Read SEBR SÕNGO, 1998 Maan‑kʋʋre 17 Bible Online

Maan‑kʋʋre 17 - SEBR SÕNGO, 1998 bible

Maan‑kʋʋre 17

¹Sẽn-Ka-Saab yeela a Moyiis yaa:

²«Yeel a Aarõ ne a kambã, la Israyɛll nebã fãa yaa: ‹Ade, Sẽn-Ka-Saab yetame:

³Israyɛll buudã ned sã n kodg naaf bɩ pesgo, wall bʋʋg sik zĩigã pʋga, wall a yɩnga,

⁴n ka reng n tall-a n wa Sẽn-Ka-Saab sɛk roogã noor n wa rɩk-a n kõ Sẽn-Ka-Saabo, b na n soka a soabã, a sẽn daag zɩɩmã yĩnga. Yẽnda sẽn daag zɩɩmã yĩnga, b na n yiisa yẽnda a buudã sʋka.

⁵Woto yaa sẽn na n yɩlẽ tɩ Israyɛll nebã ra tall b maoongã n tɩ maan we-kɛɛnga, la tɩ b tõe n tall-a n wa Sẽn-Ka-Saab nengẽ sɛk roogã noore, maan-kʋʋdã taoore, tɩ b maan vɩ-bãan maoong Sẽn-Ka-Saab waoogr yĩnga.

⁶Bɩ maan-kʋʋdã rɩk zɩɩmã n mes Sẽn-Ka-Saab tẽn-kugrã zugu, sɛk roogã noore, la a rɩk kaamã n yõog bugum tɩ yɩ yũ-noog Sẽn-Ka-Saab yĩnga.

⁷Israyɛll nebã ka tog n leb n maan b maoongã tẽn-kugã sẽn yaa boeesã zutu, bõn-kãng yaa wa yoobo. Yõwã na n yɩɩ no-tũudg sẽn ka sɛta, bãmb ne b yagensã yĩnga.

⁸Dẽ wã, yeel-b yaa: ‹Israyɛll buudã neda, bɩ sãan sẽn be yãmb sʋkã sã n dat n maan maoong sẽn yõogd bugum wall maoong a to,

⁹n ka reng n tall-a n wa sɛk roogã noor tɩ yɩ Sẽn-Ka-Saab rẽnda, b na n yiisa nin-kãngã soab a buudã sʋka.› »

¹⁰«Israyɛll buudã neda, wall sãamb nins sẽn be bãmb sʋkã ned sã n dɩ zɩɩm, baa sẽn yaa bũmb ning zɩɩm, mam na n wẽnemda m neng n bas a soabã, a sẽn dɩ zɩɩmã yĩnga, la mam na n yiisa yẽnda a buudã sʋka.

¹¹Bala, yĩngã vɩɩm bee zɩɩmẽ wã. Mam kõt-a-la yãmb tɩ y raag-a tẽn-kugrã zugu, tɩ yãmb tõe n paam y yel-wẽnã sugri. Bala, yaa vɩɩm sẽn be zɩɩmã pʋgẽ wã yĩng n kɩt tɩ zɩɩm tõe n pek yel-wẽnã.

¹²Yaa rẽndã yĩng n kɩt tɩ mam yeel Israyɛll nebã yaa: Bɩ yãmb ned baa a yembr da rɩ zɩɩm ye. La sãan sẽn be yãmb sʋkã me ka tog n dɩ zɩɩm ye.

¹³Israyɛll nebã sʋk neda, bɩ sãamb nins sẽn be bãmb sʋkã ned sã n kẽng tãoosg n tɩ paam rũng bɩ bõn-yɩgdre, b sẽn tar noor n tõe n wãb a nemdã, bɩ b raag a zɩɩmã tẽng n bus-a ne tom.

¹⁴Bala, bõn-vɩɩl buudã fãa vɩɩm bee a zɩɩmẽ. Yaa rẽ yĩng n kɩt tɩ mam yeel Israyɛll nebã yaa: Da rɩ-y bũmb zɩɩm ye. Bala, bõn-vɩɩl buudã fãa vɩɩm be a zɩɩmẽ. La ned sã n dɩ zɩɩm b na n yiis-a-la buudã sʋka.

¹⁵Ned ning fãa sẽn na n dɩ-a rũng sẽn ki a toore, wall rũng a to sẽn kʋ, sã n yaa tẽng-n-neda, wall sãana, bɩ a soab pegs a futu, la a so koom, la yẽnda na n yɩɩ rẽgd hal tɩ ta zaabre, n yaool n lebg yɩlemde.

¹⁶La a soabã sã n ka pegs a futu, la a so koom, a kongrã na n zĩnda a meng zugu.»