Read SEBR SÕNGO, 1998 A Ezayi 8 Bible Online

A Ezayi 8 - SEBR SÕNGO, 1998 bible

A Ezayi 8

¹Sẽn-Ka-Saab yeela maam yaa: «Rɩk wal-bedre, n gʋls a zug ne gʋls-biis kaoreng sẽn yaa naana. Gʋls a woto: ‹Mahɛɛr-Salall-Has-Baaze[2].›

²La mam dɩka wal-bedrã n wilg kaset dãmb a yiib sẽn yaa sɩd dãmba. Yaa maan-kʋʋd a Uuri ne a Yeberekiya biig a Zakari.

³Mam kẽe ne Wẽnnaam no-rɛɛs-poakã, la a rɩka pʋg n dog bi-ribla.» La Sẽn-Ka-Saab yeela maam yaa: «Pʋd biigã yʋʋr t'a Mahɛɛr-Salall-Has-Baaze.

⁴Bala, sẽn deng biigã sẽn na n bãng tɩ bool a ba bɩ a ma wã, b na n wa wʋka Damaas arzegsã, la b zɛ Samaari laogã n tall n kẽng Asiiri rĩmã nengẽ.»

⁵Sẽn-Ka-Saab leb n yeela maam yaa:

⁶«Nin-bãmbã sẽn zãgs Sɩloe koomã sẽn zoet bãanem-bãanemã, n bas n maand sũ-noog Siiri rĩm a Retsin ne a Remaliya biigã sẽn yaa Israyɛll rĩmã yĩngã,

⁷kɩtame tɩ Sẽn-Ka-Saab na n kɩt tɩ koom sẽn tar pãngã, Efrat kʋɩlgã koom sẽn yaa Asiiri rĩmã yik ne a ziirã fãa n zab ne bãmba. Yẽnda na n pida ko-soayã fãa n puugi, n gãndg a kʋɩl-kogsã fãa n loogdẽ.

⁸Ko-kãng na n kãaga Zʋʋda, yẽnda na n lim-a lame n tãag a kokoayã. A Emanuwɛll na n yɛdga a pɩgsã n pid fo tẽngã zĩigã fãa.»

⁹Nebã, kaas-y-yã! B na n kẽesa yãmb dabeem! Yãmb dãmb fãa sẽn be dũniyã zĩ-zãrsẽ wã, yok-y y tʋb n kelge! Segl-y y mens zabr yĩnga. Rabeem-kãseng na n yõka yãmba! Segl-y y mens zabr yĩnga. Rabeem-kãseng na n yõka yãmba!

¹⁰Yãmb dat bɩ y maan saagre, a ka na n tõog ye, yãmb dat bɩ y gome, a ka na n pids ye. Bala, Wẽnnaam bee ne tõndo.

¹¹Sẽn-Ka-Saab nugã sẽn wa n gãd maamã, bãmb sagla maam tɩ m da wa maan wa nin-bãmbã ye. Bãmb yeela maam yaa:

¹²«Nin-bãmbã sẽn set n dat n maan bũmb ning fãa wã, bɩ y ra geelg bõn-kãng wa bũmb sẽn na n tõog ye. Ra-y zoe-y bũmb nins bãmb sẽn zoetã ye. Ra-y yɛɛs-y bõn-kãng ye.

¹³Saasẽ-Pãng-Soabã bal la yãmb tog n ges tɩ b yaa pʋ-peelem soaba. Bãmb bal la yãmb tog n zoe, yaa bãmb la yãmb tog n yɛɛse.

¹⁴Bãmb na n yɩɩ zĩig sẽn welg toore, la b leb n na n yɩɩ kugr neb sẽn lakda, bãmb yaa pĩig kugr sẽn lubda, Israyɛll buud a yiibã yĩnga. Bãmb yaa bẽdg ne tãoog Zeruzalɛm nebã yĩnga.

¹⁵Neb wʋsg na n laka bãmb n lʋɩ, bãmb na n lʋɩɩme n wã, bẽdgã na n yõka bãmba, tɩ b gãd-ba.

¹⁶Bĩng kaset-kãngã, sog tõ-kãngã n bĩng m karen-biisã sʋka.

¹⁷Mam gũuda Sẽn-Ka-Saabo, bãmb wẽnemd n basa a Zakoob buudã. Mam maanda tẽeb ne bãmba.

¹⁸Mam mengã ne kamb nins Sẽn-Ka-Saab sẽn kõ maamã yaa bãnde, la bõn-bãnd sẽn wilgd bũmb ning sẽn na n wa maan Israyɛll pʋgẽ, bõn-kãng yita Saasẽ-Pãng-Soabã sẽn be Sɩyõ tãngã zugã nengẽ.»

¹⁹B sã n wa yeel yãmba: «Kẽng-y n tɩ bao-y neb sẽn sogsd kɩɩmse, la y sok kinkir-bagbã sẽn walemd la b yẽgemdẽ wã. Buud fãa ka sokd a Wẽnnaam sɩda? B ka sokd kɩɩms nin-vɩɩs yĩng sɩda?»

²⁰Bɩ y leok yaa: «D tog n wẽnemd n gesa Zu-soabã tõogã ne b kasetã.» Nebã sã n ka sak n gom a woto, b ka na n yãnd beoogã vẽegr ye.

²¹Bãmb na n pɩʋʋga tẽngã ne namsgo, la kom. Kom sẽn na n nams bãmbã yĩnga, bãmb sũyã na n yikame, la b na n kãaba b rĩmã ne b Wẽnnaamã wẽnga. Bãmb na n wẽnemd n nak n gesa yĩngri,

²²la bãmb na n sulg n gesa tẽnga, n mik tɩ yaa sũ-sãanga, lik bida la yel-pak-kãsems bala. B na n tusa bãmb n kẽes lik bida pʋga.

²³Lik bida wã ka na n zĩnd tẽng ning sẽn paamd toog moasã wã pʋgẽ wakat fãa ye. Wakat sẽn loogã, Zu-soabã sã n kɩtame tɩ Zabulõ ne Neftali tẽngã paam yãnde, wakat sẽn watã, b na n kɩtame tɩ sor ning sẽn yegd ko-kãsengã, ne tẽng ning sẽn be Zʋrdẽ kʋɩlgã rʋʋndã sẽn yaa buud toay-toayã soolmã paam ziiri.