Read SEBR SÕNGO, 1998 Maan‑kʋʋre 11 Bible Online

Maan‑kʋʋre 11 - SEBR SÕNGO, 1998 bible

Maan‑kʋʋre 11

¹Sẽn-Ka-Saab goma ne a Moyiis ne a Aarõ n yeel-b yaa:

²«Yeel-y Israyɛll nebã yaa: Rũmsã fãa sẽn be dũniyã zugã wɛɛngẽ, ad yãmb sẽn tõe n dɩ-b rãmba:

³Yãmb tõe n dɩɩ rũms nins fãa sẽn tar nao-ben-boagla, la sẽn bɩɩsdã.

⁴La ka rũms nins fãa sẽn bɩɩsdã, wall sẽn tar nao-ben-boaglã fãa la yãmb tog n dɩ ye. Ad yãmb sẽn ka tõe n dɩ rũms ninsi: Yaa yʋgemde, bala, a bʋkdame, la a ka tar nao-ben-boagl ye. Bɩ y geelg yẽnda wa rũm-dẽgdo.

⁵Yaa seere, bala, a bʋkdame, la a ka tar nao-ben-boagl ye. Bɩ y geelg yẽnda wa rũm-dẽgdo.

⁶Yaa soaamba, bala, a bʋkdame, la a ka tar nao-ben-boagl ye. Bɩ y geelg yẽnda wa rũm-dẽgdo.

⁷Yaa kurkuri, bala, yẽnda tara nao-ben-boagl sẽn yaa sɩlemse, la a ka bɩɩsd ye. Bɩ y geelg-a wa rũm-dẽgdo.

⁸Da wãb-y rũm-bãmbã nemd ye, la ra-y sɩɩs-y b kũum me ye. Bɩ y geelg-b wa rũm-dẽgdo.

⁹Ad koomẽ bõn-vɩɩlɩ nins yãmb sẽn tõe n dɩ wã: Yãmb tõe n dɩɩ bõn-vɩɩlɩ nins fãa sẽn tar gɛda, la b tar pagdã, la b vɩ koomẽ wã. Sã n yaa ko-kãsengã, wall kʋɩlsã pʋse.

¹⁰La sã n yaa ne bõn-bãoonegã, wall bõn-vɩɩlɩ a taab nins fãa sẽn vɩ koomẽ wã, sã n yaa ko-kãsemsẽ, tɩ yaa kʋɩlsẽ, n ka tar gɛda, la b ka tar pagdo, bãmb fãa na n yɩɩ yel-beed yãmb yĩnga.

¹¹Bãmb na n yɩɩ yel-beed yãmb yĩnga, la yãmb ka tog n dɩ bãmb nemdo, la y ka tog n sɩɩs b kũum me ye.

¹²Bõn-vɩɩlɩ nins fãa sẽn be koomẽ, n yaool n ka tar gɛda, la b ka tar pagdã na n yɩɩ yel-beed yãmb yĩnga.

¹³Bõn-yɩgdɩ wã sʋka, ad yãmb sẽn tog n ges b rãmb wa yel-beed yãmb yĩnga, la y sẽn ka tog n dɩ-b-rãmba: Yaa yɩbrgo, pa-nand-tugri, ne sɩl-faoogo.

¹⁴Leb n yaa kosenkonde, ne wɩbga, la bõn-yɩgdɩ sẽn wẽnd woto.

¹⁵Yaa gãabgo, ne bõn-yɩgdɩ sẽn wẽnd woto.

¹⁶Yaa neoongo, ne viuugu, la lʋre, ne wɩbga, la sɩls buud sẽn wẽnd woto.

¹⁷Yaa viu-liuula, ne koom-daoogo, la kɩɩm-liuula.

¹⁸Yaa faoogo, ne salsanga, la yɩbrgo.

¹⁹Yaa bulwãoogo, ne rãongo, bãmb buud a taaba, la ne nakomsugri, ne zãnkita.

²⁰Bõn-bãooneg nins fãa sẽn tar-b pɩgsã, la sẽn tar nao a naas n tũud taab n kẽndã na n yɩɩ yel-beed yãmb yĩnga.

²¹Bõn-bãooneg nins fãa sẽn tar-b pɩgsã, la sẽn tar nao a naas n tũud taab n kẽndã sʋka, yãmb tõe n dɩɩ sẽn tar-b gɛy n tõe n tão n yɩk n tiims tẽngã.

²²Ad sʋy buud nins yãmb sẽn tõe n dɩ: Yaa kalwaare, mogdr-zẽenga, ka-saamba, pakenlagemde, ne sʋy buud sẽn wẽnd woto.

²³Bõn-bãooneg nins a taabã fãa sẽn tar pɩgs ne nao a naasã na n yɩɩ yel-beed yãmb yĩnga.

²⁴Bãmb tõe n kɩtame tɩ yãmb lebg rẽgdo. Ned sã n sɩɩs bãmb kũum, a soabã na n yɩɩ rẽgd hal tɩ ta zaabre,

²⁵la ned sã n dɩk bãmb kũum bɩ a soabã pegs a futu, la a na n kell n yɩɩ rẽgd hal tɩ ta zaabre.

²⁶Rũms nins fãa sẽn tar nao-ben-boagl sẽn ka sɩlemse, la a ka bɩɩsdẽ na n yɩɩ rẽgd yãmb yĩnga. Ned ning sẽn na n sɩɩs-a rũm-bãmb na n lebga rẽgdo.

²⁷Rũms nins fãa sẽn tar nao a naas n kẽnd ne nao-kidã na n yɩɩ bõn-dẽgd yãmb yĩnga, ned ning sẽn na n sɩɩs-a bãmb kũum na n yɩɩ rẽgd hal tɩ ta zaabre.

²⁸Ned sã n dɩk bãmb kũum, a soabã na n kell n yɩɩ rẽgd hal tɩ ta zaabre. Bɩ y ges rũm-bãmb wa bõn-dẽgd yãmb yĩnga.

²⁹Rũm-bãooneg nins sẽn vuudã sʋka, ad yãmb sẽn tog n ges b rãmb wa bõn-dẽgd yãmb yĩnga: Yaa Sãbtõaasga, yõngre, ne bãngenlegsre, wa sẽn zems b buudã sẽn yaa to-to,

³⁰yaa kosenkongo, weoogẽ-dao-a-kõbre, bãngenlegsre, kuri, ne gomtɩʋʋgo.

³¹Bɩ y geelg rũm-bãmba wa bõn-dẽgdo, rũm-vuudsã fãa sʋka. Ned sã n sɩɩs bãmb kũum, a soabã na n yɩɩ rẽgd hal tɩ ta zaabre.

³²Bõn-bãmbã a yembr sã n ki n lʋɩ bũmb zugu, bõn-kãng na n lebga rẽgdo. Sã n yaa laok sẽn maan ne raoogo, sã n yaa fuugu, gãongo, bɩ korgo. Baa sã n yaa laok buud fãa b sẽn tar n tʋmdẽ, bɩ b los-a koomẽ, la a na n kell n yɩɩ rẽgd hal tɩ ta zaabre, la rẽ zugẽ, a na n yaool n yɩɩ yɩlemde.

³³Bõn-bãmbã a yembr sã n ki n lʋɩ yagd laok pʋga, bũmb ning fãa sẽn be laokã pʋgã lebga rẽgdo. Bɩ y wãag laokã.

³⁴B sã n dɩk laok-kãng koom n walg bõn-dɩtl buudã fãa, rɩ-kãng na n lebga rẽgdo, la baa sã n yaa bõn-yũudl la b ning laokã pʋga, bõn-yũud-kãng na n lebga rẽgdo.

³⁵Bõn-bãmbã a yembr sã n ki n lʋɩ bũmb zugu, bõn-kãng na n lebga rẽgdo. A sã n lʋɩ wʋng wall yɩgr zugu, bɩ b pãb-b n wã, bãmb lebga rẽgdo, la b yaa bõn-dẽgd yãmb yĩnga.

³⁶La baoosgo, sã n yaa ko-bundum pʋg bɩ bulgẽ la a lʋɩ yã, koomã na n kell n yɩɩ yɩlemde, la yaa ned ning sẽn na n sɩɩs-a bãmb kũumã bal n na n lebg rẽgdo.

³⁷Bãmb sã n ki n lʋɩ bõn-buud b sẽn dɩk n na n bʋd pʋga, bõn-buudã na n kell n yɩɩ yɩlemde.

³⁸La sã n mikame tɩ b wʋlga bõn-buudã ne koom, tɩ b kũumã lʋɩ a pʋgẽ, bɩ y geelg bõn-buudã wa bõn-dẽgd yãmb yĩnga.

³⁹Yãmb sẽn tar noor tɩ rɩ rũms ninsã a yembr sã n ki, tɩ ned sɩɩs a kũumã, a soabã na n lebga rẽgd hal tɩ ta zaabre.

⁴⁰Ned sã n wãb rũng a woto nemdo, bɩ a pegs a futu, la a na n yɩɩ rẽgd hal tɩ ta zaabre, la ned ning me sẽn dɩk-a rũm-kɩɩngã, a na n pegsa a futã, la a na kell n yɩɩ rẽgd hal tɩ ta zaabre.

⁴¹Rũm-bãooneg nins fãa sẽn saagd tẽn-gãongã zugã na n yɩɩ bõn-dẽgd yãmb yĩnga, bɩ ned ra saag n dɩ bãmb ye.

⁴²Yãmb ka tog n dɩ rũm-bãoonegã sẽn saagd tẽn-gãongã zugã baa a yembr ye, la y ka tog n dɩ sẽn vuud-b b pʋsã zutã me ye, la y ka tog n dɩ sẽn kẽnd-b ne nao a naasã wall sẽn tar-b nao kʋʋngã ye. Bala, bãmb yaa bõn-dẽgd yãmb yĩnga.

⁴³Da sɩɩs-y bõn-vuudsã n dẽgem yãmb mens ye. Ra sak-y tɩ b sɩɩs yãmb n dẽgm-y ye. Yãmb sã n sɩɩs bãmba, yãmb na n lebga rẽgdo.

⁴⁴Bala, mam yaa Sẽn-Ka-Saab sẽn yaa yãmb Wẽnnaam. Yãmb tog n manega y mens n yɩ pʋ-peelem dãmba. Bala, mam yaa pʋ-peelem soaba. Dẽ wã, ra sak-y n bas-y tɩ rũm-bãoonegã sẽn saagd tẽn-gãongã zugã rẽgem yãmb ye.

⁴⁵Bala, mam yaa Sẽn-Ka-Saabo, la yaa maam n yiis yãmb Ezɩpt tẽnga pʋga, n na n kell n yɩ yãmb Wẽnnaam. Rẽ wã, bɩ y yɩ pʋ-peelem dãmba. Bala, mam yaa pʋ-peelem soaba.

⁴⁶Yõwã yaa tõogo, la yaa sẽn kẽed ne rũmsã wɛɛngẽ, ne bõn-yɩgdɩ wã, ne bõn-vɩɩlɩ nins fãa sẽn saagd koomẽ wã, la bõn-vɩɩsã sẽn saagd tẽn-gãongã zugã.

⁴⁷Woto yaa sẽn na n sõng tɩ b bãng sẽn yaa rẽgd ne sẽn ka rẽgd n bake, la b bãng rũng ning b sẽn tõe n dɩ, n welg ne rũng ning b sẽn ka tõe n dɩ.»