Read SEBR SÕNGO, 1998 Maan‑kʋʋre 14 Bible Online

Maan‑kʋʋre 14 - SEBR SÕNGO, 1998 bible

Maan‑kʋʋre 14

²Daar ning b sẽn na n tall yĩn-gãong bãag soab n wa maan-kʋʋdã nengẽ tɩ b yɩlg-a wã, ad tõog ning sẽn kẽed bõn-kãng wɛɛngẽ.

³Maan-kʋʋdã yita sik zĩigẽ wã n maag a meng n ges yĩn-gãong bãagã soaba, la a sã n mik t'a yĩn-gãong bãagã sãoogame n bas-a,

⁴bɩ maan-kʋʋdã yeel tɩ b bao liuun-vɩɩs a yiib sẽn yaa yɩlmã, ne sɛɛdr tɩɩg raado, la peen-miuugu, ne izop tɩɩg vãad n tall n wa ne bãadã meng yɩlgr yĩnga.

⁵La bɩ maan-kʋʋdã kɩt tɩ b kodg liuun-vɩɩg a yembr yagd laag ning ko-sõngã sẽn be a pʋgẽ wã zugu.

⁶La bɩ a rɩk liuun-vɩɩg ning sẽn ketã, ne sɛɛdr tɩɩgã raado, la peen-miuugã n paas ne izop tɩɩgã vãadã, n suk liuul ning b sẽn kodg ko-sõngã zugã zɩɩm pʋga.

⁷Bɩ a yãk zɩɩmã n mes ned ning sẽn dat-a yɩlgr ne a wãoodã naoor a yopoe. Dẽ poore, bɩ a wilg t'a soabã lebga yɩlemde, la a rɩk liuun-vɩɩgã n bas t'a yɩk n kẽ weoogã.

⁸Ned ning sẽn paam-a yɩlgrã tog n pegsa a futu, la a põng a yĩngã kõbdã zãnga, la a so koom. Dẽ, a lebga yɩlemd zãnga. Rẽ sã n looge, a soabã tõe n yaool n kẽe sik zĩigã pʋga, la a tog n paa yɩng rasem a yopoe n yaool n kẽ a fu-roogẽ wã.

⁹La rasem a yopoe wã daare, bɩ a põng a yĩngã kõbd zãnga, a põng a zugã, a toɛɛngã, ne a nin-kõbdã. Yaa a yĩngã kõbd zãng la a tog n põnge. Rẽ zugẽ, bɩ a pegs a futu, la a so koom. Dẽ, a lebga yɩlemde.

¹⁰La rasem a nii wã daare, bɩ a soabã wa ne pe-ribli a yiibu sẽn ka tar zanga, ne pe-bi-sadg sẽn zems yʋʋmde, n ka tar zanga, la zom-bãaneg sẽn zems wamd pidingu, b sẽn nag ne kaam, n paas ne kaam sẽn zems litr pʋɩ-sʋka, tɩ yɩ bõn-koaadl kũuni.

¹¹Bɩ maan-kʋʋd ning sẽn get-a yɩlgrã yellã tall ned ning sẽn dat-a yɩlgrã ne a kũunã, n kolg Sẽn-Ka-Saab taoore, n yals sɛk roogã noore.

¹²La bɩ maan-kʋʋdã reeg pe-ribl a yembre, n naag ne kaamã litr pʋɩ-sʋkã, n maan maoong tɩ yɩ kũun a beegrã sugr kũun yĩnga. La bɩ a kẽng ne bõn-kãens Sẽn-Ka-Saab taoore, n tɩ yuum-b wa sẽn zems miningã.

¹³La bɩ maan-kʋʋdã kodg pe-riblã zĩig ning b sẽn kʋʋd beegr rũngã ne maoong sẽn yõogd bugmã, sẽn yaa zĩig sẽn welg toorã pʋgã. Bala, beegr maoongã rũngã, ne maoong sẽn yõogd bugmã rũng yaa maan-kʋʋdã n so. Yẽnda yaa bũmb sẽn welg toor wʋsgo.

¹⁴Bɩ maan-kʋʋdã rɩk beegr maoongã zɩɩmã, n yãk n tẽk ned ning sẽn dat-a yɩlgrã rɩtg tʋbre, ne a rɩtg nug-raoogo, la a rɩtg nao-raoogo.

¹⁵La bɩ maan-kʋʋdã rɩk kaamã litr pʋɩ-sʋkã n pʋdg a goabg nugã pʋga.

¹⁶La bɩ maan-kʋʋdã tẽk kaamã sẽn be yẽnda goabg nugã pʋgã ne a rɩtg nug-bil n mes Sẽn-Ka-Saab taoor naoor a yopoe.

¹⁷Maan-kʋʋdã tog n dɩka kaamã sẽn ket yẽnda nugẽ wã, n yãk bilf n tẽk ned ning sẽn dat-a yɩlgrã rɩtg tʋbre, ne a rɩtg nug-raoogo, la a rɩtg nao-raoogo. A tẽkdame n bʋʋg beegr maoongã zɩɩm yẽnda sẽn dag n tẽgsã.

¹⁸Dẽ poore, maan-kʋʋdã rɩkda kaamã sẽn kell yẽnda nugẽ wã, n ning ned ning sẽn dat-a yɩlgrã zugu, n yiis nin-kãng yel-wẽnã Sẽn-Ka-Saab taoore.

¹⁹Rẽ zugẽ, bɩ maan-kʋʋdã maan maoong n kos sugr a soabã yel-wẽnd yĩnga. Yẽnda tog n maana woto tɩ ned ning sẽn dat-a yɩlgrã rẽgdã tõe n paam yẽesgo. Rẽnda sã n sɛ, maan-kʋʋdã kodgda maoong sẽn yõogd bugmã rũnga.

²⁰Maan-kʋʋdã tog n dɩka maoong sẽn yõogd bugmã ne bõn-koaadl kũunã n naag taab n yõog bugum tẽn-kugrã zugu. Bɩ maan-kʋʋdã yɩlg-a, la a na n lebga yɩlemde.

²¹Sã n mikame t'a yaa naong soab n ka tar pãn-tõog sẽn sekde, bɩ a bao pe-ribl-yend n wa ne tɩ yɩ beegr maoongã yĩnga, tɩ b yuum-a n maan paoosg yẽnda yĩnga. La a bao zom-bãaneg wam-yɛng sẽn nag ne kaam, la kaam litr pʋɩ-sʋk n wa ne tɩ yɩ kũuni.

²²La a wa ne wal a yiibu, wall man-wan-bi a yiib sẽn zems a pãnga, t'a yembrã yɩ maoong yel-wẽndã yĩnga, t'a to wã yɩ maoong sẽn yõogd bugmã yĩnga.

²³La rasem a nii wã daare, bɩ a tall kũun-kãens fãa n wa maan-kʋʋdã nengẽ, sɛk roogã noor Sẽn-Ka-Saab taoore, a mengã yɩlgr yĩnga.

²⁴Bɩ maan-kʋʋdã reeg pe-riblã ne kaamã litr pʋɩ-sʋkã n maan beegr maoongã, n yuum-a Sẽn-Ka-Saab taoore.

²⁵Bɩ maan-kʋʋdã kodg maoongã pe-riblã. La a tẽk beegr maoong rũngã zɩɩmã, n ning ned ning sẽn dat-a yɩlgrã rɩtg tʋbre, ne a rɩtg nug-raoogo, la a rɩtg nao-raoogo.

²⁶La bɩ maan-kʋʋdã rɩk kaamã n kiig a goabg nugã pʋga.

²⁷La bɩ a rɩk a rɩtg nug-bilã n tẽk kaamã sẽn be yẽnda nug-goabgã pʋgã n mes Sẽn-Ka-Saab taoor naoor a yopoe.

²⁸La maan-kʋʋdã tog n yãka zɩɩmã sẽn ket yẽnda nugẽ wã, n tẽk ned ning sẽn dat-a yɩlgrã rɩtg tʋbre, ne a rɩtg nug-raoogo, la a rɩtg nao-raoogo. A tog n tẽk-a lame n bʋʋg beegr maoongã zɩɩm yẽnda sẽn dag n tẽkã.

²⁹Bɩ maan-kʋʋdã rɩk kaam ning sẽn kell yẽnda nugẽ wã n kiig sẽn dat-a yɩlgrã zugu, n kɩt t'a paam a beegrã sugr Sẽn-Ka-Saab taoore.

³⁰Rẽ poore, bɩ a reeg wallã, bɩ man-wãn-bil a yembr ning a sẽn wa ne wa sẽn zems a sẽn maan a pãng sẽn tõe

³¹n paamã, n maan maoong a beegrã yĩnga, la a rɩk a to wã n maan maoong sẽn yõogd bugum n naag ne bõnkoaadl kũunã. La bɩ maan-kʋʋdã maan yɩlgr tʋʋmd ned ning sẽn dat-a yɩlgrã yĩng Sẽn-Ka-Saab taoore.

³²Yõwã yaa ned sẽn tar wãood yɩlgr tõogo, t'a soabã paoong yaool n ka waoogẽ ye.

³³Sẽn-Ka-Saab leb n yeela a Moyiis ne a Aarõ yaa:

³⁴Yãmb sã n wa n ta Kana tẽngã mam sẽn kõ yãmb tɩ y soogã pʋgẽ, tɩ mam kɩt tɩ wãood bãag puk tẽngã roog zugu,

³⁵bɩ ned ning sẽn so-a roogã kẽng n tɩ togs maan-kʋʋdã n yeele: «Mam yãnda bũmb sẽn puk mam doogã zug wa bãaga.

³⁶Bɩ maan-kʋʋdã kõ noor tɩ b vaag roogã teed zãng tɩ yẽnda yaool n kẽ n maag a meng n ges bãagã. Woto, bũmb ning fãa sẽn dag n be roogã pʋgẽ wã ka rẽgem ye. Rẽ poore, bɩ maan-kʋʋdã kẽ n ges roogã.

³⁷Bɩ a ges bãagã. Maan-kʋʋdã sã n mik tɩ lond n be roogã lals zug n yaa kẽega, wall miuugu, n wẽnd wa a võda lalgã n kẽ pʋgẽ,

³⁸bɩ maan-kʋʋdã lebg n yi roogẽ wã, la a sã n ta roogã noore, bɩ a lebs roogã n pag n bas tɩ ta rasem a yopoe.

³⁹La rasem a yopoe wã daare, bɩ maan-kʋʋdã lebg n leb roogẽ wã. La a sã n tɩ mik tɩ bãagã yalga roogã lals zugu,

⁴⁰bɩ a kõ noor tɩ b yãk kug nins bãagã sẽn be b zutã, n tall-b n yi tẽngã kɩreng n tɩ lob zĩ-rẽgd zĩigẽ.

⁴¹La bɩ maan-kʋʋdã kɩt tɩ b pẽeg roogã bolbã, n wʋk boalgã n yi tẽngã kɩreng n tɩ lob zĩ-rẽgd zĩigẽ.

⁴²Rẽ poore, bɩ b bao kug a taab n lebs b sẽn yãk-b rãmbã zĩigẽ. La b bao boalg a to n lebs n bol roogã.

⁴³La b sẽn yãgs kugã, la b pẽeg roogã boalgã, n lebs n bol-a wã poore, b sã n mik tɩ bãagã leb n pukame,

⁴⁴bɩ maan-kʋʋdã lebg n leb roogẽ wã, la a sã n yãnd tɩ bãagã yalga roogã lals zutu, wilgdame tɩ yaa wãood sẽn ka sɛt n tar doogã. Ro-kãng lebga bõn-dẽgdo.

⁴⁵Bɩ b siig roogã, la b wʋk a kugã ne a sugrã zãnga, ne roogã boalgã, n yi tẽngã kɩreng n tɩ lob zĩ-rẽgd zĩigẽ.

⁴⁶La roogã sẽn ket n pagã wakate, ned sã n kẽ a pʋgẽ, a soab na n yɩɩ rẽgd hal tɩ ta zaabre.

⁴⁷La ned ning sẽn na n gãand-a roogã pʋg tog n pegsa a futu. Ned ninga me sẽn na n dɩ-a roogã pʋg tog n pegsa a futu.

⁴⁸La b sẽn lebs roogã n bolã poore, maan-kʋʋdã sã n lebg n leb n tɩ mik tɩ bãagã ka yalge, bɩ a wilg tɩ roogã yaa yɩlemde. Tɩ bala, bãagã sɛɛme.

⁴⁹La b sã n na n yɩlg roogã, bɩ maan-kʋʋdã bao liuuli a yiibu, ne sɛɛdr tɩɩg raado, la peen-miuugu, ne izop vãado, n tall n wa.

⁵⁰Bɩ maan-kʋʋdã kodg liuul a yembr yagd laagẽ, ko-bundum sẽn be a pʋgẽ.

⁵¹La bɩ a rɩk sɛɛdr tɩɩg raoogã, ne izop vãadã, la peen-miuugã, ne liuun-vɩɩgã, n suk bãmb liuul ning b sẽn kʋ wã zɩɩmã ne ko-bundmã sẽn be yagd laagã pʋgã. La a rɩk-a n mes roogã zug naoor a yopoe.

⁵²Maan-kʋʋdã sã n dɩk liuulã zɩɩm, ne ko-bundmã, la liuun-vɩɩgã ne sɛɛdr tɩɩgã raadã, la izop vãadã ne peen-miuugã n yɩlg roogã n sɛ,

⁵³bɩ a bas liuun-vɩɩgã t'a yɩke, n yi tẽngã n kẽ weoogo. Yaa woto la a tog n maan n yɩlg roogã, la roogã na n yɩɩ yɩlemde.

⁵⁴Yõwã yaa tõog wãood buud fãa ne rasempʋɩɩg buud fãa yĩnga,

⁵⁵la ne fut bãaga, la roog bãag yĩnga.

⁵⁶Yaa bã-moatga, ne nodr buud fãa sẽn pelge.

⁵⁷A yaa zãmsg sẽn wilg bũmb sẽn yaa rẽgdo ne bũmb sẽn ka rẽgdo. Woto yaa tõogo, wãood wɛɛngẽ.»