Read SEBR SÕNGO, 1998 A Ezayi 45 Bible Online

A Ezayi 45 - SEBR SÕNGO, 1998 bible

A Ezayi 45

¹Ade, Sẽn-Ka-Saab gomda ne bãmb nin-tũusdg a Siruus bãmb sẽn gãd a soab nug-rɩtgã n yetẽ: «Mam na n kɩtame tɩ f tõog bu-zẽmse, la m kɩt tɩ f kao rĩm-dãmb sɛɛg sẽbdse, la m pags tẽms noy kʋɩlems fo taoore, n kɩt tɩ tẽmsã ra tol n leb n pag abada.

²Mam mengã n na n lʋɩ fo taoore, mam na n sarma kunkubã, mam na n wãa zũud kʋɩlemsã, la m kao kut kʋɩlen-kuyã.

³Mam na n kõo foom arzegs nins sẽn busã, yaa arzegs nins sẽn solgã, tɩ fo bãng tɩ maam a Sẽn-Ka-Saab sẽn yaa Israyɛll Wẽnnaamã mii foom ne f yʋʋre.

⁴Yaa mam tʋmtʋmd a Zakoobe, a Israyɛll sẽn yaa soab ning mam sẽn yãkã maasem yĩng la mam bool foom ne f yʋʋre. Mam kõo foom waoogr tɩ fo nan ka mi maam ye.

⁵Mam yaa Sẽn-Ka-Saabo, Sẽn-Ka-Saab a to ka be ye. Sã n ka maam, Wẽnnaam a to ka be ye. Mam segla foom zabr yĩng tɩ fo nan ka mi maam ye.

⁶Yaa sẽn na n yɩl tɩ nebã bãng tɩ sẽn sɩng ne yaang n tãag nin-taoore, sã n ka maam, sẽn ketã yaa zaalem. Mam yaa Sẽn-Ka-Saabo, la a to ka be ye.

⁷Maam n naan vẽenem la m kɩt tɩ lik bida beẽ. Maam n wat ne vɩ-bãane, la maam n wat ne toogo. Maam a Sẽn-Ka-Saab n tõe n maan bõn-kãensã fãa.

⁸Bɩ saasã sẽn be yĩngrã tose, la bɩ sawatã bas tɩrlem t'a ni! Bɩ tẽn-gãongã pusg tɩ fãagr yi, tɩ tɩrlem me naag n yi wakat-yɛnga! Maam a Sẽn-Ka-Saab n tõe n maan bõn-kãensã fãa.

⁹Sẽn zabd-a ne sẽn yag-a yẽnda wã na n paama toogo, yẽnda yaa rʋko, n be rʋgd a taabã sʋka! Rẽ yĩnga, yagdã tõe n soka sẽn yagd-a yẽnda wã tɩ yaa bõe la yẽnda maand sɩda? Wall a yeel tɩ fo tʋʋmdã ka võore!

¹⁰Ned sã n yeel biig baaba: ‹Bõe yĩng tɩ fo rogdẽ?› La a yeel pag tɩ: ‹Bõe yĩng tɩ fo rogdẽ?› Nin-kãng soab na n paama toogo.

¹¹Ade, Sẽn-Ka-Saab sẽn yaa Israyɛll Pʋ-Peelem-Soaba, n yaa Israyɛll naandã yetame: ‹B rat n soka maam n bãng sẽn wat beoogo, b rat n wilga maam m sẽn tog n maan m kambã wɛɛngẽ, la mam nus tʋʋmdã sẽn tog n yɩ to-to bɩ?

¹²Yaa maam n naan dũniyã, la m naan ninsaalbã sẽn be a pʋgẽ wã. Yaa mam meng nus n yɛdg sa-gãongã, la yaa maam n kɩt t'a ãdsã fãa beẽ.

¹³Maam n yãk a Siruus wa sẽn zems mam tɩrlmã, la m na n manega a soayã fãa. Yẽnda na n lebs n mee mam tẽngã, la a bas mam nebã sẽn be yembdã tɩ b looge, n ka reeg yaood wall kũun ye. Yaa Saasẽ-Pãng-Soabã n yeele.› »

¹⁴Sẽn-Ka-Saab yetame: «Ezɩpt tẽngã neb tʋʋm yõodo, ne Kuus toandbã teedo, la Seba tẽng nin-wobdã teedã na n waa yãmb nengẽ, n wa lebg yãmb dẽnda. Nin-kãens na n pʋga yãmb poore, bãmb na n waa ne b bãensã, la b na n wõgemda yãmb taoore, n maan b pʋʋsgã yãmb nengẽ. Wẽnnaam bee yãmb nengẽ bala, la Wẽnnaam a to ka leb n beẽ ye. Wẽnnaam-dãmb a taabã yaa zaalem!»

¹⁵Israyɛll Wẽnnaam sẽn yaa fãagda, yãmb sɩd yaa Wẽnnaam sẽn solg y menga!

¹⁶Sẽn peesd-b wẽn-naandsã rɩɩ yãnde, bãmb fãa paama paoogre. Bãmb fãa loogda ne yãnde.

¹⁷La Israyɛll paama Sẽn-Ka-Saab fãagr wakat sẽn kõn sa yĩnga. Yãmb kõn tol n leb n paam yãnde, y kõn tol n leb n paam paoogre.

¹⁸Bala, Sẽn-Ka-Saab sẽn yaa saasã naandã n gomde. Bãmb n yaa dũniyã naanda, bãmb n naan-a n kɩt t'a yasẽ, la b ka naan-a t'a yaa zaalem ye. B naan-a lame tɩ neb tõe n zĩnd a pʋgẽ. Bãmb yetame: «Mam yaa Sẽn-Ka-Saabo, la sã n ka maam, Wẽnnaam a to ka be ye.»

¹⁹Mam ka soos n gom ye, ka dũniyã zĩ-lik pʋgẽ la mam gomẽ ye. Mam ka yeel a Zakoob yagensã tɩ b bao maam zĩ-vɩʋʋgẽ ye! Maam a Sẽn-Ka-Saab togsda tɩrlem, mam togsda sẽn yaa tɩrga!

²⁰Bɩ yãmb dãmb fãa sẽn põs n yi bu-zẽmsã sʋkã tigim taab n wa! Naag-y taab n kolge! Neb nins sẽn zãad bõn-naands sẽn yaa raad sẽn peesã ka tar bãngr ye. Bãmb pʋʋsda wẽnnaam sẽn ka tõe n fãag-b ye.

²¹Togs-y yellã! Wa-y n yals-y taoor n gom n yiis y menga! Bɩ b fãa tigim n yẽs ne taaba! Ãnda soab n kɩt tɩ b wʋm bõn-kãng hal kʋdem-wẽndẽ, la a sɩng n togs bõn-kãng hal pĩnda? Ka maam a Sẽn-Ka-Saab la? Sã n ka maam, Wẽnnaam a to ka be ye. Sã n ka maam, Wẽnnaam sẽn yaa tɩrg n yaa fãagd ka be ye. Wẽnnaam a to ka tol n leb n beẽ ye.

²²Yãmb dãmb fãa sẽn be dũniyã ween-vɩɩsã fãa wã, wẽnemd-y n ges-y maam n paam fãagre! Bala, yaa maam la Wẽnnaam, Wẽnnaam a to ka be ye.

²³Mam wẽenda ne m meng tɩ gomd ning sẽn yi mam noorẽ wã yaa tɩrga, la a kõn tol n tek ye. Rũmã fãa na n yĩgimda mam taoore, la zɛlmã fãa na n wẽena ne mam yʋʋre.

²⁴B na n goma mam yell n yeel tɩ yaa Sẽn-Ka-Saab b yembr nengẽ bal la tɩrlem la pãng be. La neb nins sũyã sẽn dag n yik ne Sẽn-Ka-Saabã na n lebg n waa bãmb nengẽ ne yãnde.

²⁵Israyɛll yagensã fãa na n paama tɩrlem Sẽn-Ka-Saab maasem yĩnga, la yaa bãmb pʋg la b na n paam zu-zẽkre.