Read SEBR SÕNGO, 1998 Maan‑kʋʋre 24 Bible Online

Maan‑kʋʋre 24 - SEBR SÕNGO, 1998 bible

Maan‑kʋʋre 24

¹Sẽn-Ka-Saab yeela a Moyiis yaa:

²«Yeel Israyɛll nebã tɩ b tall oliiv kaam bãmb sẽn wõd n wa kõ foom, tɩ f ning fɩtlã tɩ vẽenem zĩnd daar fãa.

³A Aarõ tog n ninga fɩtl-dãmbã sɛk roogã pʋg n pẽneg fu-lillidgã sẽn lill kaoolã koglgã. La a tog n yõgen-b-la zaabr fãa tɩ b be Sẽn-Ka-Saab taoor n wit hal tɩ ta yibeoogo. Yõwã yaa no-tũudg sẽn ka sɛta, yãmb yagensã fãa yĩnga.

⁴A Aarõ tog n dɩka fɩtl-dãmbã n dogl sãnem halaal fɩtl-dogendsã zut tɩ b wit Sẽn-Ka-Saab taoor daar fãa.»

⁵«Bɩ f bao zom-bãaneg n maan bur-maas piig la a yiibu, bur-maasr fãa tog n yɩɩ wũmbl a yembre.

⁶Bɩ f rɩk-b n tong taab sãnem taablã zugu, rulg a yiibu, yoob-yoobe, Sẽn-Ka-Saab taoore.

⁷Bɩ f rɩk wisd zom-bãaneg n yugl rulg fãa zugu, zomã tog n zĩnda maasã zug tɩ yɩ tẽegre, la kũun b sẽn yõogd bugum Sẽn-Ka-Saab waoogr yĩnga.

⁸Vʋʋsg daar fãa, bɩ b ning bur-kãens Sẽn-Ka-Saab taoore. B tog n yãka bõn-kãng Israyɛll nebã sẽn so wã pʋga. Yõwã yaa kaool sẽn paad wakat sẽn ka sɛt yĩnga.

⁹Bõn-kãng na n yɩ a Aarõ ne a kom-dibli wã rẽnda, la bãmb tog n dɩ-a-la zĩig sẽn welg toorã pʋga, tɩ bala, kũun sẽn welg toor wʋsgã b sẽn yõogd bugum Sẽn-Ka-Saab waoogr yĩngã sʋka, bur-kãens n na n yɩɩ a Aarõ ne a kom-dibli wã pʋɩɩre. Yõwã yaa no-tũudg sẽn ka sɛta.»

¹⁰Daar a yembre, Israyɛll neb a yiib n zab taab sik zĩigã pʋga. La a yembrã ma yaa Israyɛll bi-pugla, t'a baaba wã yaa Ezɩpt tẽng raoa. Bãmb dag n wa n kẽeda Israyɛll nebã sʋka.

¹¹Israyɛll bi-pugl-kãng biigã tʋʋsa Sẽn-Ka-Saab n paoog b yʋʋrã. La b tall-a lame n kẽng a Moyiis nengẽ. Bi-kãng ma wã yʋʋr boondame t'a Selomiti, n yaa a Dibri bi-pugla, n yaa Dan buudã neda.

¹²B baoo zĩig n tɩ ning-a, n gũudẽ tɩ Sẽn-Ka-Saab meng noor gomd wilg yellã sẽn na n yɩ a soaba.

¹³Sẽn-Ka-Saab yeela a Moyiis yaa:

¹⁴«Kɩt tɩ b yiis ned ning sẽn tʋʋs-a maamã sik zĩigã pʋga, la bɩ y kɩt tɩ neb nins sẽn wʋm tʋʋsgã rɩk b nusã n tik a zugã, tɩ nebã fãa lob-a ne kug t'a ki.

¹⁵Ad fo sẽn na n yeel Israyɛll nebã to-to: ‹Ned sã n paoog a Wẽnnaamã, a yel-wẽndã taal na n zĩnda a meng zugu.

¹⁶Ned ning sẽn na n tʋʋs-a Sẽn-Ka-Saab yʋʋre, a sɩbgr na n yɩɩ kũum. Nebã fãa na n lob-a-la kug t'a ki. Ba a sã n yaa sãana, wall tẽng-n-neda, a soabã sẽn tʋʋs Wẽnnaam yʋʋrã yĩnga, a tog n kiime.

¹⁷Ned sã n wẽ ninsaal n kʋ, bɩ b kʋ a soabã.

¹⁸Ned sã n wẽ a to rũng n kʋ, bɩ a bao rũng n lebse.

¹⁹Ned sã n pogl a to, bɩ b pogl a soab pogl-kãng buud n lebse.

²⁰Sã n yaa kaoobo, bɩ b kaoog n lebse, la nifu, nif yĩnga, la yẽnde, yẽnd yĩnga. Poglg ning a soabã sẽn pogl a to wã, b na n pogl-a-la pogl-kãng n lebse.

²¹Ned sã n wẽ a to rũng n kʋ, bɩ a bao rũng n lebse, la sã n yaa ned n wẽ a to n kʋ, bɩ b kʋ a soabã.

²²Tõogã tog n yɩɩ a yembr nebã fãa yĩnga, sã n yaa sãana wall tẽng-n-neda. Bala, mam yaa Sẽn-Ka-Saab sẽn yaa yãmb Wẽnnaam.»

²³A Moyiis rɩka koe-kãens n taas Israyɛll nebã. La b yiisa sẽn tʋʋs-a wã sik zĩigã yɩng n lob kug n kʋ. Israyɛll nebã maana wa Sẽn-Ka-Saab sẽn dag n yeel a Moyiisã.