Read SEBR SÕNGO, 1998 Maan‑kʋʋre 2 Bible Online

Maan‑kʋʋre 2 - SEBR SÕNGO, 1998 bible

Maan‑kʋʋre 2

¹Ned sã n dat n kõ zom kũuni, tɩ yɩ maoong Sẽn-Ka-Saab yĩnga, a tog n waa ne zom-bãanega. La a tog n walga zomã kaam, la a ning-a tɩdare.

²Yẽnda tog n talla a kũunã n kẽng a Aarõ kambã sẽn yaa maan-kʋʋdbã nengẽ. La bɩ a yõng zom-bãanegã sẽn ning kaamã ne tɩdarã ne nugu, tɩ maan-kʋʋdã reeg-a n yõog bugum tẽn-kugrã zugu, t'a yɩ tẽegr yĩnga. Rẽndã yaa kũun b sẽn yõogd bugum t'a yũug yɩ noog Sẽn-Ka-Saab yĩnga.

³Bõn-koaadl kũunã zom ning sẽn kellã na n lebga a Aarõ ne a kambã n so. Rẽ yaa bũmb sẽn welg toore, b sẽn yãk kũun ning sẽn yõogd bugum n kõt Sẽn-Ka-Saab pʋgẽ wã.

⁴Fo sã n dat n kõ Sẽn-Ka-Saab kũun ne bũmb sẽn wʋm wʋngẽ, bɩ f rɩk zom-bãanegã sẽn nag ne kaamã, n maan boaal-boaal sẽn ka rã-bɩlle, ne bur-maas sẽn ka rã-bɩlle, n tar kaam.

⁵Fo kũunã sã n yaa bõn-koaadl kũun b sẽn kɩɩm dʋk pʋgẽ, bɩ f maan-a ne zom-bãaneg b sẽn nage, n ka tar rã-bɩll ye.

⁶Bɩ f wes-a bãooneg-bãoonego, n ning kaam tɩ yɩ zom kũuni.

⁷Fo sã n dat n kõ bõn-koaadl kũun sẽn kɩɩm dʋk pʋgẽ, bɩ f maan-a ne zom-bãaneg sẽn nag ne kaam.

⁸La fo sã n tall zomã n maan woto n sɛ n na n kõ Sẽn-Ka-Saabo, bɩ f rɩk-a n wa kõ maan-kʋʋdã t'a ning-a tẽn-kugrã sɛɛga.

⁹Bɩ maan-kʋʋdã yãk zom-nagdgã sẽn na n yɩ tẽegrã rẽndã, n ning tẽn-kugrã zug n yõog bugum. Rẽndã na n yɩɩ kũun sẽn yõogd bugum t'a yũug yɩ noog Sẽn-Ka-Saab yĩnga.

¹⁰La bõn-koaadl kũunã zom sẽn kellã na n yɩ a Aarõ ne a kom-dibli wã rẽnda. Rẽndã yaa bũmb sẽn welg toor n yaa sõama zãnga, kũun sẽn yõogd bugum Sẽn-Ka-Saab taoorã sʋka.

¹¹Bõn-koaadl kũun ning fãa yãmb sẽn na n kõ Sẽn-Ka-Saabã ka tog n ning rã-bɩll ye. Bala, yãmb ka tog n dɩk bũmb sẽn ning rã-bɩlle, wall sẽn ning sɩɩdo, n maan maoong sẽn yõogd bugum Sẽn-Ka-Saab taoor ye.

¹²Yãmb tõe n yãka rã-bɩll ne sɩɩd dẽenem biis n kõ, la b ka tõe n dɩk-a n dogl tẽn-kugrã zugu n maan maoong sẽn yõogd bugum sẽn tar yũ-noog Sẽn-Ka-Saab yĩng ye.

¹³Fo sã n dat n kõ bõn-koaadl kũun buudã fãa tɩ yɩ maoong sẽn yõogd bugum, bɩ f ning-a yamsem. Da kõ Sẽn-Ka-Saab zom kũun n ka ning-a yamsem ye. Bala, yamsmã mamsda kaool ning sẽn be foom ne f Wẽnnaamã sʋkã. Fo sã n na n maan maoong sẽn yõogd bugum fãa n kõ Sẽn-Ka-Saabo, bɩ f ning yamsem.

¹⁴Fo sã n yãk dẽenem biis n na n kõ Sẽn-Ka-Saab tɩ yɩ bõn-koaadl kũuni, bɩ f yãk ka-paal n sẽ bugmẽ n sãre, ne bɩle paalg sẽn to tɩ lebg zom n dɩk tɩ yɩ fo dẽenem biisã bõn-koaadl kũuni.

¹⁵Bɩ f walg kaam kũunã zugu, la f ning-a tɩdare. Rẽndã yaa zom kũuni.

¹⁶Bɩ maan-kʋʋdã yãk ka-sãrdɩ wã b sẽn to wã sẽn ning kaamã ne tɩdarã n yõog bugum tɩ yɩ tẽegre. Rẽndã yaa kũun b sẽn yõogd bugum Sẽn-Ka-Saab taoore.