Read SEBR SÕNGO, 1998 Maan‑kʋʋre 16 Bible Online

Maan‑kʋʋre 16 - SEBR SÕNGO, 1998 bible

Maan‑kʋʋre 16

¹A Aarõ kom-dibli wã sẽn kẽng Sẽn-Ka-Saab taoor n ki wã loogr zugẽ, Sẽn-Ka-Saab goma ne a Moyiisi.

²Sẽn-Ka-Saab yeela a Moyiis yaa: «Yeel f kẽem a Aarõ t'a ra n kẽed sɛk roogã pʋg wakat fãa ye, t'a ra lɩk fu-lillidgã sẽn be kaset koglgã sɛɛgã ye. Sẽn na n yɩlẽ t'a ra wa ki ye. Bala, mam na n puka m meng sawadg pʋg bas-taal koglgã zugu.

³Ad a Aarõ sẽn na n kẽ sɛk roogã pʋg to-to. A tog n zãa loalg sẽn na n maan kongr maoongo, la a zã pe-raoog sẽn na n maan maoong sẽn yõogd bugum.

⁴Yẽnda tog n yeelga fu-yor-wɛlgdgã b sẽn wʋg ne lamd gĩs-bãanega, la a sẽgen lamd gĩs-bãanega, la a sẽbg sẽbdg b sẽn wʋg ne lamd gĩs-bãanega, la a vil a zug ne zu-vindg b sẽn wʋg ne lamd gĩs-bãanega. Bãmbã fãa yaa te-yerdɩ sẽn welg toore, la a tog n soo koom n yaool n yeelg-ba.

⁵A Aarõ tog n deega boees a yiib Israyɛll nebã nengẽ yel-wẽnã maoong yĩnga, la a reeg pe-raoog maoong sẽn yõogd bugmã yĩnga.

⁶A Aarõ tog n baoo loalg n maan a mengã yel-wẽn maoongo, n maan paoosg yẽnda mengã ne a yirã rãmb yĩnga.

⁷Yẽnda tog n dɩka boees a yiibã n yalsg-b Sẽn-Ka-Saab taoore, sɛk roogã noore.

⁸Bɩ a Aarõ maan poeer boees a yiibã zutu, yaa poeer sẽn na n maan n bãng boɛɛg ning sẽn na n yɩ-a Sẽn-Ka-Saab rẽndã, la sẽn na n yɩ-a a Azazɛll rẽnda.

⁹La bɩ a Aarõ rɩk boɛɛg ning poeerã sẽn yãk tɩ yaa Sẽn-Ka-Saab rẽndã n maan yel-wẽnã maoongo.

¹⁰La bɩ b tall boɛɛg ning poeerã sẽn yãk tɩ yaa a Azazɛll rẽndã, n wa Sẽn-Ka-Saab taoor vɩɩga, n maan paoosg tʋʋmd ne-a, la b rig-a n kẽes weoog a Azazɛll yĩnga.

¹¹Bɩ a Aarõ wa ne loalg ning sẽn na n yɩ-a yel-wẽnã maoong yĩngã, n maan paoosg yẽnda ne a yirã rãmb yĩnga. Yẽnda tog n kodga loalgã a mengã yel-wẽnã yĩnga.

¹²A Aarõ tog n dɩka wisd laag n yãk tẽn-kugrã zug bugmã bug-saal n pids-a Sẽn-Ka-Saab taoore, la a yõng wisd-zomã nug-pidung a yiib n ningi, n tall bõn-kãens fãa n kẽ fu-lillidgã poore.

¹³A tog n yãka wisdã n ning bugmã zug Sẽn-Ka-Saab taoore, tɩ wisdã bug-zõos lud bas-taal zĩigã sẽn be koglgã limdã zugã. Woto, yẽnda ka na ki ye.

¹⁴Bɩ a tẽk loalgã zɩɩmã ne a nug-bil n mes bas-taal zĩigã yaangã. Bɩ a tẽk zɩɩmã ne a nug-bil n mes bas-taal zĩigã taoor naoor a yopoe.

¹⁵La bɩ a kodg nebã yel-wẽnã maoongã boɛɛg n kok a zɩɩmã n tall n kẽ fu-lillidgã pʋga. Yẽnda tog n dɩka zɩ-kãng n maan wa yẽnda sẽn dag n maan to-to ne loalgã zɩɩmã, n yãk-a n mes bas-taal zĩigã zugu, ne a taoore.

¹⁶Yaa a woto la yẽnda tog n maan zĩig sẽn welg toor n yɩɩdã yĩnga, Israyɛll nebã sẽn dẽgmã ne b tʋʋm-beedã, la b yel-wẽnã fãa yĩnga. Yẽnda tog n maana a woto me ne sɛk roogã sẽn be ne bãmb b rẽgdã sʋkã.

¹⁷A Aarõ sã n wa n kẽ zĩig sẽn welg toor n yɩɩdã pʋg n na n maan yɩlgr tʋʋmdã, bɩ ned ra kẽ sɛk roogã pʋg ye, hal t'a Aarõ wa n yi be. A Aarõ tog n kosa sugr a mengã yĩnga, la a zakã rãmb yĩnga, ne Israyɛll nebã fãa yĩnga.

¹⁸Bɩ a Aarõ yi n kẽng tẽn-kugrã sẽn be Sẽn-Ka-Saab taoorã n tɩ yɩlg-a. Bɩ yẽnda yãk loalgã ne boɛɛgã zɩɩm n ning tẽn-kugrã kogsã fãa zut n gilgi.

¹⁹A Aarõ tog n tẽka zɩɩmã ne a nug-bil n mes tẽn-kugrã zug naoor a yopoe. Yẽnda na n maana a woto n yɩlg tẽn-kugrã la a welg-a toore, Israyɛll nebã sẽn dẽgmã yĩnga.

²⁰A Aarõ sã n yɩlg zĩig sẽn welg toor n yɩɩdã ne sɛk roogã ne tẽn-kugrã n sɛ, bɩ a tall boe-vɩɩgã n kolge.

²¹Bɩ a Aarõ rɩk a nus a yiibã n tik boe-vɩɩgã zugu, n vẽneg n togs Israyɛll nebã kongrã fãa ne b yel-beedã zãnga, ne b yel-wẽnã fãa tɩ sig boe-vɩɩgã zugu. Yẽnda sã n sik yel-bãmb boɛɛgã zug n sɛ, bɩ a rɩk-a n kɩs rao ning sẽn pẽ yẽnda sɛɛgẽ t'a rig-a n kẽes weoogo.

²²La boɛɛgã na n zɩɩ bãmb kongrã fãa a zug n zoe n kẽng zĩ-zãrga. Bɩ b rig boɛɛgã n kẽes weoogo.

²³Dẽ, bɩ a Aarõ lebg n kẽ sɛk roogã pʋga, n yees a fut nins sẽn wʋg ne lamd gĩsã, yẽnda sẽn dag n yeelg wakat ning a sẽn wa n dat n kẽ zĩig sẽn welg toor n yɩɩdã pʋgẽ wã, n bas-b beenẽ.

²⁴Yẽnda tog n kẽe zĩig b sẽn welg toorã pʋg n so koom, la a lebs a futã n yeelge, n yi n maan maoong sẽn yõogd bugum yẽnda mengã yĩnga, la a maan maoong sẽn yõogd bugum nebã yĩnga. Woto yaa sẽn na n yɩlg a meng la a yɩlg nebã me.

²⁵Bɩ a rɩk maoongã rũng kaam n yõog bugum tẽn-kugrã zug yel-wẽnã sugr kũun yĩnga.

²⁶Ned ning sẽn dig boɛɛgã n kẽes weoog a Azazɛll yĩngã tog n pegsa a futu, la a so koom. Rẽ poore, a na yaool n kẽ sik zĩigã pʋga.

²⁷La loalg ning ne boɛɛg ning b sẽn kʋ yel-wẽnã yĩng n yãk b zɩɩmã n kẽ zĩig sẽn welg toorã pʋg n maan paoosgã, b tog n dɩka bãmb n yiis sik zĩigã pʋg n yõog bugum ne b gãndã, la b nemdã ne b pʋ-teedã.

²⁸Ned ning sẽn na n yõog-a bãmb bugmã tog n pegsa a futã, la a so koom, la rẽ poore, a na yaool n kẽ sik zĩigã pʋga.

²⁹Ad no-tũudg ning sẽn ka sɛtã, b sẽn kõ yãmb t'a tog n pa wakat fãa yĩngã. Kiuug a yopoe soabã rasem piig daare, bɩ y loe noore, la y bas y tʋʋmã fãa, sã n yaa tẽng-n-neda, wall sãan sẽn wa n be yãmb sʋka.

³⁰Bala, yaa badaar la b maand paasg tʋʋmd yãmb yĩnga, n yɩlg yãmba. Dẽ, yãmb na n paama yɩlgr ne y yel-wẽnã fãa Sẽn-Ka-Saab taoore.

³¹Badaar na n yɩɩ vʋʋsg daar yãmb yĩnga, la yãmb tog n loee noore. Yõwã yaa no-tũudg sẽn ka sɛta.

³²Yaa maan-kʋʋd ning b sẽn yãk n pʋdg a zug kaam n ning maan-kʋʋr tʋʋmd a zug t'a tõe n ledg a ba zĩig maan-kʋʋrã tʋʋmd pʋgã, n na n yeelg a fut nins sẽn welg toorã sẽn wʋg ne lamd gĩsã, n maan paoosg tʋʋmdã.

³³Maan-kʋʋdã tog n maana paoosg tʋʋmdã zĩig sẽn welg toor n yɩɩdã yĩnga, la sɛk roogã yĩnga, la ne tẽn-kugrã yĩnga, la a maan paoosg maan-kʋʋdbã yĩnga, la Israyɛll nebã yĩnga.

³⁴No-tũud-kãngã yaa yãmb yĩng wakat sẽn kõn sa yĩnga, sẽn na n yɩlẽ tɩ yʋʋmd pʋgẽ fãa vugri, bɩ yãmb maan bõn-kãng n yɩlg Israyɛll nebã yel-wẽnã fãa.» Bãmb maana wa Sẽn-Ka-Saab sẽn dag n yeel a Moyiisã.