Read SEBR SÕNGO, 1998 A Ezayi 50 Bible Online

A Ezayi 50 - SEBR SÕNGO, 1998 bible

A Ezayi 50

¹Ade, Sẽn-Ka-Saab yetame: «Welgr kaset sebr ning sẽn wilgd tɩ mam diga Zeruzalɛm sẽn yaa yãmb ma wã bee yɛɛnẽ? Bɩ mam dɩka yãmb n koos ne m sam soab a bõe? Yaa yãmb beegrã yĩng la b koos yãmba, la yaa yãmb kongrã yĩng la b sẽn dig yãmb ma wã.

²Bõe yĩng tɩ mam wa n ka mik neda? Bõe yĩng tɩ mam bool tɩ ned ka leoke? Dẽ yĩnga, mam nugã yaa koɛɛg n ka tõe n fãag yãmb la? Mam ka tar pãng n tõe n fãag yãmb la? Mam sã n tãs ko-kãsengã, a kʋɩtame. Mam tõe n kɩtame tɩ kʋɩls lebg we-raoogo. Koomã kaalem yĩnga, bãmb zĩmã na n põogame, ko-yũud na n kʋʋ bãmba.

³Mam luta saasã ne lika, la m kɩt t'a yeelg boto.»

⁴Zu-soabã a Sẽn-Ka-Saab kõo maam zelemd sẽn mi goam wa karen-biiga, tɩ mam tõe n bãng n gom n bels ka-pãng soabã. Yibeoogo, bãmb nekdame, bãmb nekda maam tɩ m yok m tʋbr n kelg wa karen-biis sẽn kelgd to-to wã.

⁵Zu-soab a Sẽn-Ka-Saab yoka mam tʋbre, la mam ka kɩɩs bãmb ye, mam ka leb poorẽ ye.

⁶Mam wẽnemda m poor n kõ neb nins sẽn dag n pãbd maamã, la m wẽnemd m yɛgdg n kɩs neb nins sẽn dag n võod-b mam toɛɛngã. Mam ka solg m meng ne neb nins sẽn paoogd maam la b tʋbsd maam kolkoodã ye.

⁷La Zu-soab a Sẽn-Ka-Saab sõnga maam. Rẽ kɩtame tɩ mam ka paam yãnd ye. Rẽ kɩtame tɩ mam keng m neng wa pĩiga, n miẽ tɩ mam ka na n tol n paam yãnd ye.

⁸Sẽn kõt-a maam bʋʋmã kolgame! Ãnda soab n dat n dõd maam? Bɩ d yals n bʋ ne taaba! Ãnda soab n tar yell ne maam? Bɩ a soab wa kolg maam!

⁹Zu-soab a Sẽn-Ka-Saab na n wa sõnga maam. Ãnda soab n tõe n mong maam bʋʋm? Bãmb fãa na n kʋdga wa fuugu, la mogd na n dɩɩ bãmba.

¹⁰Ãnda soab n be yãmb sʋkã n zoet Sẽn-Ka-Saabo, n na n kelg bãmb tʋmtʋmdã koɛɛgã? Ned ning sẽn kẽnd lik bida pʋgẽ, tɩ vẽenem ka beẽ, bɩ a soab teeg Sẽn-Ka-Saabo, la a rell bãmb yʋʋrã, n teeg a Wẽnnaamã!

¹¹Yãmb dãmb fãa sẽn yõgen bugum, la y zãad pɛɛm sẽn yaa bug-vɩlensã, Tall-y y pɛɛmã sẽn yaa bug-vɩlensã y sẽn yõgnã n kẽ-y y bugmẽ wã, kẽ-y wʋngã pʋga! Yaa mam meng nug n kɩt tɩ bõn-kãng paam yãmba. Yãmb na n kii toog pʋgẽ!