Read SEBR SÕNGO, 1998 A Ezayi 54 Bible Online

A Ezayi 54 - SEBR SÕNGO, 1998 bible

A Ezayi 54

¹Pʋg-kiiri, fo sẽn ka rogã, kaas ne sũ-noogo! Fo sẽn ka bãng rogem toogã, yɩɩl ne sũ-noog la tõogre. Bala, Sẽn-Ka-Saab yeelame: «B sẽn bas pag ningã kamb na n yɩɩ wʋsg n yɩɩg pag ning sẽn ket a sɩdã yirã.»

²Yalg f fu-roogã, bɩ f tẽeg f fu-roogã pɛɛla, n da bas-a t'a yɩ sẽk ye! Paas f wĩyã woglem la f paas f biili wã pãnga.

³Bala, fo na n yalga goabg la rɩtgo. Fo yagensã na n sooga buud a taabã, la b na n pidsa tẽms nins sẽn dag n yaa raboodã.

⁴Da zoe rabeem ye, bala, fo kõn tol n paam yãnd ye. Da sulg f zug ye, bala, fo kõn tol n paam paoogr ye. N-yẽe! Fo na n yĩma f pʋg-sademdẽ yãndã yelle, la fo kõn tol n leb n tẽeg f pʋg-kõtẽ paoogrã yell ye.

⁵Bala, soab ning sẽn naan-a foomã n yaa fo sɩda. Bãmb yʋʋr boondame tɩ Saasẽ-Pãng-Soaba. Bãmb yaa Israyɛll Pʋ-Peelem-Soabã n yaa fo fãagda. B boonda bãmb tɩ dũni gill Wẽnnaam.

⁶Bala, Sẽn-Ka-Saab lebg n boonda foom, wa pag sɩd sẽn bas-a t'a be sũ-sãang pʋga. Fo Wẽnnaamã sokdame: «Ned tõe n basa a bi-bɩɩlem wakatẽ paga?»

⁷Mam dag n basa foom wakat bilf pʋgẽ, la mam na n leb n deega foom ne nimbãan-zoeer kãsenga.

⁸Mam sũur dag n puuga wʋsg ne foom, tɩ mam dag n wẽnemd n bas foom wakat bilf pʋgẽ, la ne nonglem sẽn ka sɛta, mam na n zoee fo nimbãanega. Yaa Sẽn-Ka-Saab sẽn yaa fo fãagdã n yeele.

⁹Ne maam, a na n yɩɩ wa a Nowe wakatẽ wã. Mam dag n wẽename t'a Nowe wakatẽ koomã buud ka na n leb n zĩnd dũni zug ye. Dẽ, mam wẽendame me tɩ m kõn tol n leb n yik m sũur ne foom, la m kõn tol n leb n tãs foom ye.

¹⁰Baa tãmsã sã n looge, baa kunkubã sã n miimdẽ, mam nonglmã fo yĩngã kõn tol n looge, la mam zems-n-taar kaoolã kõn tol n miim ye. Yaa Sẽn-Ka-Saab sẽn zoet fo nimbãanegã n yeele.

¹¹Zeruzalɛm sẽn be nimbãaneg pʋga, saag sob-kẽeng pãba foom, la ned ba a yembr ka belsd foom ye! Mam na n lebs n mee foom ne kug-sõama. Mam na n kɩtame tɩ fo yẽbgrã yɩ ne safɩɩr kugri.

¹²Mam na n maana fo peem-leesã ne kug-neeba. La m maan f kʋɩlemsã ne kug-neeba, la fo lalgã fãa na n yɩɩ ne kug sẽn tar yõodo.

¹³Fo kambã fãa na n yɩɩ Sẽn-Ka-Saab karen-biisi, la fo kambã na n paama vɩ-bãan wʋsgo.

¹⁴Tɩrlmã na n kõo foom pãnga. Zãag f meng ne maan ned pãnga. Fo kõn leb n zoe rabeem ye, la yɛɛsg kõn leb n paam-fo, a kõn tol n leb n pẽneg foom ye.

¹⁵Ned sã n zabd ne foom, ka maam n tʋm a soab ye. Ned ning sẽn dat-a n zab ne foom na n lʋɩɩme.

¹⁶Maam n naan sãeyã, t'a zugd bug-saal n kut zab-teed wa a sẽn date. La yaa maam n naan sãamd t'a sãam bãmba.

¹⁷Zab-teoog ning fãa b sẽn maan n na n zab ne foomã kõn tol n tõog n maan foom bũmb ye. La ned ning fãa sẽn na n yik-a bʋʋd zĩigẽ n dõd foom, fo na n kɩtame t'a kong bʋʋm. Ad Sẽn-Ka-Saab tʋmtʋmdbã pʋɩɩr la woto, tɩrlem ning sẽn yit mam nengẽ wã. Maam a Sẽn-Ka-Saab n yeele.