Read SEBR SÕNGO, 1998 A Ezayi 59 Bible Online

A Ezayi 59 - SEBR SÕNGO, 1998 bible

A Ezayi 59

¹Ade, Sẽn-Ka-Saab nugã ka koɛɛg n ka tõe n fãag tõnd ye, bãmb ka tʋb-kɩd n ka tõe n wʋm ye.

²La yaa yãmb kongrã n welgd yãmb ne y Wẽnnaamã, yãmb yel-wẽnã n kɩt tɩ bãmb wẽnemd n bas yãmba, yaa yãmb yel-wẽnã n gɩdg tɩ bãmb ka tõe n kelg yãmb ye.

³Bala, yãmb nusã rẽgmã ne zɩɩm, tɩ yãmb kongrã rẽgem yãmb nug-bi wã. Yãmb noyã yagda zĩrẽ, la yãmb zɛlma wã gomda zãmb goam.

⁴Ned ba a yembr ka be n gomd ne pʋ-peelem ye, ned ba a yembr ka be n togsd sɩd bʋʋd zĩigẽ ye. Bãmb dɩka b teegrã n teeg vɩʋʋgo, la b gomd goam sẽn ka sɩda. Bãmb saagda wẽnem maanego, la a rogda wẽnga.

⁵Bãmb wũunduda põeer gɛla, la b wʋgd sʋlg gãmbdo. Ned ning sẽn wãb-a bãmb gɛlã kiidame. La b sã n wãag b gelle, yaa põeer n yit beenẽ.

⁶Bãmb gãnegãmbdã[7] ka sekd fuug wʋgb ye, bãmb tʋʋmã ka tõe n dɩk n pil b mens ye. Bãmb tʋʋmã yaa tʋʋm-wẽnse, bãmb nusã pida ne nen-kegl-tʋʋma.

⁷Bãmb naoã rabda wẽng maanego, bãmb tʋʋla ne bʋʋm soab zɩɩm daagre. Bãmb tagsg yaa tɩ maan wẽng bala. Sãoong ne wẽng bee bãmb soayã zutu.

⁸Bãmb ka mi vɩ-bãan sor ye, la tɩrlem ka be bãmb sẽn pɩʋʋgẽ ye. Bãmb tugda so-golemse, la ned ning fãa sẽn tũud so-kãens ka mi vɩ-bãan ye.

⁹Rẽ kɩtame tɩ zemsg zãr ne tõndo, la tɩrlem ka tõe n pẽneg tõnd ye. Tõnd dag n tẽeda vẽenem, la ade, d bee lik bida pʋga, tõnd dag n gũuda zĩ-yẽegre, la tõnd kẽnda lik-kãseng pʋga.

¹⁰Tõnd babenda wa zoang sẽn tigsd lalga, tõnd babenda wa ned nin sẽn ka ne. Tõnd lagsd n lʋɩta wĩnto-sʋk wa zĩ-sobdo, tõnd vɩɩme la d yaool n yaa wa neb sẽn ki bala.

¹¹Tõnd fãa kaasda wa rigd-n-yĩidsi, tõnd wũusda wa manwala. Tõnd dag n gũuda zemsgo, la d ka paam fɩ. Tõnd dag n data fãagre, la a zãaga ne tõndo!

¹²Bala, tõnd beegrã yaa wʋsg yãmb taoore, la tõnd yel-wẽnã kõta kaset tɩ d ka zems ye. Tõnd beegrã bee ne tõndo, la tõnd mii d kongrã.

¹³Tõnd kɩɩsame la d zãmb Sẽn-Ka-Saabo, tõnd leba poorẽ n zãag ne d Wẽnnaamã. Tõnd gomda nen-kegl-goam ne kãnegr goamã, tõnd gomda zĩrẽ-be-goamã, la d tagsd zĩrẽ d sũyã pʋse,

¹⁴n kɩt tɩ zemsg targ n bas-do, tɩ tɩrlem zãag ne-do. Bʋ-tɩrg ka leb n be bʋʋd zĩigẽ ye, la maan sɩd ka kẽed beenẽ ye.

¹⁵Sɩdã menemame, la b fãada ned ning sẽn ka maand wẽnga. Sẽn-Ka-Saab neeme tɩ zemsg ka leb n beẽ ye, tɩ bõn-kãng ka noom bãmb ye.

¹⁶Bãmb yãame tɩ ned ba a yembr ka tol n beẽ ye. Bãmb sũur sãama ned sẽn ka be n na n kẽes a toogã yĩnga. Dẽ, bãmb mengã nug n kõt bãmb tõogre, la bãmb della b mengã tɩrlem.

¹⁷Bãmb yeelga tɩrlem wa gãn-tika, n fõgen fãagr wa kut pugla. Bãmb yeelga sũ-dokr wa fuugu, la b pil b mengã ne nonglem-kãseng wa fuugu.

¹⁸Bãmb na n lebs n yaoo ned kam fãa wa sẽn zems a tʋʋmde. Sũ-puugr na n yɩ b zabd-n-taasã rẽnda, bãmb na n dola b bɛɛbã wa sẽn zems b tʋʋmde. Bãmb na n yaoo tẽms nins koom sẽn gũbgã wa sẽn zems b tʋʋmde.

¹⁹Woto, yaang la taoor dãmbã na n zoee Sẽn-Ka-Saab yʋʋrã ne b ziirã. Zabd-n-taagã sã n wa, wa ko-zoetem, Sẽn-Ka-Saab sebgã na n diga yẽnda t'a zoe.

²⁰Fãagd n na n wa fãag Sɩyõ, la a fãag a Zakoob yagens nins sẽn bas b tʋʋm-beedã n lebg n wa wã. Maam a Sẽn-Ka-Saab n yeele.

²¹Sẽn-Ka-Saab yeelame: «Ad kaool ning mam sẽn maan ne bãmbã: Mam Sɩɩgã sẽn be ne foomã, la a be mam goam nins mam sẽn ning fo noorẽ wã zugã, na n zĩnda fo noorẽ wã, la a zĩnd fo yagensã ne f yagens yagensã noy pʋse. Yaa sẽn sɩng ne moasã la wakat sẽn ka sɛta. Maam a Sẽn-Ka-Saab n yeele.»