Read SEBR SÕNGO, 1998 Maan‑kʋʋre 10 Bible Online

Maan‑kʋʋre 10 - SEBR SÕNGO, 1998 bible

Maan‑kʋʋre 10

¹A Aarõ kom-dibli a yiibã, a Nadaab ne a Abiyu, ned kam fãa rɩka wisd laaga, n ning bug-saala, n yõng wisd n yugl bugmã zugu. Bãmb talla bugum sẽn ka zems n kẽng Sẽn-Ka-Saab taoore, la bõn-kãng ka zems ne noor ning Sẽn-Ka-Saab sẽn kõ bãmbã ye.

²Dẽ, bugum yii Sẽn-Ka-Saab nengẽ n dɩ bãmba. Bãmb kii zĩig pʋgẽ Sẽn-Ka-Saab taoore.

³A Moyiis yeela a Aarõ yaa: «Sẽn-Ka-Saab rag n yeelame: ‹Neb nins sẽn kolgd maamã tog bãngame tɩ mam welga toore, la tɩ nebã fãa tõe n waoog maam.› » La a Aarõ ka leb n yeel tɩ bũmb yɛs ye.

⁴A Moyiis boola a Mikayɛll ne a Ɛltsafan sẽn yaa a Aarõ yɛsb a Uziyɛll kom-dibli wã n yeel-b yaa: «Wa-y n dɩk-y y saam-biisã kũumã sɛk roogã noor n yiis sik zĩigã pʋga.»

⁵Dẽ, bãmb wa n dɩka kũumã ne b futã n yiis sik zĩigã pʋg wala a Moyiis sẽn yeelã.

⁶A Moyiis yeela a Aarõ ne a kom-dibli wã, a Elyazaar ne a Itamaare: «Da zũndg-y y zoobdã, la y ra pãrs y fut n wilg tɩ y bee sũ-sãang pʋg ye. Dẽ, yãmb kõn ki, la y kõn tak Sẽn-Ka-Saab sũ-puugrã n sik nebã zug ye. Bas-y tɩ yãmb saam-biisã sẽn yaa Israyɛll nebã yãb neb nins Sẽn-Ka-Saab sẽn kɩt tɩ bugmã rɩ n kʋ wã yĩnga.

⁷Bɩ yãmb ra serg n bas sɛk roogã noor ye. Sã n ka rẽ, yãmb na n kiime. Bala, Sẽn-Ka-Saab kaamã b sẽn pʋdg maan-kʋʋdbã zutã pʋdga yãmb zugu. Bãmb maana wa a Moyiis sẽn dag n yeelã.»

⁸Sẽn-Ka-Saab goma ne a Aarõ n yeele:

⁹«Foom ne f kom-dibli wã sã n wa n dat n kẽ sɛk roogã pʋga, bɩ y ra yũ reezẽ rãam, wall bõn-yũudl sẽn yilimd neng ye. Sã n ka rẽ, yãmb na n kiime. Bõn-kãngã na n yɩɩ no-tũudg sẽn ka sɛta, yãmb yagensã fãa yĩnga.

¹⁰Woto yaa sẽn na n kɩt tɩ yãmb tõog n bãng bũmb ning sẽn yaa kisgu, ne bũmb ning sẽn ka kisg n bake, la y bãng bũmb ning sẽn yaa rẽgdo ne bũmb ning sẽn ka rẽgd n welge.

¹¹Bɩ y rɩk noy nins fãa Sẽn-Ka-Saab sẽn kõ Israyɛll nebã, n kɩt t'a Moyiis zãms bãmb tõ-kãense.»

¹²A Moyiis yeela a Aarõ ne a kom-dibli nins sẽn kell n ka ki wã, a Elyazaar ne a Itamaare: «Rɩk-y bõn-koaadl kũunã b sẽn wa ne tɩ yɩ kũun sẽn yõogd bugum Sẽn-Ka-Saab taoorã sẽn kellã, n yals tẽn-kugrã sɛɛg n dɩ-a, la y ra ning-a bɩll ye. Bala, bõn-kãng yaa bũmb sẽn welg toore.

¹³Yãmb tog n dɩ-a-la zĩig sẽn welg toorã pʋga. Woto yaa noor b sẽn kõ foom ne f kom-dibli wã yĩnga, sẽn kẽed maoong sẽn yõogd bugum Sẽn-Ka-Saab taoorã wɛɛngẽ. Bala, b yeela maam tɩ m maan a woto.

¹⁴La bɩ foom ne f kom-dibli wã, la f kom-pugli wã kẽng zĩig sẽn yaa sõama pʋg n tɩ rɩ yãoogã b sẽn yuumã, ne ger ning sẽn yãk tɩ yaa kũunã. Bala, bõn-kãng yaa foom ne f kambã pʋɩɩre. B yãka bõn-kãens zems-n-taar maandã b sẽn maand Israyɛll nebã yĩngã sʋka.

¹⁵Israyɛll nebã tog n talla kaam ning sẽn yõogd bugmã ne ger ning b sẽn yãk n kõ wã, la yãoogã b sẽn yuum Sẽn-Ka-Saab taoor tɩ yɩ kũunã n wa. Bõn-kãens na n yɩɩ foom ne f kom-dibli wã rẽnda, la a na n yɩɩ no-tũudg sẽn ka sɛta, wa Sẽn-Ka-Saab sẽn dag n yeelã.»

¹⁶A Moyiis bao n na n bãnga boɛɛg ning sẽn yaa kongr maoongã yell sẽn yaa to-to. La a mikame tɩ b yõog-a-la bugum. La a Moyiis sũurã yika ne a Aarõ kom-dibli wã, a Elyazaar ne a Itamaare. Bãmb yaa Aarõ kamb nins sẽn kell n vɩɩmd n ka ki wã. A Moyiis yeel-b lame:

¹⁷«Bõe yĩng tɩ yãmb ka kẽng zĩig sẽn welg toorã pʋg ne kongr maoongã rũng n tɩ rɩ-a? Bõn-kãng yaa bũmb sẽn welg toor zãng fasɩ Sẽn-Ka-Saab yĩnga. La Sẽn-Ka-Saab rɩka bõn-kãng n kõ yãmba, tɩ yãmb tõe n tʋk Israyɛll nebã kongrã, n maan paasg tʋʋmd Sẽn-Ka-Saab taoore, tɩ Israyɛll nebã tõe n paam b yel-wẽnã sugri.

¹⁸Ade, yãmb ka tall rũngã zɩɩm n kẽ zĩig sẽn welg toorã pʋg ye, yãmb dag n tog n wãba rũngã nemd zĩig sẽn welg toorã pʋg wa mam sẽn dag n togs yãmbã.»

¹⁹A Aarõ yeela a Moyiis yaa: «Gese, bãmb maana maoong rũndã, yel-wẽnã yĩnga, la b maan maoong sẽn yõogd bugum Sẽn-Ka-Saab taoore. Dẽ wã, rũndã, yãmb meng mii yell ning sẽn be mam zugu, mam sã n dag n dɩẽ kongr maoongã rũng nemd rũndã, a yaa bũmb sẽn zems Sẽn-Ka-Saab taoor sɩda?»

²⁰A Moyiis sẽn wʋm a Aarõ sẽn gom woto wã, a reegame, la a bas taale.