Read SEBR SÕNGO, 1998 A Ezayi 64 Bible Online

A Ezayi 64 - SEBR SÕNGO, 1998 bible

A Ezayi 64

¹Bugum sẽn wit boaag pʋgẽ to-to wã, la koom sẽn kɛɛd t'a walem zẽkdẽ wã, yãmb bɛɛbã na n bãnga yãmb yʋʋrã, la bu-zẽmsã na n diga yãmb taoore.

²Wakat ning yãmb sẽn maan bõn-yɛɛsds nins tõnd sẽn dag n ka tẽedã, yãmb sigame tɩ tãmsã sirg yãmb taoore.

³Ned nan ka wʋm a buudu, la b zɩ n wʋm tɩ b gomda, la ned nif nan ka yãnd wẽnd a to ba a ye, t'a tõog n maan a woto tɩ b wʋme, sã n ka yãmb y yembr bala.

⁴Yãmb dag n kẽnd n segda soab ning sẽn tar sũ-noog n kẽnd wa sẽn zems tɩrlmã, yãmb segda neb nins sẽn tẽr yãmb soayã yellã, yãmb yaa soab ning sẽn fãagd tõnd wakat fãa. La yãmb sũurã yika tõnd sẽn maan yel-wẽnã yĩnga.

⁵Tõnd fãa lebga neb sẽn yaa rẽgdo, la tõnd sẽn maand d tɩrlem tʋʋmã fãa wẽnda fu-rẽgdo. Tõnd fãa zelga wa vãad sẽn ki, tɩ tõnd kongrã kãagd tõnd wa sebgo.

⁶Ned ba a yembr ka leb n boond yãmb yʋʋrã ye, ned ka be n yẽegd a meng n baood yãmb ye. Bala, yãmb wẽnemd n basa tõndo, la yãmb basa tõnd tɩ d boog d kongrã yĩnga.

⁷Ne rẽndã fãa, yãmb yaa tõnd ba. Tõnd yaa yagdo, la yãmb n yaa tõnd yagbã. Tõnd fãa yaa yãmb nus tʋʋma.

⁸Ra-y yik-y y sũur tɩ loog ye. Sẽn-Ka-Saabo, ra-y tẽeg-y tõnd kongrã yell wakat fãa ye. Tõnd kotame tɩ y gese, tõnd fãa yaa yãmb nebã.

⁹Yãmb tẽmsã sẽn welg toorã lebga we-raoogo, Sɩyõ lebga we-raoogo, Zeruzalɛm lebga zĩ-vɩʋʋgo.

¹⁰Tõnd doogã sẽn welg toor n tar ziirã, zĩig ning tõnd yaab-rãmbã sẽn dag n pẽgd yãmbã, zĩ-kãng rɩɩ bugum zãnga. Bũmb ning fãa sẽn tar yõod tõnd yĩngã lebga raboogo.

¹¹Sẽn-Ka-Saabo, yõwã fãa pʋgẽ, yãmb na n paa sɩɩ n ka maan bũmbu? Yãmb na n sĩnda y noore, n sãam tõnd sũur hal tɩ looge?