Read SEBR SÕNGO, 1998 A Ezayi 9 Bible Online

A Ezayi 9 - SEBR SÕNGO, 1998 bible

A Ezayi 9

¹Neb nins sẽn dag n kẽnd lik bida pʋgẽ wã, yãnda vẽen-kãsenga. Vẽenem yãga neb nins sẽn zĩ lik bida tẽngẽ wã zugu.

²Zu-soaba, yãmb kɩtame tɩ nebã fɩɩge, yãmb kɩtame tɩ b paam sũ-no-kãsenga. Bãmb kɩdemda yãmb taoor wa neb sẽn kɩdemd tigsg wakate, b maanda sũ-noog wa neb sẽn pʋɩt te-zɛɛdem.

³Bala, yãmb yiisa bãmb yembd ning b sẽn dag n be wã pʋga, yãmb kaooga rasaar ning b sẽn dag n tar n pãbd bãmb poayã, yãmb kaooga bɛyã gʋlgã, wa yãmb sẽn maan Madiyã-rãmbã lʋɩɩs daarã.

⁴B na n loba neooda nins fãa b sẽn tab tẽng zabr wakatã bugmẽ, la b lob fut nins fãa zɩɩm sẽn bolã bugmẽ, tɩ bugmã rɩ-b zãnga.

⁵Bala, b roga biig n kõ-do, b kõo tõnd bi-ribla. B kõo yẽnda noor t'a na n soog soolem. La b na n boonda yẽnda tɩ sagend sẽn yaa sõama wʋsgo, Wẽnnaam sẽn tar pãnga, ba sẽn paad wakat sẽn ka sɛta, la vɩ-bãan naaba.

⁶Yẽnda naamã na n yalgame, yẽnda na n waa ne vɩ-bãan sẽn ka sɛta, a Davɩɩd naam geerã ne yẽnda soolmã yĩnga. Yẽnda na n paasa a soolmã pãnga, la a na n zã-a-la ne zemsgo la tɩrlem, sẽn sɩng ne moasã la wakat sẽn kõn sɛ yĩnga. Saasẽ-Pãng-Soabã nonglem-kãsengã n na n kɩt t'a yɩ a woto.

⁷Sẽn-Ka-Saab tʋma koɛɛg a Zakoob yagensã yĩnga. Koɛɛgã siga Israyɛll soolmã zugu.

⁸Nebã fãa na n bãnga bõn-kãnga. Efrayiim soolmã nebã ne Samaari nebã na n bãngame. Nin-bãmb dag n gomda ne wuk-m-meng la zẽk-m-meng n yetẽ yaa:

⁹Tãn-koɛɛmã lalg lʋɩɩme, tõnd na n me-a-la ne kug-peesdɩ. B kɛɛ wom-sees tɩɩsã, la tõnd na n ledga bãmb ne sɛɛdr tɩ-bɛdã.

¹⁰Sẽn-Ka-Saab na n kɩtame t'a Retsin zabd-n-taasã tõog bãmba. Sẽn-Ka-Saab paasa bãmb bɛɛbã pãnga.

¹¹Siiri nebã na n bee yaangã, tɩ Filistẽ-dãmbã be nin-taoore, la bãmb na n yaaga b noy n vel Israyɛlle. La ne rẽ fãa, Sẽn-Ka-Saab sũ-yikrã ka na n sig ye. Bãmb nugã na n ket n zẽkame.

¹²Baoosgo, Israyɛll nebã ka na n lebg n wa Sẽn-Ka-Saab sẽn yaa soab ning sẽn pãbd bãmbã nengẽ ye. Bãmb ka na n wẽnemd n bao Saasẽ-Pãng-Soabã ye.

¹³Dẽ, daar a yembr pʋgẽ, Sẽn-Ka-Saab na n fiuuga Israyɛll zugã, la b kʋʋg a zʋʋrã, b na n kʋʋga koangã willi, la b kʋʋg tãnwiigã.

¹⁴Zugã yaa kãsem-dãmbã ne nanambsã, tɩ zʋʋrã yaa no-rɛɛsdbã sẽn kõt zĩrẽ zãmsgã.

¹⁵Nin-bãmbã taoor-dãmbã kẽesd-b-la moogo, la neb nins bãmb sẽn tɛtã menemame.

¹⁶Rẽ kɩtame tɩ Zu-soabã sũur ka na n yɩ noog ne bãmb kom-bɩɩsã ye. Bãmb ka na n zoe b pʋg-kõapã ne b kɩɩbsã nimbãaneg ye. Bala, bãmb fãa yaa wẽn-kɩɩsdba, la nin-wẽnse. Bãmb noyã fãa gomda yalem-goamã. La ne rẽ fãa, bãmb sũ-yikrã ka sig ye. Bãmb nugã ket n zẽkame.

¹⁷Bala, wẽnemã rɩta wa bugum, a rɩta wa bugum sẽn dɩt gõos ne gõpayãndse, a rɩta weoogã kãgrã tɩ bug-zõ-taok zẽkdẽ.

¹⁸Saasẽ-Pãng-soabã sũ-kãbrã kɩtame tɩ tẽngã kok bugum, la nebã lebga bugum dɩɩbo. Ned baa a yembr ka zoet a to nimbãaneg ye.

¹⁹B wãbda rɩtgo, la kom ket n tara bãmba. Bãmb dɩta goabga, la b ket n ka tɩgd ye. Ned kam fãa wãbda a nug nemdo.

²⁰Manaase wãbda Efrayiim, tɩ Efrayiim me wãbd Manaase. Bãmb b yiibã naaga taab n zabd ne Zʋʋda. La ne rẽ fãa, Sẽn-Ka-Saab sũ-yikrã ka sig ye. Bãmb nugã ket n zẽkame.