Read SEBR SÕNGO, 1998 Maan‑kʋʋre 12 Bible Online

Maan‑kʋʋre 12 - SEBR SÕNGO, 1998 bible

Maan‑kʋʋre 12

¹Sẽn-Ka-Saab goma ne a Moyiis n yeele:

²Ad bũmb ning fo sẽn na n togs Israyɛll nebã: Yeel-b tɩ pag sã n dɩk pʋg n dog bi-ribla, pʋg-kãng na n yɩɩ rẽgd hal tɩ ta rasem a yopoe. Yẽnda na n yɩɩ rẽgd wa yẽnda sẽn yãnd a pekr wakate.

³La rasem a nii wã daare, bɩ b kẽes biigã bãongo.

⁴La pagã tog n kell n yalsa rasem pis-tã la a tãab n paase, n yɩlg a menga, a rogma zɩɩmã yĩnga. La yẽnda ka tog n sɩɩs bũmb sẽn welg toor ye, la a ka tog n kẽ sɛk roogã pʋg me ye, hal t'a yɩlgrã rasem sõor pidi.

⁵Pag sã n dog bi-pugla, pʋg-kãng na n yɩɩ rẽgd hal tɩ ta rasem piig la a naase, wa yẽnda sẽn yãnd a pekr wakate, la a tog n kell n yalsa rasem pis-yoob la a yoobe, n yɩlg a menga, a rogmã zɩɩmã yĩnga.

⁶Pagã yɩlgr rasem sõor sã n pidi, sã n yaa bi-ribl bɩ bi-pugl la a rog yã, a tog n talla pe-ribl sẽn zems yʋʋmd n wa maan-kʋʋdã nengẽ sɛk roogã noore, tɩ b maan maoong sẽn yõogd bugum, la a wa ne man-wan-bila, bɩ walle, tɩ b maan maoong a yel-wẽnã sugr kũun yĩnga.

⁷Bɩ maan-kʋʋdã reeg bõn-kãens n kẽng Sẽn-Ka-Saab taoore, n maan paasg pagã yĩnga. Rẽ, pagã na n lebga yɩlemde, a zɩɩmã sẽn daagã yĩnga. Woto yaa pag sẽn dog bi-ribl bɩ bi-pugl tõogo.

⁸La sã n mikame tɩ pagã ka tar pãn-tõog n na n paam pe-ribla, bɩ a wa ne wal a yiibu, wall man-wãn-bi a yiibu, t'a yembr yɩ maoong sẽn yõogd bugmã yĩnga, t'a to wã yɩ maoong yel-wẽnã sugr kũun yĩnga. Bɩ maan-kʋʋdã maan paasg pagã yĩnga, la yẽnda na n lebga yɩlemde.