakoob yagense, ka maam la yãmb sẽn boolã ye! Israyɛll nebã, yãmb yam yii ne maam!

²³Yãmb ka tall y maoong peosg wall y maoong bʋʋg n wa maan maoong sẽn yõogd bugum n kõ maam ye. Yãmb maandã ka waoogd maam ye. Mam ka modg yãmb n kɩt tɩ y tall kũun n wa, m ka nams yãmb n kɩt tɩ y tall wisd n wa ye.

²⁴Yãmb ka ra parfẽ sẽn tar yũ-noog ne ligd n kõ maam ye. La y ka kõ maam yãmb maandã kaam tɩ sek-m ye. La sẽn be yaa tɩ yãmb modga maam n kẽes yembd y yel-wẽnã yĩnga, mam yɛɛ ne yãmb kongrã.

²⁵Maam m yembr bal n tõe n yẽes yãmb beegrã. La m ka na n leb n tẽeg yãmb yel-wẽnã yell ye.

²⁶Bɩ y tẽeg yell ning yãmb sẽn tar ne maamã, tɩ d bʋ ne taaba. Bɩ yãmb mengã gom n yiis y menga.

²⁷Yãmb pipi yaabã kongame, yãmb no-rɛɛsdbã kɩɩsa maam.

²⁸Dẽ, mam kɩtame tɩ y zĩ-sõngẽ nanambsã lebg bõn-dẽgdo. Mam basame tɩ kãab-wẽng paam a Zakoob yagensã, la m bas tɩ Israyɛll nebã paam tʋʋsgo.