Read SEBR SÕNGO, 1998 A Ezayi 46 Bible Online

A Ezayi 46 - SEBR SÕNGO, 1998 bible

A Ezayi 46

¹Wẽn-naandg a Bɛll yĩgimdame, la wẽn-naandg a Nebo kɩlldame. B rɩkda b wẽn-naandsã n zɩlg rũmsi, la b zɩlgd-b rũms sẽn yɛ zutu. La a lebga zɩɩb rũng ning sẽn zɩt-a wã yĩnga!

²Bãmb fãa naaga taab n zõrẽ, bãmb fãa yĩgimdame, bãmb ka tõe n fãag rũmsã sẽn zɩt bãmbã ye. La bãmb mensã rabda yembd pʋga.

³A Zakoob buudu, kelg-y maam, yãmb dãmb sẽn yaa Israyɛll bu-kellã, yãmb yaa neb nins mam sẽn zã hal yãmb sẽn dag n ket y ma pʋgẽ, maam n ges y yell hal tɩ y ket y ma pʋgẽ!

⁴Maam n na n kell n ges y yell n tãag y kʋʋlem wakate, mam na n zãa yãmb hal n tãag y zoob-peend wakate. Maam n maan a woto ne yãmba, la m dat n leb n zãa yãmba, n tebend yãmb la m yols-yã.

⁵Yãmb na n dɩka maam n mak ãnda n yeel tɩ maam ne yẽnda soab n zem taaba? Yãmb na n yeelame tɩ maam ne ãnda soab n wẽnd taaba?

⁶Nebã zukda b kordã pʋg sãnemã, la b magd wanzuri ne zɩslem magdga. Bãmb yaooda yõak t'a rõog sãnem ne wanzuri wẽn-naandg n kõ-ba, la bãmb wõgemdeda wẽn-naandgã taoor n pʋʋsd-a.

⁷Bãmb tʋkd-a lame n palg b bãgdẽ, n tall-a n tɩ ning a zĩigẽ. Wẽn-naandgã yasame n ka yẽrgd a sẽn beẽ wã ye! Ba b sã n kelem n bool-a, a ka tõe n leoke, la a ka tõe n fãag ned a yel-pakr pʋg ye.

⁸Bɩ y tẽeg bõn-kãng yell n yɩ raopa! Yel-wẽn-maandba, tags-y bõn-kãng yelle!

⁹Tẽeg-y hal wakat sẽn loogã yelle. Bala, mam yaa Wẽnnaam, la Wẽnnaam a to ka be ye. Mam yaa Wẽnnaam, la mam ka tar mak-n-taag ye.

¹⁰Hal sɩngrẽ, mam dengd n togsa bũmb ning sẽn na n wa zĩndã, la m togsda bũmb hal wakat sẽn zãr t'a nan ka maan ye. Mam yetame: Mam saagrã na n pidsame, la mam na n maana bũmb ning m sẽn dat n maanã.

¹¹Mam boonda sɩlg t'a yi yaang n wa, mam kɩtdame tɩ ned ning sẽn pidsd-a mam saagrã yi tẽn-zãrg n wa. Mam sã n yeel bũmbu, mam kɩtdame t'a paam pidsgu. Mam sã n yãk yam n na n maan bũmbu, mam maand-a lame.

¹²Sũ-keelem dãmbã, yãmb dãmb sẽn zãr ne tɩrlmã, kelg-y maam!

¹³Mam kɩtame tɩ mam tɩrlmã kolgdẽ, a ka zãr ye. La mam fãagrã ka na n kaoos n wa ye. Mam na n waa ne fãagr Sɩyõ pʋgẽ, mam na n kõo Israyɛll mam ziirã.