Read SEBR SÕNGO, 1998 A Ezayi 66 Bible Online

A Ezayi 66 - SEBR SÕNGO, 1998 bible

A Ezayi 66

¹ Ade, Sẽn-Ka-Saab yetame: «Saasẽ yaa mam geere, dũni yaa mam nao roagendga. Ro-bʋg buud la yãmb tõe n me n kõ maam? Mam vʋʋsg zĩig la zĩ-bʋgo?

²Bõn-kãensã fãa yaa mam nug n maane, yaa woto la bũmb fãa wa n beẽ. Maam a Sẽn-Ka-Saab n yeele. Ad mam sẽn na n wẽnemd m neng n ges a soaba: yaa sik-m-meng soab sẽn be sũ-sãang pʋga, n zoet mam goamã rabeem n digda.

³Sẽn kʋʋd-a naaf n maan maoongo, wẽnda wa a sẽn kʋʋd ninsaala. Sẽn maand-a peosg bɩ bʋʋg maando, wẽnda wa ned sẽn pãbd baaga. Sẽn wat-a ne kũuni, wẽnda wa a sẽn wat ne kurkur zɩɩm. Sẽn wat-a ne wisd kũuni, wẽnda wa a sẽn pʋʋsd wẽn-naandse. Nin-bãmb fãa sũy yaa noog ne b manesmã, la bãmb maanda sũ-noog ne b yel-yoodã.

⁴Mam me maanda sũ-noog bãmb tõodã yĩnga, la mam na n kɩtame tɩ bãmb sẽn zoet bũmb ningã paam-ba. Bala, mam boolame la ned ka sak ye. Bala, mam gomame la bãmb ka kelg ye. La bãmb maana mam sẽn ka rate, n yãk bũmb ning sẽn ka tol n noom maamã.»

⁵Yãmb dãmb sẽn zoet Sẽn-Ka-Saab gomdã rabeem n digdã, kelg-y bãmb koɛɛga: «Ad yãmb saam-biis nins sẽn kis yãmb mam yʋʋrã yĩngã sẽn yeta: ‹Bɩ Sẽn-Ka-Saab puk b ziirã tɩ d yãnd yãmb sũ-noogã!› La yaa bãmb n na n paam yãnde.»

⁶Bʋrg n zẽkd tẽngã pʋga, kelems n yit Wẽnd doogẽ wã. Yaa Sẽn-Ka-Saab n keood b bɛɛbã wa sẽn zems b tʋʋmã.

⁷Yẽnda rogame n ka yãnd n kũm dogem ye. Yẽnda roga bi-ribl tɩ rogem toog nan ka sɩng ye.

⁸Ãnda soab n zoe n wʋm yell a woto? Ãnda soab n zoe n yãnd bũmb a woto? Tẽng tõe n doga daar a yembr pʋgẽ sɩda? B tõe n doga buud zĩig pʋgẽ la? Sɩyõ pa yãnd n kũm dogem la a rog a kambã ye!

⁹Sẽn-Ka-Saab sokdame yaa: «Mam na kɩt tɩ pag yik rogem n leb n gɩdg-a t'a ra roge? Mam sẽn kɩt tɩ pag rogdẽ wã, mam na gɩdg bi-pɛɛlg rogem? Yaa fo Wẽnnaamã n yeele.»

¹⁰Yãmb dãmb fãa sẽn nong Zeruzalɛmã, naag-y yẽnda n maan sũ-noogo, kɩdm-y Zeruzalɛm yĩnga. Yãmb dãmb sẽn dag n maand sũ-sãang yẽnda yĩngã, lagm-y yẽnda n maan sũ-noogo,

¹¹tɩ yãmb tõe n paam yẽnda bĩisã sẽn kõt belsgã n yẽsem n tɩge, la y paam yẽnda ziirã noosem tɩ sek-yã.

¹²Bala, Sẽn-Ka-Saab yetame: «Ade, mam wẽnemda vɩ-bãan n tees yẽnda wa kʋɩlg koom, la m wẽnemd buud a taabã ziirã n tees yẽnda wa ko-zoetem sẽn fõta. Yẽnda na n kõo yãmb tɩ y yẽsme. B na n dɩka yãmb n pẽgne, la b zaoolg yãmb b naoẽ n saage.

¹³Wa ned ma sẽn belsd-a to-to wã, mam na n belsa yãmb a woto. Yãmb na n paama belsg Zeruzalɛm.

¹⁴Yãmb na n yãnda bõn-kãng tɩ yãmb sũyã yɩ noogo, la yãmb na n leb n paama pãng wa moodo. Sẽn-Ka-Saab na n kɩtame tɩ bãmb tʋmtʋmdbã bãng bãmb pãngã, la b kɩt tɩ bãmb bɛɛbã bãng bãmb sũ-yikrã.»

¹⁵Bala, Sẽn-Ka-Saab bee bugum pʋg n watẽ, la bãmb saar-dãmbã wẽnda seb-kãsenga. Bãmb wat n na n pidsa b sũ-yikrã ne toolem, la b na n lenga nebã ne bug-witim.

¹⁶Yaa ne bugum la Sẽn-Ka-Saab na n kao bʋʋdã, bãmb na n kaoo nebã fãa bʋʋd ne b meng zabr sʋʋgã. Sẽn-Ka-Saab sẽn na n kʋ-b rãmbã na n yɩɩ wʋsgo.

¹⁷Neb nins sẽn kõ b mense, la sẽn yɩlg b mens n na n kẽng zẽedã zĩisẽ wã, pʋgda taab yembr-yembre, sẽn be-a sʋkã poorẽ sẽn wãbd-b kurkur nemdã, bɩ rũms sẽn yaa bõn-dẽgdo, la yõensã, bãmb fãa na n naaga taab n sãam zãnga. Maam a Sẽn-Ka-Saab n yeele!

¹⁸Mam mii b tʋʋmã ne b tagsgã. Wakat taame tɩ b na n tigim buud a taabã fãa sẽn gomd goam buud toor-toorã. Bãmb na n waame, la b na n yãnda mam ziirã.

¹⁹Mam na n ninga bãnd bãmb sʋka. Mam na n tʋma bãmb neb kẽer sẽn põsã buud a taab nengẽ. Bu-bãmb yaa Tarsɩɩse, Pulli ne Luud sẽn yaa tãb-tãoodbã, yaa Tuball ne Gɛrs sẽn yaa tẽn-zãrs koom sẽn gũbgi, n nan ka wʋm tɩ b gomd mam yelle, la b nan ka yãnd mam ziirã. La bãmb na n goma mam ziirã yell bu-zẽms sʋka.

²⁰B na n talla yãmb saam-biisã fãa sẽn dag n be buud a taabã sʋkã n leb n wa tɩ yɩ kũun Sẽn-Ka-Saab yĩnga, b na n zombga bãmb wiidi, saar-dãmb zutu, la terok-rãmb sẽn bas vɩʋʋg pʋse, ne bõn-weese, la yʋgma zutu, n tall-b n wa mam tãn-sõngã zug Zeruzalɛm. Maam a Sẽn-Ka-Saab n yeele. A na n yɩɩ wa Israyɛll nebã sẽn ning b kũun lagd sẽn yaa yɩlma pʋs n tar n wat Sẽn-Ka-Saab roogẽ wã.

²¹Sẽn-Ka-Saab yetame: «Mam na n yãka maan-kʋʋdb ne Leevi neb bãmb sʋka.»

²²Sẽn-Ka-Saab yetame: «Mam sẽn kɩt tɩ yĩngr-paalgã ne dũni-paalgã kaoosd mam taoor to-to wã, yãmb yagensã ne yãmb yʋʋrã me na n kaoosa a woto.

²³Kiu-paalg woo kiu-paalga, la vʋʋsg daar woo vʋʋsg daare, bãmb fãa na n wa wõgemda mam taoore.» Maam a Sẽn-Ka-Saab n yeele.

²⁴La bãmb sã n yi, b na n yãnda neb nins sẽn kɩɩs maamã kũum sẽn dʋre. Bala, bãmb zũnzũiyã ka kiida, la bãmb bugmã me ka kiid ye. Bãmb na n yɩɩ bõn-põosg ninsaal buud fãa yĩnga.